Bu ölkə Ermənistanı keyfiyyətsiz silah poliqonuna çevirir...
Hindistanın hərbi sənaye kompleksindən yazan "Indian Defense Research Wing" saytı bildirir ki, Hindistan istehsalı "Akash S1" raket kompleksləri Ermənistana bu ilin sonunadək çatdırılacaq. Qeyd olunur ki, "Akash S1" kompleksləri qırıcı təyyarələrdən, qanadlı raketlərdən və dronlardan müdafiə funksiyasına malikdir.
Bu da xəbər verilir ki, Ermənistan ümumi dəyəri təxminən 720 milyon dollar olan 15 "Akash" kompleksini 2022-ci ildə sifariş edib.
Rusiyanın TASS dövlət xəbər agentliyi Hindistanın Maliyyə Nazirliyinə istinadla Ermənistanın Hindistanın ən böyük silah müştərisi olduğunu bildirir. Ermənistan Hindistandan "Pinaka" raket-zenit sistemləri almağı da planlaşdırır. Onu da qeyd edək ki, 2020-ci il müharibəsindən sonra Hindistanla Ermənistan arasında ikitərəfli hərbi əməkdaşlıq xeyli genişlənib. Bu fonda Hindistan Ermənistanı təkcə "Pinaka" raket sistemləri ilə deyil, həm də haubitsalar, tank əleyhinə raketlər və antidron qurğuları ilə təchiz etməlidir. Hindistan mediası ötən sentyabrda yazmışdı ki, növbəti üç ildə Ermənistana 90 ədəd haubitsa topları veriləcək. Onu da qeyd edək ki, bu ilin may ayında İrəvanda Hindistanın hərbi rəsmilərinin iştirakı ilə ilk Hindistan-Ermənistan müdafiə məsləhətləşmələri keçirilib. Tərəflərin yaratdığı "işçi qrup" 2024 və 2025-ci illər üçün birgə hərəkət planını hazırlayır. İrəvanla Nyu Dehli arasında hərbi əməkdaşlığa təkcə silah təchizatı deyil, habelə hərbi təlimlər, o cümlədən taktiki məşqlər və təcrübə mübadiləsi daxildir. Burada onu da xatırladaq ki, uzun illər ərzində Rusiya Ermənistanın əsas silah təchizatçısı olub. Lakin Rusiyanın başı Ukraynadakı müharibəyə qarışdığı bir vaxtda Ermənistan başqa silah satıcılarının axtarışına başlayıb. Bundan başqa, Ermənistan rəsmiləri 44 günlük müharibədə həm də Moskvanı, mövcud kontraktlara baxmayaraq, İrəvana lazımi qədər silah verməməkdə ittiham edir. 2022-ci ilin sentyabrından bəri Ermənistan Hindistanla azı 400 milyon dollarlıq müdafiə kontraktları imzalayıb. Ermənistan ordusunun Hindistandan artilleriya sistemləri, tank əleyhinə raketlər, antidron avadanlığı alacağı bildirilir. Daha bir vacin nüans bundan ibarətdir ki, Hindistanın Ermənistana satdığı eksperimental xarakterli, heç bir müharibə və döyüş sınağından çıxmamış silahların əksəriyyəti, o cümlədən "Akash" hava hücumundan müdafiə kompleksi, "ATAGS"haubitsaları, "MArG 1552 özüyeriyən haubitsalarının keyfiyyəti və dəqiqliyi ciddi sual altındadır. Ümumiyyətlə, Hindistan Ermənistanı bu silah və texnikaların sınaqdan keçiriləcəyi poliqon gözündə görür. Rəsmi Dehli Ermənistandan yalnız öz silahlarını reklam etmək, iri silah ixracatçısı statusu əldə etmək üçün vasitə kimi yararlanır. Təbii ki, hindistanlılar reklamla yanaşı, öz maliyyə maraqlarını da unutmur.
Hakimiyyətə bağlı deputat Andranik Köçəryan isə bildirir ki, rəsmi İrəvan hər yerdə silah axtarır: "Ermənistan bütün ölkələrdə potensial olaraq ehtiyaclarını ödəyə biləcək silahlar axtarır. Bu ölkələr arasında Hindistan da var. Ermənistan bu silahı ölkəyə çatdırmaq üçün bütün mümkün və qeyri-mümkün vasitə və mexanizmlərdən istifadə edir". Ermənistan parlamentinin müdafiə və təhlükəsizlik məsələləri üzrə daimi komissiyasının sədr müavini Armen Xaçatryan isə bildirir: "Bu gün Ermənistanın təkcə Hindistan və Fransa ilə deyil, həm də hərbi-texniki sahədə ciddi irəliləyişə nail olan digər ölkələrlə hərbi-texniki əməkdaşlıq və silah alınması ilə bağlı çox ciddi razılaşmaları var". Onun sözlərinə görə, müharibədən sonra kifayət qədər çətin vəziyyət var idi, silahların əldə edilməsi və hərbi-texniki əməkdaşlıq sahəsində boşluq var idi, lakin bu məsələ təəccüblü dərəcədə qısa müddətdə öz həllini tapıb: "Hər halda, artıq məlum olduğu kimi, bu gün bizim Hindistan, Fransa ilə hərbi-texniki əməkdaşlıq, silah alınması ilə bağlı ciddi razılaşmalarımız var. Deməliyik ki, bizim böyük dövlətlər olan və hərbi-texniki sahədə ciddi irəliləyişlər əldə etmiş dövlətlərlə də müqavilələrimiz var. Təbii ki, bu barədə danışmayacağıq, deməyəcəyik, amma bu, təkcə Fransa və Hindistan deyil". Görünən odur ki, ki, Ermənistanı silahlandırmaqla, Hindistan bu bölgədə gərginliyin davam etməsinə xidmət etmiş olacaq, sülhü, təhlükəsizliyi təhdid edəcək. xatırladaq ki, prezident İlham Əliyev ötən ilin mayında Hindistanın ölkəmizə yeni təyin olunan fövqəladə və səlahiyyətli səfiri Sridharan Madhusudhananın etimadnaməsini qəbul edərkən də Hindistanın Ermənistana hərbi yardımından bəhs edərək, sürətlə silahlanmanın yeni təhlükələr yaratdığını vurğulayıb. Dövlət başçısı qeyd edib ki, doğrudan da Ermənistan Azərbaycanla sülh istəyirsə, onda nə üçün 100 milyonlarla dollar dəyərində silah alır? Azərbaycan Prezidenti qeyd edib ki, bu siyasət bölgə üçün yeni təhdidlərə gətirib çıxara bilər. İndilikdə Azərbaycan Ermənistanın silah sövdələşmələrini diqqətlə izləyir və buna uyğun əks-addımlar atır. Həm də Ermənistan və Hindistan bilməlidir ki, Azərbaycanın müstəqilliyini tanıyan ilk üç ölkədən biri, Ermənistanla heç bir əlaqə, diplomatik münasibət qurmayan Pakistanla Azərbaycan hərb sənayesində sıx əməkdaşlıq edir və Pakistan silahları Hindistanla müqayisədə dəfələrlə üstündür.
Tahir TAĞIYEV
