Azər Həsrət: "Azərbaycan torpaqları işğaldan azad edilsə də, müharibə bitsə də insanlarımız hələ də ermənilər üzündən həlak olur"
Uzun illər Ermənistanın işğal altında saxladığı torpaqlarımızı minalaması bu gün ölkəmizin qarşılaşdığı ən böyük problemlərdən biridir. Torpaqlarımız işğaldan azad olunduqdan sonra davamlı olaraq minatəmizləmə işləri aparılır və bu proses sürətlə həyata keçirilir.
İşğaldan azad edilmiş ərazilərdə 2020-ci ilin 10 noyabr tarixindən indiyədək 161 min hektardan çox ərazi mina və partlamamış hərbi sursatlardan təmizlənib, 156 mindən çox mina və müxtəlif təyinatlı hərbi sursat tapılaraq zərərsizləşdirilib.
Qeyd etdiyimiz kimi, İkinci Qarabağ savaşından sonra ölkəmizin üzləşdiyi ən böyük çətinlik minadır. Məlumat üçün bildirək ki, 14 oktyabr tarixində Qazax rayonunun Quşçu Ayrım kəndi ərazisində bir nəfər mülki şəxs piyada əleyhinə minaya düşərək yaralanıb. Qeyd edək ki, İkinci Qarabağ müharibəsindən bugünədək 380-dən çox şəxs mina qurbanı olub və bu acı statistika davam etməkdədir. Azərbaycan Xarici İşlər Nazirliyi "X" hesabında bu barədə məlumat yayıb. Bildirilib ki, beynəlxalq ictimaiyyət Ermənistanın Azərbaycana qarşı mina terrorunu davam etdirməsinə göz yummamalıdır.
Görəsən, bu problem necə həll olunmalıdır?
"Ermənistanı beynəlxalq platformalarda dəstəkləyən bir sıra ölkələr və onların nəzarətində olan insan haqları qurumları var ki, onlar bu məsələdə Ermənistanın məlum siyasətini dəstəkləməyə davam edirlər"
Siyasi şərhçi Azər Həsrət "Bakı-Xəbər"ə şərhində bildirdi ki, Ermənistan Azərbaycan torpaqlarını işğal edən zaman o torpaqlarda minlərlə deyil, yüzminlərlə mina basdırıb. Azərbaycan torpaqları işğaldan azad edilsə də, müharibə bitsə də insanlarımız hələ də ermənilər üzündən həlak olur: "Bunun bir məsuliyyəti olmalıdır. Bu hadisənin cavabdehi, əlbəttəki, Ermənistandır. Bununla yanaşı, Ermənistanı beynəlxalq platformalarda dəstəkləyən bir sıra ölkələr və onların nəzarətində olan insan haqları qurumlar var. Onlar bu məsələdə obyektivlik və ədalət nümayiş etdirmir, birtərəfli mövqe tutur, Ermənistanın məlum siyasətini dəstəkləməyə davam edirlər. Halbuki, Azərbaycan illərdir çağırış edir ki, Ermənistan mina xəritələrini bizə təhvil versin ki, ən azından növbəti qurbanların qarşısını ala bilək. Çox təəssüflər olsun ki, bir müddət öncə Ermənistan mina xəritəsi adı altında bizə saxta xəritələr verdi. Bu da o deməkdir ki, Ermənistan hələ də Azərbaycan vətəndaşlarını öldürməkdə israrlıdır. Onu da deyim ki, bu günlərdə ABŞ konqresmenləri və katibləri Entoni Blinkenə müraciət ünvanlayaraq, Azərbaycanda insan haqlarının durumundan narahat olduqlarını bildiriblər. Biz onları başa düşürük. Onlar Azərbaycanda insan haqları deyib, vurğunu əsasən ermənilərin üzərinə atmışdılar. Guya Azərbaycan etnik təmizləmə aparıb, erməniləri həbsdə tutur, ölkəmizdə erməni hərbi əsirlər var və s. Onları başa düşürük, çünki ermənilərə xidmət edirlər. Təəssüf hissilə qeyd etmək lazımdır ki, ölkəmizdə də bəzi siyasətçilər var ki, ABŞ senat və konqresmenlərinin bu müraciətinə dəstək verdilər. Həmin siyasətçilərin mina problemi ilə bağlı reaksiyasını, paylaşımını, çağırışını görmürük. Halbuki, bu adamlar guya ölkəmizdə insan haqları və demokratiya ilə bağlı narahatlıqlarını ifadə edirlər. Ancaq Ermənistanın başımıza gətirdikləri ilə bağlı susmağa üstünlük verir".
Günel CƏLİLOVA
