Əli Orucov: "Aİ-nin birtərəfli dəstəyi yaxşı heç nə vəd etmir"
Avropa İttifaqı Ermənistan hökumətinin təqdim etdiyi "Dünyanın kəsişməsi" layihəsini alqışlayıb və onun həyata keçirilməsi üçün Ermənistandakı və regiondakı tərəfdaşları ilə fəal işləyir.
Bunu İrəvanda keçirilən "Dünyanın kəsişməsi: təhlükəsizlik və demokratiyanın birləşməsi" konfransında Aİ-nin Ermənistandakı nümayəndəliyinin rəhbəri Vasilis Maraqos deyib.
Daha sonra o, bunları qeyd edib: "Dərhal vurğulamaq istərdik ki, Tərəfdaşlıq Şurasının iclasında nazir Mirzoyanın da iştirak etdiyi iclasda bu təşəbbüs təsdiqləndi. Regionda sülhün və normal münasibətlərin bərqərar olması, eləcə də nəqliyyat yollarının açılması vacibdir. Keçən ilin oktyabrında baş nazir bu təşəbbüsü irəli sürəndə mən də orada idim. Biz bunu alqışladıq və bu təşəbbüsü həyata keçirmək üçün Ermənistandakı və regiondakı bütün tərəfdaşlarımızla fəal işləyirik".
Maraqlıdır, Avroittifaqın "Dünyanın kəsişməsi"nə belə birmənalı, tam dəstək verməsi bölgədə normallaşma və sülh prosesinin taleyinə necə təsir edir?
"Aydın məsələdir ki, belə olduğu halda Ermənistan sülh danışıqlarında kompromisə getməyəcək"
Sözügedən məsələni "Bakı-Xəbər"ə şərh edən AMİP funksioneri Əli Orucovun fikrincə, belə birtərəfli dəstək prosesə ancaq zərər vurur: "Avroittifaq rəsmiləri elə təəssürat yaratmağa çalışırlar ki, guya yalnız Ermənistan kommunikasiya xətlərinin açılmasında maraqlıdır. Guya Azərbaycan bu işə töhfə vermək istəyində deyil. Halbuki, bu belə deyil. Azərbaycan yolların açılmasında Ermənistandan daha çox maraqlıdır. Ən azından bu, Naxçıvanın blokadadan çıxarılması deməkdir. Çünki 30 ildən çoxdur ki, Ermənistan bu ölkə üzərindən Naxçıvana gediş-gəlişə imkan vermir. Ancaq bunun üçün ilk növbədə iki ölkə arasında sülh sazişi imzalanmalıdır. Sülh sazişi də o zaman imzalana bilər ki, oradakı bütün bəndlər razılaşdırılsın. Yəni sülh sazişi layihəsinin 80 faizinin razılaşdırılması yetərli deyil. Razılaşdırılmayan məqamlar ondan ibarətdir ki, Ermənistan öz Konstitusiyasından Azərbaycana yönəlik ərazi iddialarını çıxarsın, Minsk Qrupunun buraxılmasına dair razılıq versin. Ermənistan bunu etmir. Eyni zamanda Konstitusiyadan ərazi iddiaları ilə bağlı maddələrin çıxarılması öhdəliyini də götürmür. Halbuki, belə bir öhdəlik götürsə, sülh sazişi imzalana bilər. Sülh sazişinin imzalanması isə kommunikasiyaların açılmasına yol açır. Avropa İttifaqı bu istiqamətdə Ermənistana təsir etmək əvəzinə, "Dünyanın kəsişməsi"nə birmənalı dəstək verir. Aydın məsələdir ki, belə olduğu halda Ermənistan sülh danışıqlarında kompromisə getməyəcək. Bu isə sülh sazişinin imzalanmasını daha da uzadacaq. Onsuz da Ermənistanın siyasəti bu yöndədir. Ermənistan toparlanandan sonra danışıqlarda daha barışmaz mövqe sərgiləyəcək. Çünki bu, erməni xislətinə xas olan xüsusiyyətdir. Bu baxımdan hesab edirəm ki, Aİ-nin birtərəfli dəstəyi yaxşı heç nə vəd etmir".
Vidadi ORDAHALLI
