Akif Nağı: "Canilərin həbs müddətinin uzadılması ətrafında şoular yaratmaqla, çalışırlar ki..."
Həbsdə saxlanılan erməni separatçıların həbs müddəti uzadılıb. Bu barədə Baş Prokurorluğun Mətbuat xidməti məlumat yayıb.
Bildirilib ki, Azərbaycanın Qarabağ bölgəsi və digər suveren əraziləri Ermənistanın hərbi təcavüzü nəticəsində işğal olunduqdan sonra yaradılmış qondarma qurumun "prezidentləri" olmuş Arkadi Gukasyan, Bako Saakyan, Arayik Harutyunyan, sabiq "xarici işlər naziri" Davit Babayan, eləcə də "parlament sədri" David İşxanyan, generallar David Manukyan və digərlərinin barəsində seçilmiş həbs qətimkan tədbirlərinin müddətinin uzadılması ilə bağlı Baş Prokurorluğun İstintaq idarəsinin vəsatətlərinə və Azərbaycan Respublikasının Baş prokurorunun təqdimatlarına Binəqədi rayon məhkəməsində baxılıb.
İstintaqı Baş Prokurorluğun rəhbərlik etdiyi Hərbi prokurorluq, Dövlət Təhlükəsizliyi Xidməti, Daxili İşlər Nazirliyi və digər istintaq qurumlarının peşəkar əməkdaşlarından ibarət birgə istintaq qrupu tərəfindən aparılan cinayət işi üzrə separatçı rejimin ümumilikdə 14 nəfər üzvü Cinayət Məcəlləsinin müxtəlif maddələri ilə məsuliyyətə cəlb olunub.
Məhkəmənin qərarına əsasən, qeyd olunan şəxslərin barəsində seçilmiş həbs qətimkan tədbirinin müddəti uzadılıb.
Bakıdakı separatçı canilərin həbs müddətinin uzadılması ilə bağlı Ermənistanda yenə də şoular başlayıb. Yenə də qondarma iddialar, yenə də uydurma söz-söhbətlər yayır, oyun oynayırlar.
"Əslində, Ermənistandakıları Bakıda həbsdə olan separatçı canilərin taleyi qətiyyən narahat etmir, onlardan sadəcə, öz oyunları üçün istifadə etməyə..."
Azad Vətən Partiyasının sədri Akif Nağı "Bakı-Xəbər"ə bildirdi ki, həbsdə olan erməni separatçıları, caniləri ilə bağlı Ermənistan və xaricdəki erməni lobbisi çoxlu saxta kampaniyalar aparır, hətta xaricdəki bəzi təşkilatları, dövlət rəsmilərini də buna qatın şoular yaradırlar. "Xarici dövlət rəsmilərini, deputatları, konqresmenləri, təşkilatları özlərinin oyunlarına cəlb etməyə cəhd edirlər. Təbii ki, ortada pul, vəsait var. Pul hesabına çalşırlar ki, həm bu məsələni gündəmdə saxlasınlar, həm də ondan Azərbaycana qarşı bir təzyiq vasitəsi kimi istifadə etsinlər. Daha çox ikinci məsələnin üstündə dayanırlar. Canilərin həbs müddətinin uzadılması ətrafında şoular yaratmaqla çalışırlar ki, Azərbaycanın beynəlxalq aləmdəki imicini zədələsinlər, ölkəmizi nüfuzdan salsınlar. Şou yaratmaqdan, oyun qurmaqdan başqa bunların ayrı bir yolu, mübarizə imkanları yoxdur, belə görsənir. Əslində, Ermənistandakıları Bakıda həbsdə olan separatçı canilərin taleyi qətiyyən narahat etmir, onlardan sadəcə, öz oyunları üçün istifadə etməyə çalışırlar"-deyə A.Nağı bildirdi.
A.Nağının sözlərinə görə, Azərbaycan müstəqil siyasət aparır və rəsmən də bildirilir ki, dövlətimiz öz siyasətini heç kimlə uyğunlaşdırmır, çünki öz müstəqil siyasətimizi həyata keçiririk. A.Nağı qeyd etdi ki, Azərbaycanın yürütdüyü müstəqil siyasət kiminsə xoşuna gəlimirsə, bu onların problemidir, özləri bilir. A.Nağı vurğuladı ki, indiki şəraitdə Azərbaycan hüquqi prosedurları nəzərə almaqla, həm beynəlxalq hüquq normalarını, həm ölkə qanunlarını rəhbər tutmaqla canilərin həbsdə qalmaq müddətini uzadıb, bunun üçün kifayət qədər əsasları var. O hesab edir ki, kimlərsə bundan narazıdırsa beynəlxalq qurumlara müraciət etsinlər, Azərbaycan da məlumat versin ki, filan məsələlərə görə onların həbs müddəti uzadılıb, burda qanunsuz heç nə yoxdur. "Bu məsələnin ətrafında şou yaratmağa, yalançı hay-küy salmağa ehtiyac yoxdur. Bunlar COP29 ərəfəsində məqsədli şəkildə göstərilən şoudur ki, bunu da nəyə görə etdiklərini bilirik".
