Kamran Ramazanlı: "Gürcüstan əhalisinin 10-12 faizini təşkil edən azərbaycanlı əhalidən cəmi 13 nəfərin seçkiyə qatılması çox aşağı göstəricidir"
Gürcüstanda oktyabrın 26-da keçiriləcək parlament seçkilərində deputat mandatı uğrunda 13 azərbaycanlı mübarizə aparacaq.
Gürcüstan Mərkəzi Seçki Komissiyasının saytında məlumat verilib ki, onlardan ikisi hakim "Gürcü Arzusu-Demokratik Gürcüstan" (41) partiyasında, biri "Dəyişikliklər naminə koalisiya" (4) partiyasında, digər ikisi "Birlik-Milli Hərəkat" (5) partiyasında, biri "Güclü Gürcüstan" (9) partiyasında, dördü "Gürcüstan Birlik və İnkişaf" (3) partiyasında və üçü "Birləşmiş Gürcüstanımız" (12) partiyasında təmsil olunur.
"Builki seçkilərdə yenə də bizim soydaşlarımız üç, ən yaxşı halda isə dörd deputat mandatı qazana bilərlər"
Gürcüstanda seçki prosesində azərbaycanlıların iştirak prosesini dəyərləndirməsi üçün "Soydaş" İctimai Birliyinin rəhbəri Kamran Ramazanlı ilə əlaqə saxladıq.
- Hazırda Gürcüstanda nə qədər azərbaycanlı yaşayır?
- Gürcüstanda təxminən yarım milyona yaxın azərbaycanlı var.
- Gürcüstanda oktyabrın 26-da keçiriləcək parlament seçkilərində deputat mandatı uğrunda 13 azərbaycanlı mübarizə aparacaq. Yarım milyona yaxın azərbaycanlının qabağında 13 nəfərin seçkiyə qatılması necə bir göstəricidi?
- Təbii ki, bu pis göstəricidir. Parlament seçkilərində namizədliyini verənlərin də üç-dörd nəfərindən başqa qalanları keçərli yerlərdə deyil. Rəsmi rəqəmləri əhatə etsək, Gürcüstan əhalisinin 10-12 faizini təşkil edən azərbaycanlı əhalidən cəmi 13 nəfərin seçkiyə qatılması çox aşağı göstəricidir.
- Səbəb kimi nəyi görürsünüz?
- Burda müəyyən obyektiv səbəblər də var. Çünki Gürcüstanda proporsional seçki sistemidir. Bu seçki sistemi üzrə də gərək partiyaların qərarı ola və onlar iştirak edələr. Təəssüflər olsun ki, soydaşlarımızın yalnız dörd nəfəri bir qədər guya öndə olan yerdədir. Qalanları yox. Öndə olan namizədlərin keçmək şansı ola bilər. Hakim "Gürcü arzusu" partiyasından namizəd hazırkı deputat Zaur Darğalı 25-ci yerdədir. 66-cı yerə Savalan Mirzəyev daxil olub, o da hazırda deputatdır. Müxalifətin iki blokundan -"Qvaramia melia" blokundan 10-cu yerdə soydaşımız Oqtay Kazımov, "Lelo" partiyasından Aqil Mustafayev isə 22-ci yerdədir. Təəssüflər olsun ki, o biri partiyalarda soydaşlarımız çox arxa yerlərdədir. Yəni Saakaşvilinin rəhbərlik etdiyi "Vahid Milli Hərəkat" Partiyasında ən öndə olan soydaşımız 34-cü yerdədir. Bu, jurnalist Ceyhun Məhəmmədəlidir. Qalan namizdələr isə 50-ci və daha sonrakı yerlərdədir. Ona görə də builki seçkilərdə yenə də bizim soydaşlarımız üç, ən yaxşı halda isə dörd deputat mandatı qazana bilərlər. Hazırda da üç deputat var və bu dəfə də real görsənən odur ki, yenə də üç deputat olacaq.
- Namizəd kimi seçkiyə qatılan hər bir azərbaycanlıya neçə nəfər seçici düşür?
- Bu bölgü ilə deyil ki. Proporsional qaydadadı. 5 faizlik baraj var. Gürcüstan parlamentinin də 150 deputatı var. Aldıqları səslərə uyğun olaraq partiyalarda səslər bölünür. Yəni bu da azərbaycanlı və qeyri-azərbaycanlı namizədə görə bölünmür. Gürcüstanda artıq mojaritar sistem yoxdur.
- Ümumiyyətlə, bu rəqəm Gürcüstanda yaşayan azərbaycanlıların seçki siyasi fəallığını adekvat olaraq göstərirmi, ifadə edirmi? Məsələn, demək olarmı ki, orda azərbaycanlıların sayı kifayət qədər çoxdur, amma seçki aktivliyi səviyyəsi aşağıdır, 13 rəqəmini göstərir? Bəlkə də elə 13 rəqəmi ordakı azərbaycanlıların seçki siyasi fəallığına adekvat olan bir göstəricidir?
- Deməzdim ki, göstərir. Sadəcə olaraq, orda bəzi partiyaların bizim soydaşlarımıza qarşı normal mövqe tutmadığını sərgiləyir. Bizim kifayət qədər gənclərimiz var ki, siyasi baxımdan aktiv adamlardır, ayrı-ayrı partiyaların üzvləridirlər, siyasi fəaldırlar, ancaq nədənsə həmin partiyaların rəhbərliyi onları ön sıralara daxil etməyib. Ona görə də vəziyyət belə alınıb. Amma deməzdim ki, adekvatdır, yox, adekvat deyil. Hazırda siyasi cəhətdən aktiv, yetkin gənclərimiz çoxdur. Düzdür, əvvəlki dövrdə adekvat ola bilərdi, çünki fəal adamlar az idi. Amma indi kifayət qədər fəal gənclər var. Yəni onlar partiyaların siyahılarına daxil ola bilərdilər. Amma salınmadılar. Seçici aktivliyi aşağı olmayacaq, kifayət qədər olacaq. Çünki bu seçkilər həlledici seçkilər olduğu üçün hər iki tərəf - istər müxalifət, istər iqtidar maksimum dərəcədə çalışır ki, seçkilərdə seçici fəallığı yüksək olsun. Bu, Gürcüstan üçün tam həlledici seçkidir. Eyni zamanda bölgəmiz üçün də həlledici seçki hesab edilə bilər.
- Gürcüstanda seçki prosesində azərbaycanlıların iştirak prosesini necə dəyərləndirmək olar?
- Bizim soydaşlarımız Gürcüstan vətəndaşlarıdır. Ümumi olaraq qeyd edim ki, bu seçki Gürcüstan, Gürcüstanın bütün vətəndaşları üçün həlledici seçkidir. Həmçinin də bölgə üçün.
İradə SARIYEVA
