Məhəmməd Əsədullazadə: "Rubinyan başından böyük danışaraq, Ankaranı siyasi iradəsizlikdə günahlandırır"
Ermənistan parlamentinin vitse-spikeri, Türkiyə ilə münasibətlərin normallaşması üzrə xüsusi nümayəndə Ruben Rubinyan "Dünyanın kəsişməsi: təhlükəsizlik və demokratiyanın birləşməsi" adlı konfransda bildirib ki, İrəvan-Ankara münasibətlərinin normallaşmasına ən böyük maneə Türkiyənin siyasi iradəsinin olmamasıdır:
"Ermənistan-Türkiyə münasibətlərinin normallaşması yolunda bir böyük maneə var - bu, Türkiyənin siyasi iradəsinin olmamasıdır ki, münasibətlərin normallaşması yolunda ən böyük maneədir. Türkiyədə Ermənistanla münasibətlərin nizamlanması ilə bağlı siyasi qərar olsa, məsələn, sabah qərar verilsə, elə sabah sərhədlər açılacaq".
Məgər Rubinyan bilmir ki, Türkiyə ilə Ermənistanın münasibətlərinin normallaşması hansı iradədən asılıdır? Bunun aydın səbəbi var və hamıya da məlumdur. O da ondan ibarətdir ki, Türkiyə Azərbaycansız addım atmayacaq. Yəni Azərbaycanla Ermənistan arasında sülh sazişi imzalanmadan sərhədlər açılmayacaq. Bunları bilə-bilə vəziyyəti bu qədər qəlizləşdirirlər.
"30 il işğalçı müharibə aparan, konstitusiyasında qonşu ölkələrə qarşı ərazi iddiası ilə çıxış edən bir dövlətin..."
Sözügedən məsələni "Bakı-Xəbər"ə şərh edən politoloq Məhəmməd Əsədullazadə hesab edir ki, ümumiyyətlə, Ermənistan-Türkiyə əlaqələri Bakı-İrəvan münasibətlərindən asılıdır: "Bunu da rəsmi Ankara dəfələrlə bəyan edib. Rubinyan isə başından böyük danışaraq, Ankaranı siyasi iradəsizlikdə günahlandırır. Ankaranın siyasi mövqeyi ondan ibarətdir ki, indiki şərtlər daxilində Ermənistanla sərhədlər açıla bilməz. Bu o deməkdir ki, Azərbaycanla sülh sazişi olmadan, kommunikasiyalar açılmadan sərhədlər açılmaz. İrəvan anlamalıdır ki, Türkiyə regional gücdən artıq beynəlxalq gücə çevrilən bir ölkədir. Dünyanın yeni siyasi nizamının formalaşmasında rol oynayır. O baxımdan Ermənistanın özünün siyasi iradəsi yoxdur. Çünki İrəvan Brüsseldən, Parisdən, Vaşinqtondan siyasi təlimatlar alır. Türkiyənin öz narrativləri var və bu istiqamətdə öz siyasətini qurur. Sadəcə olaraq, Ermənistan tərəfi manipulyasiya ilə məşğuldur. Azərbaycanla 17-18 maddədən ibarət sülh sazişi layihəsi var. Onun 13 bəndi razılaşdırılıb. Ermənistan deyir ki, gəlin elə bu 13 bəndlə saziş imzalayaq. Türkiyə ilə ilkin şərt olmadan sərhədlər açılsın. O baxımdan hesab edirəm ki, bu, Ermənistanın hiləgər siyasətidir. Ona görə də Ermənistan buna son qoymalı və ilk növbədə Azərbaycanın bütün şərtlərini yerinə yetirməlidir. Yekun sülh müqaviləsi bağlamalıdır. Yalnız ondan sonra Ermənistan-Türkiyə münasibətləri normallaşacaq. Əgər Azərbaycanla Ermənistan arasında sülh sazişi olmasa, Türkiyə ilə sərhəd açılmayacaq. Ermənistan hökuməti müəyyən konfranslar təşkil etməklə özlərini "sülh göyərçini" kimi göstərməyə çalışır. Bu da gülüş doğuran bir haldır. Regionda 30 il işğalçı müharibə aparan, konstitusiyasında qonşu ölkələrə qarşı ərazi iddiası ilə çıxış edən dövlətin hansısa dövləti siyasi iradəsizlikdə ittiham etməsi gülüncdür".
Vidadi ORDAHALLI
