Son vaxtlar Şimali Qafqaz respublikaları olan Çeçenistan və Dağıstan muxtar respublikalarının rəhbərləri arasında söz atışması pik həddə çatıb. Sonuncü açıqlamasında Ramzan Kadırov Sergey Melikovu ölümlə hədələyib. Hər iki rəhbər ölkədəki kriminal elementlərlə sıx əlaqədədir.
Hər iki siyasi personanın kriminal aləmə məxsus yaxın adamları Moskvada və ölkənin digər böyük şəhərlərində mühafizə xidməti ilə məşğuldurlar. Ramzan Kadırov və Sergey Melikov Rusiyanın özəl mühafizə xidməti sektorunda bir-birinə ciddi rəqib sayıla bilər. Bəlkə də haqqında söhbət açdığımız qarşıdurmanın səbəbi elə muhafizə xidmətindəki biznes rəqabətinin nəticəsidir. Çunki Kadırov rəqibini "Wildberries" şirkətinin ofisində baş verən atışmada əli olmaqda suçlayır.
Dağıstanın rəhbəri Sergey Melikov Dərbənddəki parkın açılışında Ramzan Kadırova cavabında deyib ki, Dağıstan regiondan olan senator Süleyman Kərimovu dəstəkləməyə hər zaman hazırdır: "O, öz xalqı üçün yalnız xeyirxah işlər görür. Dağıstan ona çətin anlarda həmişə dəstək olacaq. Çünki bizim gücümüz birlikdədir və parçalanma cəhdləri yalnız düşmənlərimizin əlinə oynayır".
Qeyd edək ki, oktyabrın 9-da Ramzan Kadırov Çeçenistanın təhlükəsizlik qüvvələri qarşısında çıxış edərək, ona qarşı sui-qəsd təşkil edildiyini bildirib. Kadırov sui-qəsd cəhdində Dağıstandan olan senatorlar Süleyman Kərimov, Bekxan Baraxoyev və Rizvan Qurbanovu suçlayıb və onlara "qan davası" ilə bağlı xəbərdarlıq edib. Ramzan Kadırov çıxışı zamanı "Wildberries" ofisində baş verən atışma hadisəsini də bu üçlüklə əlaqələndirib.
Ramzan Kadırovun bəyanatından sonra Rizvan Qurbanov videomüraciət yazıb və Çeçenistan rəhbərinə sui-qəsd hazırladığını inkar edib. O, həmçinin bildirib ki, "Wildberries" şirkəti ilə heç bir əlaqəsi yoxdur.
Sentyabrın 18-də "Wildberries"in Moskva ofisinin yaxınlığında, şirkətin Koreya əsilli təsisçisinin keçmiş əri Vladislav Bakalçuk Tatyana Bakalçukun Çeçenistandan olan təhlükəsizlik və MMA (qarışıq döyüş sənəti (ing. mixed martial arts, MMA)) döyüşçülərini dəf edərək binaya girməyə cəhd etdiyi zaman atışma baş verib. Bakalçukun özü bildirib ki, həmin şəxslər binanı ələ keçirmək istəyir. Vladislav Bakalçuk danışıqlara gəldiyini, özü və komandasının hücuma məruz qaldığını bildirib.
Ramzan Kadırov iddia edir ki, "Wildberries" şirkətinin ofisinin Çeçenstandan olan mühafizəçiləri və MMA döyüşçülərinə hücum edən şəxslər məhz Sergey Melikov və ona yaxın çevrənin adamlari olub. Belə çıxır ki, Tatyana Bakalçukun muhafizəçiləri Çeçenstan əsilli, Ramzan Kadırovun, əri Vladislav Bakalçukun mühafizəçiləri isə Dağıstan əsilli, Sergey Melikovun adamları olub. Yəni Sergey Melikovla Ramzan Kadırov arasında gedən söz atışması və bir-birini ölümlə hədələməsi onların Moskvadakı biznes rəqabəti ilə bağlıdır. Söhbət külli miqdarda qazancdan gedir, rəhbərlər bir-birini mühafizə xidməti bazarından sıxışdırıb çıxarmaq istəyir. Nəzərə alsaq ki, hər iki tərəfin sərəncamında kifayət qədər qanuni və qeyri-qanuni silahlı dəstələr var, onda bu iki tərəf arasında silahlı qarşıdurmanın olması da mümkündur. Hələ ki, tərəflər həbsdə olan adamlarının azad edilməsi ilə məşğuldurlar. Həbs edilən 60 nəfərə yaxın mühafizəçinin əksəriyyətinə müxtəlif məhkəmələr tərəfindən 15 sutkalıq həbs cəzası verilmişdi, artiq onlar azadlıqdadir. Lakin silaha əl atan mühafizəçilərin istintaqi gedir.
Görünur, Vladimir Putinin başının Ukrayna cəbhəsinə qarışdıği bir dövrdə Ramzan Kadırov və Sergey Melikov nəzarətsiz qalmalarından istifadə edərək, biznes uğrunda silahlı mubarizəyə başlayıblar.
Bu arada, Moskvada gəzən söz-söhbətlərə görə, Vladislav Bakalçuk çeçenistanlı mühafizəçilərlə bacarmadıqlarına görə dağıstanlı mühafizəçilərini işdən azad edib. Yəni Ramzan Kadırovun adamları bu qarşıdurmadan hələ ki, qalib çıxıb. Bu iki lider arasında mübarizə getdikcə şiddətlənməkdədir.
Akif NƏSİRLİ
