Rauf Zeyni: "Ermənistanın dedikləri tamamilə absurd məsələdir"
Ermənistan rəsmi şəkildə yalan danışmağı özünə əsas vəzifə bilir. Belə olmasaydı, bu ölkənin rəsmi şəxsləri ölkə ictimaiyyətini və beynəlxalq aləmi öz yalanları, saxta məlumatları ilə məşğul etməzdi, gerçəyi bəyan edərdilər.
Ermənistan Xarici İşlər Nazirliyinin mətbuat katibi Ani Badalyan "Armenpress-ə" müsahibəsində Azərbaycanda da "itkin düşmüş" şəxslərdən danışıb. Deyib ki, iki müharibə nəticəsində guya Ermənistan tərəfdən minə yaxın erməni itkin düşüb. Badalyan onu da deyib ki, Azərbaycan ərazisində "itkin düşən" (?) ermənilərlə bağlı ölkəsi çox narahatdır və bununla bağlı dəfələrlə məsələ qaldırıb. O, "biz bu məsələdə də əməkdaşlığa hazırıq"-deyib.
Ermənistanın Azərbaycan ərazisində hansı vətəndaşı itkin düşə bilər? Ermənistanın vətəndaşı Azərbaycanda nə gəzirdi ki, Azərbaycan torpağında da itkin düşə? Qarabağ ermənilərindən itkin düşən varsa onun Ermənistana nə dəxli var? Bəlkə onu Ermənistan əsgərləri özləri oğurlayıb aparıb? Qarabağda yaşamış ermənilər Azərbaycan vətəndaşlarıdır, onların itkin düşməsinin Ermənistana nə dəxli var? Əgər Ermənistanın vətəndaşlarıdırsa və gəlib Qarabağda itkin düşüblərsə, Ermənistanın əsgərlərinin, vətəndaşlarının Qarabağda nə işləri vardı, onlar burda nə gəzirdilər?
Ermənistanın süni şəkildə "erməni itkinlər" məsələsini gündəmə gətirməsi təsadüfi xarakter daşımır. Çünki Azərbaycan tərəfi Birinci Qarabağ müharibəsində itkin və əsir düşən, girov götürülən 4 minə yaxın vətəndaşımızla bağlı məsələni haqlı olaraq gündəmə gətirir və Ermənistandan tələb edir ki, bizim 4 min nəfərə yaxın itkin düşən vətəndaşımızın taleyinə aydınlıq gətirsin. Bizim həqiqətən də minlərlə vətəndaşımızın taleyi məlum deyil. Amma Ermənistan belə bir əsassız iddia irəli sürməklə, guya balans yaratmağa çalışır, əslində isə yenə də saxtakarlığa yol verir.
"Belə bir əsassız iddia irəli sürməklə, guya balans yaratmağa çalışır, əslində isə yenə də saxtakarlığa yol verir"
Müstəqil ekspert Rauf Zeyni "Bakı-Xəbər"ə şərhində bildirdi ki, həmişə olduğu kimi, ermənilər yenə də öz ampluasındadır. "Bizim 30 il ərzində 4 minə yaxın itkinimiz var. İtkin düşən Azərbaycan vətəndaşları ilə bağlı bu sahədə fəaliyyət göstərən ictimai birlik, müxtəlif təşkilatlar, eyni zamanda mənim vaxtilə rəhbərlik etdiyim Milli QHT Forumu illərlə Əsir və itkin düşmüş, girov götürülmüş vətəndaşlarla əlaqədar Dövlət Komissiyasının üzvü olub. Biz geniş mənada bu işlərlə məşğul olmuşuq. Amma təəssüflər olsun ki, Ermənistan bizim əsir və itkin düşən, girov götürülən vətəndaşlarımızın taleyi ilə bağlı bütün informasiyaları gizlədib və maksimum çalışıb ki, dünya ictimaiyyəti bu faktdan xəbərsiz olsun. Buna görə də bu məsələdə ciddi problemlər var. Ancaq yenə də bütün dünya ictimaiyyəti bu məsələdən xəbər tutub. Bu yaxınlarda da Dövlət Təhlükəsizlik Xidməti yanında Əsir və itkin düşmüş, girov götürülmüş vətəndaşlarla əlaqədar Dövlət Komissiyasının dəstəyi və eyni zamanda qeyd etdiyim ictimai birliyin təşkilatçılığı ilə böyük beynəlxalq konfrans keçirildi, dünya ictimaiyyətinə bildirildi ki, Birinci Qarabağ müharibəsində 4 minə qədər əsir və itkin düşmüş, girov götürülmüş vətəndaşımız var, biz onlar barədə məlumat əldə etmək istəyirik. Dünya ictimaiyyətinə çatdırıldı ki, vətəndaşlarımızın taleyi barədə məlumatlar yoxdur, Ermənistan onlar haqda informasiya verməkdən, onların harada olması, sağ qalıb, yaxud öldürülməsini açıqlamaqdan imtina edir. Bu çox ciddi məsələdir. Bununla əlaqədar dünya ictimaiyyəti əsl həqiqətləri bilməlidir.
