Əli Orucov: "Almaniya hökuməti, Fransadan fərqli olaraq, Ermənistana hərtərəfli və açıq dəstək verməsə də, İrəvana simpatiyasının olduğunu da gizlədə bilmir"
BMT və onun tərəfdaşları Azərbaycanda Dayanıqlı İnkişaf Məqsədlərinə (DİM) nail olmaq istiqamətində çalışırlar. Bu tərəfdaşlıq nəticəsində Azərbaycan dayanıqlı inkişafın iqtisadi, sosial və ekoloji aspektlərini əhatə edən 17 DİM-i, 88 hədəfi və 119 göstəricini prioritetləşdirib.
2017 və 2019-cu illərdə iki "Könüllü Milli Hesabat"ını (KMH) təqdim etməklə Azərbaycan 2019-cu ilədək MDB məkanında ilk olaraq iki KMH təqdim edən ölkə olub.
Son beş il ərzində Azərbaycan 2030 Gündəliyinə nail olmaq istiqamətinə sadiqliyini nümayiş etdirib. 2016-cı ildə Azərbaycan Respublikasının Prezidenti, BMT-nin Azərbaycan hökumətinə göstərdiyi dəstəyin əlaqələndirilməsi üçün əsas tərəfdaş kimi fəaliyyət göstərən Dayanıqlı İnkişaf üzrə Milli Əlaqələndirmə Şurasının yaradılmasına dair fərman imzalayıb.
Eyni zamanda, Azərbaycan DİM-ləri milli səviyyədə sürətləndirmək üçün atıla biləcək konkret siyasət və proqramlaşdırma addımlarını əks etdirən MAPS (2030 Gündəliyi naminə aktuallaşdırma, sürətləndirmə və siyasətə dəstək) missiyasını həyata keçirən ilk ölkələrdən biri olub və ölkə təcrübəsini 2018-ci ildə keçirilən Dayanıqlı İnkişaf üzrə Bakı Forumunda təqdim edib. Digər məsələlərlə bərabər regional forum DİM-lərin inteqrasiyası və onların icrasını sürətləndirmək məqsədilə fəaliyyətləri müəyyən edən Bakı Prinsiplərinin qəbul edilməsi ilə yekunlaşıb. BMT-nin dəstəyi ilə interaktiv tablo, məlumatları vahid şəkildə toplayan, DİM-lərə doğru inkişafı real vaxt rejimində izləyən DİM-lər üzrə Milli Məlumat Portalı istifadəyə verilib. BMT heç kimin kənarda qalmamasına diqqət ayırmaqla keyfiyyətli statistika toplamaq üçün ölkənin statistika məlumatları sahəsində potensialını gücləndirmək üçün davamlı dəstək göstərməkdədir. BMT, həmçinin, DİM-ləri təşviq etmək istiqamətinə özəl sektor, media, parlament üzvləri və ictimaiyyət də daxil olmaqla müxtəlif qrupların cəlb edilməsi üçün xüsusi səylər göstərməkdədir.
Bütün bunlara rəğmən, görəsən Almaniya nədən Hamburq Dayanıqlı İnkişaf Forumuna Ermənistanı dəvət edib, amma Azərbaycan dəvət etməyib? Ermənistan BMT-nin heç bir dayanıqlı imkişaf məqsədlərinə nail ola bilməyib, bunun üçün beynəlxalq donorlardan yardım dilənir. Amma bununla belə, Avropa ölkələrinin bu qəbildən olan humanitar forumlarını "bəzəyir".
Məsələni şərh edən pokitoloq Əli Orucov bildirdi ki, son dövrlər Qərbin Azərbaycana münasibətinin Rusiyaya münasibətdə götürülməsi halı daha aydın görünməkdədir: "Doğrudur, əvvəllər də qeyri-obyektiv münasibətlərin şahidi olurduq. Amma 2020-ci ildə baş tutan İkinci Qarabağ müharibəsindən sonra Azərbaycanın ərazi bütövlüyünü və suverenliyini bərpa etməsi sanki Qərbin qəzəbinə səbəb olub.
Halbuki, Azərbaycan beynəlxalq hüquqa və prinsiplərə uyğun addım atıb. Eyni zamanda, həmin Qərb dəfələrlə bəyan edib ki, Cənubi Qafqazda sülhün bərqərar olması üçün öz dəstəyini ifadə edir.
Azərbaycan BMT-nin dayanıqlı inkişaf proqramında fəal iştirak edir, Dayanıqlı inkişaf üzrə Milli Əlaqələndirmə Şurası yaradılıb. Ancaq sözügedən konfransa Azərbaycanın dəvət edilməməsi ayrıseçkiliyin və qərəzliliyin daha bir əyani sübutudur.
Almaniya hökuməti, Fransadan fərqli olaraq, Ermənistana hərtərəfli və açıq dəstək verməsə də, İrəvana simpatiyasının olduğunu da gizlədə bilmir. Ermənistanın bu konfransda iştirakı müsbət heç nə verməyəcək. Lakin Azərbaycana qarşı ayrıseçkilik Qərbə olan inama sarsıdıcı zərbə vurur".
Dəniz NƏSİRLİ