A.Nağı qeyd etdi ki, bu gün Niderland, Norveç və digər bəzi dövlətlər separatçılar ətrafında yaradılan süni şouya qoşulublar və COP29 tədbirlərini qaralamağa çalışırlar. Bu ölkələrin Azərbaycana qarşı "səlib yürüşünə" başlayıb, haqsız, ədalətsiz mövqe tuturlar, Bakıda həbsdə olanları "hərbi əsir" adlandırırlar. "Onların bu yanaşması görünməmiş bir rüsvayçılıqdır. Bunlar nə dediklərinin mahiyyətinə, fərqinə varmırlar ki, hansı "hərbi əsirdən" söhbət gedə bilər. Separatçılar müharibə vəziyyətində "əsir düşüblər", yoxsa yaralanıb "əsir düşüblər". Bunlar hərbi canidirlər, hərbi əsir deyillər. Bu adamlar bizə qarşı cinayət törədiblər, Azərbaycanın Bərdə, Gəncə, Naftalan şəhərlərinin raket atəşinə tutulması ilə bağlı əmr veriblər. Vardanyan Azərbaycana qarşı cinayət, irqi, milli-dini ayrıseçkilik təbliğatı aparıb, terroru maliyyələşdirib, terrorçuluğa dəstək verib. Buna görə beynəlxalq aləmdə belələrinə çox ciddi cəzalar verilir. Azərbaycan faktiki olaraq onlara qarşı mövqeyini ortaya qoyub, əsaslandırılmış şəkildə onların ittiham aktını hazırlayıb. Ermənistanda hüquqa müraciət etmək əvəzinə siyasi şoular düzəldirlər. Ermənistanın içində yenidən bu məsələni qabardırlar. Özləri vaxtilə COP29-un Azərbaycanın ev sahibliyi ilə keçirilməsinə səs veriblər, indi isə COP29 ərəfəsində Azərbaycana qarşı hansısa kampaniyaya başlamaq üçün bəhanə axtarırlar. Ermənistanın daxilində hansısa bir müsbət proses getmir ki, onun ətrafında fikir cəmləşdirilsin. Ona görə də istənilən siyasi qüvvələr, istər hakimiyyətdə olanlar, istərsə də hakimiyyətə gəlmək istəyənlər, müxaliflər, başqa marginal qüvvələr Azərbaycanda hər hansı bir hadisə baş verən kimi ondan istifadə edib özlərinə hardasa bir siyasi dividend qazanmağa çalışırlar. Bu, yaramaz, heç bir ölçüyə sığmayan bir hərəkədir. Bunun da Azərbaycanın siyasətinə heç bir təsiri olmaycaq. Hətta belə bir fikrə düşdülər ki, Ermənistan nümayəndələri COP29-a gəlsinlər və burada "əsirlərin", əslində hərbi canilərin məsələsini qaldırsınlar, bundan da bir şou kimi istifadə etsinlər. COP29 dünyanı maraqlandıran bir məsələdir, burada qaldırılacaq məsələlər dünyanı narahat edən, qayğılandıran, düşündürən mövzulardır. Dünyanın taleyini həll edən bir məsələ ilə bağlı böyük xərclər çəkilib tədbir həyata keçilir. Dünyanın hər yerindən dövlət adamıarı, böyük mütəxəssislər gəlib bu məsələni müzakirə edəcəklər. Bu, Azərbaycanın deyil, dünyanın məsələsidir. Dərk etmirlər ki, Azərbaycan xərc çəkib bu tədbiri keçirməklə dünyanın problemini gündəmə gətirib müzakirə etmək istəyir, Azərbaycan bir müzakirə platforması təklif edir. Ermənistandakı və ondan kənardakı qüvvələr heç bir əsası olmayan məlum məsələdən Azərbaycanın əleyhinə istifadə etməyə çalışır. Bu isə alınmayacaq" - deyə A.Nağı bildirdi.
İradə SARIYEVA
