Abutalıb Səmədov: "Kim daha güclüdur - Ermənistandan sonra Gürcüstanı da Qərbin təsiri altına salmaq mümkün olacaqmı?"
Seçki günü yaxınlaşdıqca Gürcüstan müxalifəti ilə iqtidar arasında mübarizə daha qızğın fazaya keçir. Siyasətçilərin lakonik söz atışmaları dərin mənaları özündə ehtiva edir. Prezidentin post-seçki dönəminə aid planları barədə açıqlamasına Kobaxidze özünəməxsus çılğınlıqla münasibət bildirib.
Gürcüstanın Baş naziri İrakli Kobaxidze Gürcüstanin indiki prezidentinə xitabən deyib ki, yaxın bir ay ərzində biz prezidentə "texniki impiçment" elan edəcəyik - bu haqda yalnız mən deyə bilərəm.
Qeyd edək ki, Gürcüstan prezidenti Salome Zurabişvili seçkilərdən sonra keçid dövrünü təmin etmək üçün yaratmağı təklif etdiyi "texniki hökumət"in tərkibini açıqlayacağını, bu hökumətin üzvlərinin isə siyasətçi olmayan şəxslər olacağını bildirmişdi.
Bu söz atışmasını şərh edən politoloq Abutalıb Səmədov bildirdi ki, oktyabrın 26-da Gürcüstanda keçiriləcək parlament seckiləri heç də yalnız iqtidar və müxalifət partiyaları arasındakı mübarizədən ibarət deyil: "Əslində Gürcüstanda Amerikanın liderlik etdiyi Qərblə Rusiya arasında mübarizə gedir. Gürcüstan prezidenti Zurabişvili bunu açıq şəkildə söyləyir - biz indiyə qədərki Qərbə inteqrasiya xəttini davam etdirəcəyik, yoxsa geriyə, Rusiyaya yaxınlaşmaq yolunu seçəcəyik? Aydındır ki, iqtidar partiyası Qərbə yaxınlaşmanın elə bir fayda vermədiyini görür. Ən əsası da odur ki, işğal altında olan torpaqları geri qaytarmaq mümkün olmadı. Hakimiyyət partiyası anladı ki, Rusiya ilə razılaşmadan işğalda olan torpaqları geri qaytarmaq mümkün olmayacaq. Bu, Qərbi heç də narahat etmir. Yəqin ki, əvvəlcədən razılaşma əsasinda, birdən-birə Qərbdən uzaqlaşmaq xətti götürüldü. Baxmayaraq ki, Gürcüstan Avropa Birliyinin üzvlüyünə namizəd statusu almışdı və cox uğurla Ermənistan, Ukrayna və Moldova ilə birlikdə Avropa Birliyinin üzvü ola bilərdi. Gürcüstan hökuməti bundan imtina etdi.
Aydındır ki, məqsəd torpaqları geri qaytarmaqdır. Çox ciddi mübarizə gedir, hökumətin qalib gəlmək şansi o qədər də yüksək deyil. Müxalifət də çox ciddi şəkildə hazırlaşıb və arxasında çox ciddi qüvvələr dayanır. Seçkilərin nəticəsi necə olacaq - indidən prezident Zurabişvili gələcək planlarını hazırlayir və onun fikrincə, seçkilər elə nəticələnəcək ki, o hansısa "texniki namizəd"in baş nazirliyə namizədliyini irəli sürə biləcək. Bu o halda olur ki, hec bir tərəf ciddi üstünlük əldə edə bilmir, prezident baş nazirliyə elə neytral namizədi irəli sürür ki, onu parlament qəbul etsin. Zurabişvili ya belə plan qurur, ya da onun arzusu budur ki, heç olmasa parlamentdə "Gürcüstan arzusu" partiyası ciddi üstünlüyə malik olmasın və son nəticədə Zurabişvili istədiyi adamı baş nazirliyə namizəd verə bilsin. Prezident indidən artıq danışıqlar da aparır. Təbiidir ki, bu, hakimiyyətdə olan qüvvələri narahat edir. Onlar da impiçmentə hazırlaşırlar.
