Əli Mustafa: "Bunu bu formada ifadə etməyin özü də doğru deyil"
İran prezidenti Məsud Pezeşkian Azərbaycan baş nazirinin müavini Şahin Mustafayevlə görüşündə regionda xarici dövlətlər üçün platsdarm yaradılmasının mümkün nəticələrindən narahatlığını bildirib. Bu barədə İranın Tasnim agentliyi məlumat yayıb.
Pezeşkian vurğulayıb ki, hər bir dövlətin suverenliyinə hörmət edilməlidir və xarici qüvvələrin mövcudluğu region ölkələrinin maraqlarına cavab vermir: "Biz əminik ki, əməkdaşlığımız vasitəsilə təhlükəsizliyi təmin edə və problemlərimizi həll edə bilərik. Bu, İranın hər zaman vurğuladığımız prinsipial siyasətidir".
Maraqlıdır, Pezeşkian məgər bilmir ki, bu bölgədə xarici dövlətlər üçün platsdarm yaradan hansı dövlətdir? Belə bir məsələni Şahin Mustafayevlə niyə müzakirə edir və onunla görüşdə səsləndirir? Pezeşkianın bu fikirlərini erməni mediası həvəslə tirajlayır və bildirir ki, İran prezidenti guya Azərbaycana mesaj verib. Guya Azərbaycan regionda xarici ölkələr üçün platsdarm yaradır. Biz hansı ölkə üçün platsdarm yaradırıq? Məgər bu regionda xarici dövlətlər üçün platsdarm yaradan Ermənistan deyilmi? NATO gedir, Avropa İttifaqı gəlir. Aİ gedir, ABŞ, Fransa gəlir...
"Tehran yaxşı bilir ki, Zəngəzura Aİ-nin missiyasını, ABŞ və digər dövlətlərin hərbi müşavirlərini kim dəvət edir"
Sözügedən məsələni "Bakı-Xəbər"ə şərh edən Demokratik Dəyişim Partiyası Təşkilat Komitəsinin sədri Əli Mustafanın fikrincə, ümumən Pezeşkianın Şahin Mustafayevlə yüksək səviyyəli görüşü İran-Azərbaycan münasibətlərinin istiləşməsinin əlaməti kimi dəyərləndirilə bilər: "Ancaq ənənəvi olaraq İran rəhbərləri hər zaman regionda digər dövlətlərin mövcudluğuna qıcıqla yanaşırlar. Bunu zaman-zaman bir sıra İran rəsmilərinin timsalında müşahidə etmişik. Necə deyərlər, bu yeni bir hal deyil. İndi isə Pezeşkian sanki o mövqeni bir qədər karrektə edib səliqəli bir formada çatdırıb. Əlbəttə, burada biz düşünürük ki, sözügedən mesaj daha çox Ermənistana aiddir. Çünki Ermənistan artıq Birləşmiş Ştatların, Rusiyanın, Fransanın və digər dövlətlərin hərbi birliklərinə, hissələrinə, hərbi mövcudluğuna şərait yaradır. Onlar üçün bir platsdarm rolunu oynayır. Ermənilər isə özünəməxsus hiyləgərliklə bunu başqa formada təqdim edirlər. Elə təqdim edirlər ki, guya İran bununla Azərbaycana işarə edir və İsraillə Azərbaycan arasında hərbi əməkdaşlığı nəzərdə tutur. Fikrimcə, Pezeşkian bu açıqlaması ilə ümumi danışır. Mesaj verir ki, biz regionda başqa dövlətlərin var olmasını istəmirik. Ancaq bunu bu formada ifadə etməyin özü də doğru deyil. Çünki dövlətlərin hər biri suveren və müstəqildir. Yəni dövlətlər özləri qərar verirlər ki, kimlə dostluq etmək olar, kimlə olmaz. Yaxud da öz ərazisində başqa dövlətlərə hərbi baza quracaq, ya da qurmayacaq. Bir sözlə, bununla başqa dövlətləri təhdid etmək yolverilməzdir. Tehran yaxşı bilir ki, Zəngəzura Avropa İttifaqının missiyasını, ABŞ və digər dövlətlərin hərbi müşavirlərini kim dəvət edir. Ermənistan sanki bir sıra dövlətlər üçün açılım edib. Azərbaycan isə dəfələrlə bəyan edib ki, biz ölkəmiz üzərindən üçüncü dövlətlərin İrana qarşı hər hansı hərəkətinə meydan verməyəcəyik".
Vidadi ORDAHALLI
