Qulamhüseyn Əlibəyli: "Bu məsələdə təzyiq amilini də istisna etmək olmaz"
Ermənistan MDB-yə üzv dövlətlərin Xarici İşlər Nazirləri Şurasının toplantısında qəbul olunan iki bəyanatın müzakirəsinə qatılsa da, sonradan bu sənədləri imzalamaqdan imtina edib.
Bunu ənənəvi brifinqində Rusiya Xarici İşlər Nazirliyinin rəsmi nümayəndəsi Mariya Zaxarova bildirib.
O deyib ki, həmin bəyanatlar hazırlanarkən rəsmi İrəvanın təkliflərinin əksəriyyəti nəzərə alınıb. Zaxarova həmçinin rəsmi İrəvanın sözügedən sənədləri imzalamamasının səbəbləri barədə suala qısa cavab verib: "Bu sualı onların özünə ünvanlayın".
Qeyd edək ki, sözügedən qurumun son iclasında iştirak edən Ermənistanın nümayəndə heyəti "Avrasiya regionunda təhlükəsizliyin təmin olunmasının prinsipləri" və "Beynəlxalq Əlaqələrin qurulması zamanı təktərəfli tədbirlərin həyata keçirilməsi" barədə bəyanatları imzalamayıb.
Əgər bu qərarın müzakirəsində Ermənistan iştirak edibsə, son anda onu imzalamaqdan imtina etməsinin təbii səbəbləri var. Maraqlıdır, Ermənistana nə kimi təzyiqlər olub və haradan olub? O cümlədən, bu təzyiqlər nə məqsədlə edilib?
"Çünki Ermənistanın himayədarları olan Qərb Avrasiyanı Rusiyanın geosiyasi məkanı hesab edir"
Sözügedən məsələni "Bakı-Xəbər"ə şərh edən sabiq millət vəkili, hüquqşünas Qulamhüseyn Əlibəylinin fikrincə, burada Ermənistana birbaşa təzyiqlərin olması real görünmür: "Burada başqa səbəblər də ola bilər. Birinci növbədə Ermənistan Avrasiya məkanında təhlükəsizlik tədbirlərinin görülməsini, təhlükəsizlik mühitinin yaranmasını qəbul etmək istəmir. Çünki Azərbaycan və Türkiyəyə qarşı ərazi iddialarından əl çəkmək istəmir. Silahlanma prosesini, xüsusən də hücum silahlarının alınması prosesini genişləndirir. Xarici dövlətlərin hərbçilərini ərazisində yerləşdirir. Bütün bunlar o deməkdir ki, Ermənistan revanşizm əhval-ruhiyyəsindən əl çəkmək istəmir. Özündə müəyyən rıçaqlar saxlayır ki, gələcəkdə onlardan istifadə edə bilsin. Eyni zamanda birtərəfli qaydada Azərbaycana və Türkiyəyə qarşı müəyyən tədbirlərin həyata keçirilməsini istisna etmir. Ona görə də Avrasiya məkanında kollektiv təhlükəsizliklə bağlı olan prinsiplərlə razılaşmadığını bildirir. Düzdür, müzakirə prosesində iştirak edirlər. Çünki bu, Ermənistanın ənənəvi siyasətidir. Əvvəlcə hansısa məsələnin tərəfdarı olduğunu elan edir. Sonra isə həmin məsələnin qəbulundan imtina edir. Məsələn, hər gün bəyan edirlər ki, Azərbaycanla sülhə hazırıq və hər an imzalaya bilərik. Ancaq sonda elə hərəkətlər edirlər ki, nəticə əldə etmək mümkün olmur. Ancaq bu məsələdə təzyiq amilini də istisna etmək olmaz. Çünki Avrasiyanı Ermənistanın himayədarları olan Qərb Rusiyanın geosiyasi məkanı hesab edir. Ona görə də Ermənistanın həmin Rusiyanın məkanında hansısa proseslərdə iştirakını mümkün saymırlar. Bu baxımdan Ermənistana təzyiq göstərə bilərdilər ki, ikibaşlı oyun oyna, müzakirələrdə iştirak elə, amma son nəticədə həmin sənədləri imzalama. Bu da mahiyyət etibarilə Ermənistanın siyasəti ilə üst-üstə düşən bir məsələdir. Ona görə də hesab edirəm ki, bu iki amilin birləşməsi Ermənistan nümayəndə heyətinin həmin sənədi imzalamaqdan imtina etməsinə gətirib çıxarıb".
Vidadi ORDAHALLI
