Bəhruz Quliyev: "Bu, dünyada bir presedent yaradır, ədalətsizliyin baş alıb getməsinə şərait yaradır"
Prezident İlham Əliyev oktyabrın 8-də Moskvada "Rossiya-1" televiziya kanalına müsahibə verib.
Müxbirin "Rusiya minlərlə sanksiyanın təzyiqi altında yaşayır. Sizcə, sanksiyalar siyasətinin prinsipcə hər hansı perspektivləri varmı" sualına cavab verərkən Prezident bildirib ki, sanksiyaların, ümumiyyətlə, mövcud olmağa haqqı yoxdur, xüsusilə də qeyri-qanuni olduqda və tamamilə əsassız və selektiv şəkildə tətbiq edildikdə: "Ona görə də biz istənilən sanksiyalara qəti şəkildə qarşıyıq və hesab edirəm ki, beynəlxalq ictimaiyyət öz mövqeyini vahid qaydada bildirməlidir. Biz milli səviyyədə özümüzə qarşı, həm də təkcə bizə deyil, tətbiq olunan bütün sanksiyalara münasibətdə bu mövqeyi ifadə edirik".
Prezident xatırladıb ki, bizə sanksiyalar 1992-ci ildə, Azərbaycan ərazilərinin Ermənistanın işğalı altında olduğu bir vaxtda ölkəmizin "Ermənistanı blokadada saxlaması" barədə qondarma ittihamla tətbiq edilib. Bu sanksiyalar 2001-ci ildə, ABŞ-ın öz yüklərini hava, quru və dəniz yolu ilə Azərbaycan ərazisindən Əfqanıstana tranzit daşımalı olduğu vaxt aradan qaldırılmışdı. Partiya mənsubiyyətindən asılı olmayaraq, Birləşmiş Ştatların Prezidenti ABŞ Əfqanıstandan qaçana qədər hər il bu sanksiyaları öz qərarı ilə ləğv edirdi. Bundan sonra bizə qarşı həmin sanksiyalar yenidən tətbiq olundu.
"ABŞ və onun tərəfdaşları sanksiya tətbiq edərkən öz maraqlarından çıxış edirlər və başqalarını da..."
Sözügedən məsələ ilə bağlı fikirlərini "Bakı-Xəbər"lə bölüşən "SƏS" Media Qrupunun rəhbəri, politoloq Bəhruz Quliyev hesab edir ki, Prezidentin arqumentləri əsaslıdır: "Cənab Prezidentin "Rossiya-1" televiziya kanalına müsahibəsində dediyi fikirlər əslində ABŞ-ın "sanksiya siyasəti"nin nə qədər məntiqsiz və perspektivsiz, həm də Amerikanın ədalətsiz bir oyunun içində olduğunu göstərir. Çünki Azərbaycanın əraziləri Ermənistan tərəfindən işğala məruz qaldığı bir dönəmdə, yəni 1992-ci ildə ABŞ tərəfindən sanksiya təzyiqinə məruz qalmışdıq. Ermənilərin torpaqlarımızı işğal etdiyi, insanlarımızı öldürüldüyü, əsir götürdüyü, soyqırımına məruz qoyduğu, mülkiyyətimizi talan etdiyi, azərbaycanlıları öz evində bütün hüquqlarından məhrum etdiyi halda işğalçı ölkə yox, işğala məruz qalan Azərbaycanın cəzalandırılması bütün normaların tapdanması, beynəlxalq qanunların heçə sayılmasıdır".
Politoloq B.Quliyev onu da qeyd etdi ki, Qərbin tətbiq etdiyi əksər sanksiyalar qanunsuzdur, heç bir reallığa söykənmir: "ABŞ və onun tərəfdaşları sanksiya tətbiq edərkən öz maraqlarından çıxış edirlər və başqalarını da buna qoşulmağa çağırırlar. Hansı ölkə Birləşmiş Ştatların milli maraqları üçün bunu etmək istəməsə həmin ölkələrə qarşı da cəza tədbirlərinin seçilməsi absurddur. Bu, dünyada bir presedent yaradır, ədalətsizliyin baş alıb getməsinə şərait yaradır. Əgər zamanında Qərb ölkələri, hələ ATƏT-in Minsk Qrupunun həmsədri olarkən Ermənistana işğalı durdurmaq tövsiyəsini versəydilər, vəziyyət indiki kimi olmazdı. ABŞ, Fransa və digər dövlətlərin vasitəçilik missiyaları həmişə müsbət nəticə əldə etməyə yetərli olardı. Amma nə Vaşinqton, nə də Paris haqqın tərəfində dura bildi. Bundan həvəslənən Ermənistan düz 30 il dünya ölkələrinin Azərbaycanın suveren ərazisi sayılan torpaqları işğal altında saxlaya bilməzdi, buna cəsarəti çatmazdı. Torpaqların azad edilməsi iki yolla mümkündür, ya danışıqlar masasında, ya da hərb meydanında. Qərb hərb yolunu istisna edərək Azərbaycana yalnız bir yol saxlayırdı, danışıqlar. Bu üsul isə əslində Ermənistana işğalı davam etdirmək fürsəti yaradırdı. BMT Təhlükəsizlik Şurasının 1993-cü ildə qəbul etdiyi 4 qətnamə isə havadan asılı vəziyyətdə idi. Faktiki olaraq, Ermənistan bu qətnamələri adi kağız parçası hesab etməklə dünya birliyinə meydan oxuyurdu. Qətnamələrin qəbul edildiyi tarixdən ötən 27 ildən sonra başlanan 44 günlük müharibə isə bütün suallara aydınlıq gətirdi, düşmən layiq olduğu, həm də beynəlxalq sənədlərə uyğun olaraq cəzasını aldı, torpaqlarımızdan qovuldu".
Vidadi ORDAHALLI