Məlumdur ki, Zurabişvili prezidentliyə "Gürcüstan arzusu" partiyasının dəstəyi ilə seçildi. O dövrdə həmin partiya da Avropaya yaxınlaşmaq xəttini götürmüşdü. Bu ilin dekabr ayında Zurabişvilinin prezidentlik muddəti başa çatir. O, bir dönəm də prezidentliyə namizəd ola bilər, ancaq aydındır ki, Zurabişvilinin belə bir şansı olmayacaq. Çünki yeni qaydaya görə, prezidenti "seçicilər kollegiyası" seçəcək. Yəni ABŞ-da olduğu kimi. Bu kollegiyaya 150 deputat və 150 yerli hakimiyyət orqanlarının nümayəndələri daxildir. Bələdiyyələrdə isə böyük üstünlük "Gürcüstan arzusu" partiyasına məxsus olduğuna görə Zurabişvilinin yenidən prezident seçilmək şansı yoxdur.
Hökumət belə planlaşdırır ki, əgər seçkilərdə ciddi uğura nail olsa prezidentə impicment qoysun və dekabr ayını gözləmədən Zurabişvilini bu yolla öz vəzifəsindən uzaqlaşdırsın. Məlumdur ki, bundan əvvəl belə bir cəhd olmuşdü, lakin hakim "Gürcüstan arzusu" partiyasi kifayət qədər səs toplaya bilmədi. Bu səbəbdən də impicment baş tutmadı. İndi hesab edirlər ki, parlament seçkilərində hakim partiya ciddi üstünlüyə nail ola bilər. Belə olsa dərhal impiçment məsələsi qaldırılacaq.
Əslinə qalsa, prezidenti günahlandırmaq üçün elə ciddi əsaslar yoxdur. Belə qeyri-ciddi səbəb gətirirlər ki, prezident Zurabişvili xarici səfərlərini qanuna görə hökumətlə razılaşdirmalıdır, lakin razılaşdırmır. Bu, guya impicment üçün əsasdir. Təbiidir ki, bunlar qeyri-ciddi məsələdir və çox güman ki, "Gürcüstan arzusu"nun impiçment arzusu reallaşmayacaq.
Gürcüstan uğrunda gedən bu ölüm-dirim mübarizəsi Qərbin və Rusiyanın regionda gücünü bir daha göstərəcək. Kim daha güclüdur - Ermənistandan sonra Gürcüstanı da Qərbin təsiri altına salmaq mümkün olacaqmı? Yoxsa Ukraynada olduğu kimi Gürcüstanda da Qərbi məğlubiyyət gözləyir? Ehtimal kimi, Qərbin Gürcüstanda qalib gəlməsi çox cətindir. Əgər parlament seçkilərində prezident Zurabişvilinin istədiyi qədər deputat mandatı qazanmaq mümkün olsa və prezidentə "texniki hökumət" təşkil etmək şansı qazandırsa, bu, Qərbin böyük uğuru sayılacaq. Hərcənd, bu cür hökumətlər uzunömurlü olmur. Çünki deputatları ələ alıb güc balansını dəyişmək mümkündür. Bu halda Gürcüstani qeyri-sabit siyasi vəziyyət gözləyir. Bu da, təbii ki, dövlət üçün arzuolunmazdır.
Seçkilərə çox az vaxt qalıb, bu, Azərbaycan üçün də çox mühüm hadisədir. Gürcüstan Ermənistan kimi Qərbə yaxınlaşmanı davam etdirəcəkmi, yoxsa torpaqlarını azad etmək naminə Rusiyaya üz tutacaqmı - bunu seçkilərin nəticəsi göstərəcək".
Dəniz NƏSİRLİ
