İnsan hüuqları, demokratiya adı altında Qərbin ikili standartlar siyasətinin normaya çevrilməsi artıq bütün dünyada qəbul olunur. Ölkəmiz də bu halla ən çox üzləşənlər sırasında yer alır. Xüsusən də Azərbaycanın Qarabağı erməni işğalından azad etdikdən sonra Qərbin siyasi təzyiqləri ilə üzləşməsi müasir dünyada ikili standartlar siyasətinin geniş tətbiq olunduğunu açıq şəkildə ortaya çıxarır.
Bəlli həqiqətdir ki, Qərb Cənubi Qafqazda münaqişəli vəziyyətin davam etməsində və bununla da regiona müdaxilə edib qlobal siyasətdə dominant rolunda qalmaqda maraqlı olub. O səbəbdən Azərbaycanın ərazi bütövlüyünü bərpa etməsi Qərb üçün məqbul hesab olunmur. İkinci Qarabağ müharibəsində ərazi bütövlüyünü təmin edən və qalib gələn Azərbaycan Cənubi Qafqazda mövqeyini daha da gücləndirib. 44 gün ərzində 30 illik işğala son qoyan, müharibədən sonra düşmənin yerlə-yeksan etdiyi əraziləri yenidən quran ölkəmizin artan iqtisadi gücü, qüdrəti bəzi Qərb dövlətlərinin narahatlığına səbəb olur. İndi ölkəmizin əleyhinə qarayaxma kampaniyası aparan, həqiqətdən uzaq, yalan, iftira dolu bəyanatlar səsləndirməklə ikili standartlar nümayiş etdirən erməni havadarları Azərbaycanın beynəlxalq nüfuzuna kölgə salmağa çalışırlar. Sözsüz ki, əsassız ittihamlar, qəbul edilən qərəzli qətnamələr isə anti-Azərbaycan siyasəti yürüdənlərin özlərini nüfuzdan salır. Eyni zamanda onlara etimadı azaldır. Qərbin insan hüquqlarını, demokratiyanı, qanunun aliliyini əsas gətirib digər ölkələrin daxili işinə qarəşmasını Gürcüstan nümunəsində də görmək olar. Gürcüstan parlamenti tərəfindən "Xarici təsirin şəffaflığı haqqında" qanun layihəsinin qəbul edilməsi fonunda Tiflisin Qərblə münasibətlərində yeni gərginlik müşahidə olunmaqdadır. İndi bu qanuna görə Qərbdən Gürcüstana daha çox hədələr gəlir. Amma Gürcüstan hakimiyyəti Qərbin onun daxili işlərinə qarışmasını yolverilməz hesab edir. Gürcü politoloq Badri Naçkebiya bunu belə şərh edir: "Gürcüstanın qəbul etdiyi qanun bir sıra ölkələrdə, eləcə də ABŞ-da var. Bu qanunların adları müxtəlif olsa da məğzi eynidir. Lakin təəssüflər olsun ki, həmin dövlətlər özlərində də olan qanun layihəsini Gürcüstanın qəbul etməsindən narazıdırlar. Onlar bu düşüncə ilə yaşayırlar ki, bizə verilən icazə başqalarına olmamalıdır. Burada məntiq haradadır?! Niyə onlar bizə diqtə etməlidilər, biz də susub onların dediyini etməliyik?! Olmaz bu cür. Bu heç doğru addım deyil. Qərb, o cümlədən ABŞ bunu düşünməlidir". Politoloq vurğulayıb ki, Gürcüstan dövləti nə etdiyini, hansı addımı atdığını bilir: "Biz öz maraqlarımızı qoruyuruq. Avropa bizi yalnız vizasız gediş-gəliş və Aİ üzvlüyünə namizədliklə saxlaya bilir. Gürcüstanın da bundan ehtiyat etdiyini bilən Qərb, ABŞ yaranan vəziyyətdən maksimum istifadə edir. Amma düşünürəm ki, ortaq yol tapılmalıdır. Bu cür sərt çıxışlarla ortaq yol tapıla bilməz, yalnız əlaqələr korlanar". Sirr deyil ki, Qərbdə mənzillənən "insan haqları təşkilatları"nın indiki halda Gürcüstanı hədəf seçmələrinin səbəbi ölkədə insan haqları pozuntusu ilə bağlı deyil. İndiki təşviş oktyabr ayının 26-da keçiriləcək parlament seçkiləri ilə bağlıdır.
