Əli Orucov: "Azərbaycan prezidenti onları yaxşı tanıyır, onların iç üzünə bələddir"
Prezident İlham Əliyev Cəbrail rayonunda tikinti-bərpa işləri ilə tanış olarkən etdiyi çıxışında deyib ki, Amerika Konqresinin 60 ermənipərəst konqresmeni Azərbaycana növbəti sanksiyalar tətbiq etmək üçün Amerika hökumətinə müraciət edib:
"Səhər mən o müraciəti vərəqlədim, çirkin bir müraciətdir, bizim iradəmizə təsir edə bilməz. Ancaq bu, nəyi göstərir, bizə qarşı olan düşmənçilik siyasəti dayanmır. O müraciətə baxdıqda mən təxmin etdim ki, bunun müəllifi də, ünvanı da birdir. Çünki bunun ünvanı Amerika Dövlət Departamentinin Dövlət katibidir. Amma məndə bir zərrə qədər şübhə yoxdur ki, bu müraciət Amerika Dövlət Departamentində də yazılır. Yəni, özləri özlərinə məktub yazırlar, bizi hədələmək üçün, bizi ittiham etmək üçün. Axı, biz nə etmişik? Biz öz doğma torpaqlarımızı azad etmişik. Burada erməni yaşayıb? Yox, siz - Cəbrayılın sakinləri.
Müsahibimiz, politoloq Əli Orucova belə bir sual ünvanladıq ki, prezidentdə bu əminlik hardandır, "bunun ünvanı Amerika Dövlət Departamentinin Dövlət katibidir" deyir?
Siyasi şərhçi bildirdi ki, oktyabrın 3-də ABŞ-nin 58 qanunvericisinin Dövlət Katibi Entoni Blinkendən Azərbaycan Prezidenti İlham Əliyevə gələn ay keçiriləcək COP29 iqlim sammiti ərəfəsində insan hüquqları ilə bağlı təzyiq göstərməyi xahiş etməsi barədə müraciəti qərəzli və qəbuledilməzməzdir: "Həmin müraciətdə göstərilən xüsusatların da heç bir əsası yoxdur və Azərbaycana atılmış iftiradır.
Əvvəla qeyd etmək lazımdır ki, Azərbaycanda heç bir girov, hərbi əsir yoxdur. Həbsdə olanların da erməni millətindən olması onların dinc Azərbaycan xalqına qarşı törətdikləri qəddar və çoxsaylı cinayətlərə haqq qazandıra bilməz. Onların həyata keçirdikləri cinayət əməlləri həm də bəşəriyyətə qarşıdır və bu, istintaq orqanlarının obyektiv və hərtərəfli araşdırması ilə tam sübuta yetirilib. Azərbaycandan təhvil verilməsi tələb edilən cinayətkarlar yalnız azərbaycanlılara qarşı deyil, bəşəriyyətə qarşı görünməmiş cinayət törədib, onlar mütləq mühakimə edilməlidir. Hələ biz tələb etməliyik ki, Ermənistanda "qəhrəman" kimi təqdim edilən hərbi cinayətkarlar da ədalət məhkəməsi qarşısında mühakimə edilsinlər. Vitali Balasanyan, Seyran Ohanyan və onlarla həyatda qalan hərbi cinayətkarlar məsuliyyətə cəlb edilməli, cinayətkarlara ucaldılmış heykəllər dağıdılmalıdır.
Həmin konqresmenlərin müraciətindən bir daha aydın olur ki, Birləşmiş Ştatlar dünyada haqqın, ədalətin, beynəlxalq düzənin, sülhün və təhlükəsizliyin yanında deyil, müharibələrin, münaqişələrin, xaosun, gərginliyin və qarşıdurmaların tərəfdarıdır. Bəşəriyyətin rifahına, ekosistemin qorunmasına, xalqlar və millətlər arasında anlaşma və etimad mühitinin yaradılmasına qarşı çıxır. Azərbaycanda noyabrda keçiriləcək COP29-u öz çirkli məqsədlərini həyata keçirmək üçün fürsət bilən Birləşmiş Ştatların bir qrup konqresmeni əslində öz ölkələrini gözdən və nüfuzdan salırlar.
Onların sıralarında elələri var ki, beynəlxalq erməni diasporunun ştatlı işçilərinə çevrilib, özlərini erməni diasporunun pulundan asılı vəziyyətə salıb. Azərbaycan prezidenti onları yaxşı tanıyır, onların iç üzünə bələddir. Həmçinin ABŞ Dövlət Departamentinin Azərbaycana qarşı hansı mövqedə olduğunu da, orda məsul vəzifədə çalışan bəzi rəsmilərin kimliyi barədə də kifayət qədər məlumatlıdır.
Dövlət başçısının Cəbrayıl rayonunda tikinti işləri ilə tanış olarkən etdiyi çıxışında da söylədiyi kimi, Azərbaycana qarşı düşmənçilik siyasəti fayda verməyəcək və bu hal, əksinə, Birləşmiş Ştatlara ziyan gətirəcək. Təəssüf ki, ABŞ-nin Azərbaycana qarşı təzyiqləri və qarayaxması birinci dəfə deyil. Son da olmayacaq. Biz dövlət olaraq öz yolumuzu özümüzü müəyyən edib, özümüz öz maraqlarımızı qorumalıyıq"
Dəniz NƏSİRLİ
