Əli Orucov: "Əgər hakimiyyət Moskvanın dəstəyi ilə seçkiləri saxtalaşdırmağa cəhd etsə, bunun ciddi fəsadları olacaq və sanksiyalar reallaşa bilər"
Oktyabrın 26-da Gürcüstanda parlament seçkiləri keçiriləcək. Seçkinin hazırki mərhələsində ruspərəstlərlə avropapərəstlər arasında qızğın mübarizə gedir. Qərbin də Gürcüstan hakimiyyətinə etdiyi təzyiqlər səngimir.
Almaniya Bundestaqı Gürcüstan hökumətini ciddi tənqid edən "Gürcüstanın Avropa gələcəyi naminə" qətnaməsini dəstəkləyib.
Baş nazir İrakli Kobaxidze Almaniya Bundestaqının qətnaməsinin ədalət və prinsiplərlə heç bir əlaqəsi olmadığını bildirib.
Baş nazir qeyd edib ki, bu qərar ölkədə demokratik keçid edən insanları yenidən cəzalandırmağı tələb edən qətnamədir:
"Bu qərar çox təəssüf doğurur. Bundestaqın bu ölkədə demokratik keçid edən insanları yenidən cəzalandırmağı tələb edən qətnamə qəbul etməsi, cinayətkarları qoruması, LGBT təbliğatına qarşı qanun qəbul olunmasını tələb etməsi heyrətləndiricidir", - deyə Kobaxidze bildirib.
Maraqlıdır, bu seçkilərin nəticələrinin Azərbaycana pozitiv və neqativ cəhətdən hansı təsirləri ola bilər? Orada Qərbin tərəfdarları ilə ruspərəstlərin açıq mübarizəsi gedir. Qərb ölkələri də ciddi çalışır.
Nəzərə alsaq ki, Paşinyan da Qərbə meyllidir, Ermənistan orada Qərb tərəfdarlarının qalib gəlməsi üçün hansısa pərdəarxası oyunlar oynaya bilərmi? Həm də Gürcüstanda bir neçə yüz min erməni diasporu var. Onların da təsiri ola bilər?
Sualımızı şərh edən siyasətçi Əli Orucov bildirdi ki, hazırkı Gürcüstan parlamenti çoxpartiyalı əsaslarla formalaşdırılıb: "Son parlament seçkilərində parlamentin 150 yerindən 75-ni hakim "Gürcü Arzusu" və "Demokratik Gürcüstan Partiyası" qazanıb. Hazırda "Xalqın Gücü Partiyası"nın 9 deputat mandatını da nəzərə alsaq, parlamentdə hakimiyyətin 84 yeri var. Bu böyük rəqəm olmasa da, iqtidarın planlarının həyata keçirilməsinə imkan verir. Ən mübahisəli qanun olan xarici agentlər haqqında qanun müxalifətin və cəmiyyətin müəyyən kəsiminin ciddi etirazına səbəb olsa da, "Gürcü Arzusu" həmin qanunun qəbuluna nail oldu. Bu qanunun qəbulu Gürcüstanla Qərb arasında ziddiyyətləri daha da dərinləşdirdi. İlkin rəy sorğularında "Gürcüstan Arzusu"nun xeyli səs itirdiyi görünür.
Qərbin Gürcüstan üzərinə basqısı intensivləşib. Bir sıra güzəştlər və dəstəkdən imtina olunur. Bu isə cəmiyyətdə hakimiyyətin zəifləməsinə də təsir göstərir. 26 oktyabrda keçiriləcək seçkilər Qərblə Rusiya arasında rəqabət meydanına çevriləcək və bu seçkilərin taleyi Cənubi Qafqazda da özünü göstərəcək.
Hakim partiyanın Rusiyaya meyli getdikcə aydın görünür. Qərbin artan təzyiqləri fonunda Moskvaya sığınma tendensiyası güclənir. Hakim partiyanın təbliğat-təşviqat materiallarında Ukraynanın başına gətirilənlərdən istifadə olunması əslində cəmiyyəti qorxutmaq və xof yaratmaqla öz rusiyapərəst siyasi mövqelərinin doğruluğuna inandırmağa çalışır. Təbii ki, Moskva Gürcüstanı əldən verməmək üçün bəzi güzəştlər edəcək.
Gürcüstanda keçiriləcək parlament seçkilərinə Cənubi Qafqazın digər iki ölkəsi də maraq göstərir. Bu həm sözügedən ölkələrdəki mövcud hakimiyyətlərin maraqları baxımından, həm də gələcək istiqamətlər baxımından əhəmiyyət kəsb edir. Həmçinin Gürcüstan cəmiyyətinin çoxmillətli olması da burada müəyyən rol oynayır. Bildiyiniz kimi, Gürcüstanda ermənilər və azərbaycanlılar yaşayır və onların seçkilərə təsirləri var. Kompakt halda yaşayan azərbaycanlı və erməni etniklərin siyasi oryentasiyaları fərqlidir. Gürcüstan hakimiyyəti çalışır ki, həmin etnikləri öz tərəfinə çəkə bilsin. Bunun üçün daxili resurslardan başqa həmin etniklərə təsir edə biləcək xarici amillərindən də bəhrələnməyə çalışacaq. Bu baxımdan Bakı və İrəvanın bu seçkilərə baxışları da önəmlidir. Ermənistanı Qərbyönlü siyasət izləyir. Hər halda, bu görüntü olsa da belədir. Azərbaycanın son dövrlər Rusiyaya daha sıx bağlılığı onun Qərblə münasibətlərində müəyyən gərginliyə səbəb olub. Bu məntiqlə çıxış etsək, deyə bilərəm ki, Bakı Gürcüstanda yaşayan soydaşlarımızı hakim partiyaya, İrəvan isə müxalifətə səs verməyə təşviq edə bilər. Lakin Gürcüstanda az-çox demokratik ənənələr formalaşdırılıb və hesab edirəm ki, bu seçki ciddi rəqabət mühitində keçəcək. Əgər hakimiyyət Moskvanın dəstəyi ilə seçkiləri saxtalaşdırmağa cəhd etsə, bunun ciddi fəsadları olacaq və sanksiyalar reallaşa bilər".
Dəniz NƏSİRLİ