Xatırladaq ki, bu il oktyabrın 26-da qonşu Gürcüstanda parlament seçkiləri keçiriləcək. Baş nazir İrakli Kobaxidzenin dediyinə görə, Qərbin bəzi dairələri seçki məsələsində ölkədəki vəziyyəti qarışdırmaq niyyəti güdürlər. Söhbət məhz Qərbdən gedir. Qərb burada xalqın seçdiyi yox, özünə yaxın insanların hakimiyyətə gəlməsini istəyir. Bu fonda Gürcüstan parlamentinin sədri Şalva Papuaşvili ABŞ-ın Tiflisdəki səfirliyini ciddi tənqid edib. Onun sözlərinə görə, ABŞ səfirliyi Gürcüstanda dezinformasiya məkanına çevrilib. Papuaşvili vurğulayıb ki, ABŞ səfirliyinin yaydığı bütün xəbərlər dezinformasiya və ya manipulyasiya xarakteri daşıyır: "Bu isə, əlbəttə ki, bizim ümumi demokratik dəyərlərimizə ziddir. Gürcüstanın adı ingilis dilində Georgiadır. Lakin bu, Gürcüstanın ABŞ-ın ştatı olduğu anlamına gəlmir". Qeyd edək ki, Gürcüstanda seçkiqabağı kampaniyanın ən qızğın vaxtında ABŞ səfirliyinin sosial media səhifəsində "Gürcü Arzusu-Demokratik Gürcüstan" partiyası və onun qurucusu və fəxri sədri Bidzina İvanişviliyə tənqidi yanaşan banerlər görünüb. Gürcüstanın baş naziri İrakli Kobaxidze isə qeyd edir ki, indi hər şey Amerika tərəfdən asılıdır: "Münasibətlər belə davam etməməlidir, əks halda biz mövcud status-kvonu yenidən nəzərdən keçirməli olacağıq". Onun sözlərinə görə, Gürcüstan tərəfinin kommunikasiya və ünsiyyətlə bağlı heç bir problemi yoxdur: "Bizim ünsiyyət qurmaq qabiliyyətimiz var. Tiflisdə görüş baş tutub, eləcə də bir neçə gün əvvəl səfirlə görüş olub. Ünsiyyətlə bağlı heç bir problemimiz yoxdur. Biz bu mesajı Amerika tərəfi ilə çox aydın şəkildə paylaşdıq və bu, ictimaiyyətə də məlumdur. Dedik ki, münasibətlər belə davam etməməlidir, əks halda mövcud status-kvonu yenidən nəzərdən keçirməli olacağıq. Bu, bizim açıq mövqeyimizdir. İndi hər şey Amerika tərəfdən asılıdır". Tiflis şəhərinin meri, hakim "Gürcü Arzusu-Demokratik Gürcüstan" Partiyasının baş katibi Kaxa Kaladze isə qeyd edir: "Ölkəmizdə seçkilər yaxınlaşdıqca Avropa İttifaqının Gürcüstana təzyiqləri artır. Bunlardan biri də Gürcüstan vətəndaşlarının Avropa ölkələrinə vizasız gediş-gəlişinin ləğvi məsələsidir. Düşünürəm ki, bu, sadəcə olaraq, Aİ tərəfindən Gürcüstana qarşı adi bir şantajdır". Onun sözlərinə görə, seçkilər yaxınlaşdıqca, Qərbin "biz vizanın liberallaşdırılmasını ləğv edirik, filan prosesə başlayırıq, konkret addımlar atacağıq" kimi bəyanatları daha da aktivləşəcək: "Viza rejiminin liberallaşdırılmasını dayandırmaq bürokratik baxımdan çox çətindir". Bütün bunlar Qərbin artıq Gürcüstanı da şantaj etməkdy, ikili standartlardan çıxış etməkdə olduğunu göstərir. Qeyd edək ki, bu gün dünyada yaşanan qlobal xarakterli problemlərin böyük əksəriyyətinin əsasında Qərb tərəfindən beynəlxalq hüquq normalarının pozulması və ikili standartların tətbiqi hallarına yol verilməsi faktı durur. Elə Cənubi Qafqaz regionunun nümunəsində ikili standartlar siyasətinin necə ağır fəsadlara yol aça biləcəyini görmək olur. Bu hal isə Qərbin özünə ziyan vurur.
Samirə SƏFƏROVA
