Azər Həsrət: "Yeni yanaşma sərgiləməsinə səbəb ola bilər"
Avropa Parlamenti Cənubi Qafqaz ölkələri ilə əlaqələr üzrə nümayəndə heyətinin sədrini və iki sədr müavinini seçib. Fransa parlamentinin deputatı Natali Loiseau və polşalı deputat Mixal Şterba nümayəndə heyətinin vitse-prezidentləri seçiliblər. Cənubi Qafqaz nümayəndə heyətinin rəhbəri vəzifəsini isə Latviyadan olan Nil Uşakov tutub.
O, regionun bir çox münaqişələrə səhnə olduğunu qeyd edərək, hazırda Aİ ilə münasibətlərə birbaşa təsir edən yeni geosiyasi mühitin yarandığını vurğulayıb. "Cənubi Qafqaz strateji və iqtisadi potensiala malikdir və təhlükəsizlik, qanunun aliliyi və ictimai azadlıqlar sahələrində dialoq və əməkdaşlığı gücləndirmək vacibdir. Mən sizinlə Cənubi Qafqaz üçün daha firavan gələcək üçün çalışacağam", - deyə Nil Uşakov deyib.
Avropa Parlamentinin Cənubi Qafqazla əlaqələr üzrə nümayəndəliyinin bu yeni sədri Azərbaycanla münasibətlərdə, Avropa Parlamentinin Azərbaycana münasibətində hansısa bir pozitiv dəyişikliyə səbəb olacaqmı? Bu yeni kadr təyinatından sonra pozitiv dəyişiklik gözlənilə bilərmi? Yoxsa hər şey əvvəlki kimi Fransanın diqtəsi ilə gedəcək?
"Çox intensiv əlaqələr quraraq, daimi təmasda olaraq, onları faktlarla təmin edərək özümüzə münasibətdə obyektiv yanaşmalarına nail ola bilərik"
Siyasi şərhçi Azər Həsrət "Bakı-Xəbər"ə "yeni kadrların bu vəzifələrə gəlməsi, əlbəttə, yeni yanaşma sərgiləməsinə səbəb ola bilər. Uşakovun Güney Qafqazla bağlı rəhbər seçilməsi bizə nə verəcək? Bu barədə hələ mən məlumatlı deyiləm. Niyə? Açığını deyim ki, Azərbaycanın xüsusilə də xarici siyasətində müxtəlif deputatların, konqresmenlərin, senatorların, ayrı-ayrı ölkələrin parlament nümayəndələrinin səsini, sözünü çox eşitmişik. Əleyhimizə olanlar da, lehimizə danışanlar da olub. Açığını deyim, Uşakovun Güney Qafqazla, özəlliklə də Azərbaycanla bağlı fəallığını nəsə mən müşahidə etməmişəm. Özüm üçün deyirəm ki, bu bizim üçün yeni bir isim, yeni bir addır. Ona görə də indidən onun necə davranacağı haqqında məlumat vermək olmaz" - deyə bildirdi.
A.Həsrətin sözlərinə görə, amma açıqlanan məlumatlardan belə başa düşmək olar ki, onun ilk açıqlaması kifayət qədər neytraldır, tərəf tutmur. "Güney Qafqazın ümumilikdə Avropaya inteqrasiyasına yardımçı olmağa çalışacağına bənzəyir. Əlbəttə, bu, məsələnin başlanğıc nöqtəsidir. Digər tərəfdən, Azərbaycanın özünün davranışları ilə, özəlliklə də Avropa Parlamenti ilə işləyən bizim deputat qruplarımız, yaxud da ki, diplomatlarımız, hətta deyərdim, vətəndaş cəmiyyəti institutunun nümayəndələri, mediamız bu məsələdə müsbət meyllərə nail ola bilərlər. Yəni Avropa Parlamentinin seçdiyi adamları biz dəyişə bilmərik, onların necə işləməsini də biz müəyyən etmirik. Amma çox intensiv əlaqələr quraraq, daimi təmasda olaraq onları faktlarla təmin edərək özümüzə münasibətdə obyektiv yanaşmalarına nail ola bilərik. Düşünürəm, biz özümüz fəal olmalıyıq ki, gələcəkdə əvvəlki illərdə yaşadığımız xoşagəlməzliklər yaşanmasın. Yəni nə etməliyik? İşləməliyik. Bu baxımdan düşünürəm ki, Uşakov soyadlı deputat, yaxud da bu qrupun rəhbəri Azərbaycana qarşı hansı münasibəti sərgiləyəcək sualının cavabı həm də bizim davranışlarımızdan asılıdır. Yəni biz fəal şəkildə onunla işləməliyik. Elə etməliyik ki, bizə qarşı olanlar, özəlliklə də erməni təbliğatı üstünlük əldə edə bilməsin. Biz ümumiyyətlə onların neytral davranmasına nail olsaq bizə yetəcək. Demirik ki, bizim tərəfimizdə olsunlar, sadəcə biz istəyirik ki, onlar neytral olsunlar. Neytrallıq elə bizim haqqımızın tanınması deməkdir. Çünki biz haqlı tərəfik. Problem görmürəm. Sadəcə, işləmək lazımdır" - deyə A.Həsrət bildirdi.
İradə SARIYEVA