O ki qaldı Ermənistan tərəfinin iddialarına ki, guya onların da itkin düşmüşləri var, bu tamamilə absurd məsələdir. Çünki itkin düşmüş Ermənistan hərbiçisi və yaxud Qarabağ sakini barədə hər hansı bir informasiya yoxdur. Əgər varsa təqdim etsinlər. Ona görə də bunun hamısı Azərbaycanın apardığı haqlı siyasətin, irəli sürdüyü haqlı mövqeyin balanslaşdırılması, yaxud qarşısının alınması üçün erməni məkrliyindən irəli gələn düşünülmüş, hətta düşünülməmiş bir siyasətdir. Onlar guya düşünüb bunu edirlər, amma sonra başşa düşürlər ki, düşünülməmiş addım bunların öz əleyhinə çevrilir. Ermənistan öz silahı ilə özünü vurur. Bu çirkin niyyətləri ilə əslində özlərini ifşa edirlər. Hansı Ermənistan vətəndaşından söhbət gedir və o Azərbaycana hansı məqsədlə gəlib ki, itkin düşüb? Hərbiçidirsə, onda onun burda nə işi var?"
R.Zeyni qeyd etdi ki, ikincisi də, "itkin düşən" Qarabağ sakini erməniolsa da, o, Azərbaycan vətəndaşıdır, onun da burada itkin düşməsi ilə bağlı heç bir məlumat verən olmayıb. "Olmayan məlumatı isə indi "emal etməyə", dövriyyəyə buraxmağa ehtiyac yoxdur, çünki bu, yalan və böhtandır. Azərbaycanda keçiriləcək çox böyük beynəlxalq tədbirdən əvvəl salınan hay-həşirdir, hay-küydür ki, Azərbaycanın beynəlxalq uğurlarını qəbul edə bilmirlər. Belə cəfəng iddialarla onun qarşısını almaq məqsədi güdürlər. Ona görə də, biz vətəndaş cəmiyyəti olaraq buna öz etirazımızı bildiririk və bir daha Ermənistan rəhbərliyini düşünməyə dəvət edirik, Ermənistan vətəndaş cəmiyyətinin nümayəndələrinə, QHT-lərə müraciət edirik, əvvəllər də müraciət etmişik ki, gedin, hökumətinizə anladın ki, qonşulara qarşı bu cür siyasətlə uğur qazanmaq mümkün deyil. Nəhayət, belə siyasətdən əl çəksinlər. 30 il işğalçılıq siyasəti yürüdüb gedib dünyada demokratiyadan danışırlar. Hansı insan hüquqlarından, demokratiyadan danışırlar ki, özləri işğalçılıq siyasəti yürüdürlər? Bunun fəsadları da Ermənistana çox böyük zərbə kimi dəyir və bundan sonra da dəyəcək"-deyə R.Zeyni bildirdi.
İradə SARIYEVA
