Bəlli olduğu kimi, növbədənkənar parlament seçkiləri ilə əlaqədar artıq seçkiqabağı təşviqat kampaniyasına başlanılıb. Proses avqustun 31-i saat 08:00-a kimi davam edəcək.
Xatırladaq ki, seçkiqabağı təşviqatın aparılması qeydə alınmış namizədlər, onların səlahiyyətli nümayəndələri və vəkil edilmiş şəxsləri, namizədi qeydə alınmış siyasi partiyalar, siyasi partiyaların blokları, onların səlahiyyətli nümayəndələri və vəkil edilmiş şəxsləri tərəfindən həyata keçirilə bilər.
Təşviqat üçün ölkə üzrə 3 259 açıq, 1 854 qapalı yer ayrılıb. Milli Məclisə növbədənkənar seçkilərdə iştirak üçün 1030 nəfərdən çox şəxsin deputatlığa namizədliyi qeydə alınıb. Ekspertlər qeyd edir ki, hakim Yeni Azərbaycan Partiyasının İdarə Heyətinin seçkilərdəki namizədlərini açıqlamasından sonra bir sıra dairələr üzrə kəskin mübarizənin olacağı gözlənilir. Xatırladaq ki, Yeni Azərbaycan Partiyası tərəfindən deputatlığa namizədliyi irəli sürülmüş şəxslər dairə seçki komissiyaları tərəfindən qeydə alınıb. Bundan başqa, bəzi dairələrdə tanınmış şəxslərin mübarizəsi də məsələni daha maraqlı edir. Məsələn, Respublikaçı Alternativ Partiyasının sədri İlqar Məmmədov 22 saylı Nəsimi-Yasamal seçki dairəsində Demokratik İslahatlar Partiyasının sədri Asim Mollazadə ilə mübarizə aparacaq. Yeni Azərbaycan Partiyasının buradakı namizədi isə Xaliq Hüseynovdur. 26 saylı dairədə Fazil Mustafa ilə YAP-dan Afaq Hacıyeva, 36 saylı dairədə Qüdrət Həsənquliyevlə YAP-dan Nərminə Hacıyeva, 73 saylı dairədə sabiq vitse-spiker Fəzail İbrahimli ilə YAP-dan Aytən Əliyeva deputat yarışına qatılacaq. VI çağırış Milli Məclisin İnsan hüquqları komitəsinin sədri, Sosial Tədqiqatlar Mərkəzinin rəhbəri, Prezident yanında Əfv Məsələləri Komissiyasının üzvü Zahid Oruc 33 saylı Xətai birinci seçki dairəsində namizədliyini irəli sürdüyünü bildirib. Sözügedən dairədən daha bir tanınmış sima – iqtisadçı ekspert, ReAL İdarə Heyətinin üzvü Natiq Cəfərli də namizədliyini irəli sürüb. Jurnalist Fuad Abbasov da 33 saylı seçki dairəsində mübarizə aparanlar sırasındaıdr. Bu dairənin 4 ildən çoxdur ki, deputatı yoxdur. Xatırladaq ki, 2020-ci il parlament seçkilərində 33 saylı Xətai Birinci Seçki dairəsindən daxil olan şikayətlərə əsasında orada nəticələr ləğv olunmuşdu. Daha öncə həmin dairədə YAP-ın namizədi Hüseynbala Mirələmov lider namizəd elan edilmişdi. Daha bir maraqlı dairə Milli Cəbhə Partiyasının sədri Razi Nurullayevin namizədliyini irəli sürdüyü 81 saylı İmişli seçki dairəsidir. Sözügedən dairədə YAP-ın namizədi Məmmədov İsrafildir. Klassik Xalq Cəbhəsi Partiyasının sədri Mirhahmud Mirəlioğlu isə 43 saylı Sumqayıt İkinci seçki dairəsindən namizədliyini irəli sürüb. YAP-ın bu dairədən namizədi Tahir Mirkişilidir. Sonuncu YAP-ın aparıcı simalarından biridir və tanınmış şəxsdir.
Azad Vətən Partiyasının sədri Akif Nağı 124 saylı Şuşa-Ağdam-Xocavənd seçki dairəsindən namizədliyini irəli sürüb. Həmin dairədən YAP-ın namizədi isə Leyla Babışovadır. Azərbaycan Xalq Partiyasının sədri Pənah Hüseyn 68 saylı Sabirabad-Şirvan seçki dairəsindən seçkilərə qatılır. YAP-ın həmin seçki dairəsindəki namizədi isə Kamal Cəfərovdur. O, Milli Məclisin VI çağırış deputatı olub, YAP İdarə Heyətinin üzvüdür. Gələcək Azərbaycan Partiyasının sədri Ağasif Şakiroğlunun 8 saylı Binəqədi birinci seçki dairəsindən deputatlığa namizədliyi qeydə alınıb. Həmin dairədən YAP Həcər Mirzəyevanın, Azərbaycan Ümid Partiyası isə sədr müavini Tamilla Qulaminin namizədliyini irəli sürüb. Həmçinin, Milli Məclisin VI çağırış deputatı, bitərəf namizəd Azay Quliyev də həmin dairədə seçilmək uğrunda mübarizə aparacaq. AĞ Partiyanın başqanı Tural Abbaslı 21 saylı Nəsimi-Binəqədi seçki dairəsindən namizədliyini verib. YAP-ın bu dairədəki namizədi isə yenə Məlahət İbrahimqızıdır. O, ikinci, üçüncü, dördüncü, beşinci və altıncı çağırış Milli Məclisin deputatı olub. Ədalət, Hüquq, Demokratiya Partiyasının sədri Qüdrət Həsənquliyevin namizədliyi 36 saylı Xətai-Suraxanı Seçki Dairəsindən irəli sürülüb. YAP-ın namizədi Hacıyeva Nərminə Aslan qızı bu dairədə onun rəqibi olacaq.
Ədalət, Hüquq, Demokratiya partiyasının sədr müavini, siyasi şərhçi Elçin Mirzəbəylinin namizədliyi isə 90 saylı Ağsu seçki dairəsində qeydə alınıb. Qeyd edək ki, həmin dairədən deputat Vəhdət Partiyasının sədri Tahir Kərimli olub. O, parlament seçkilərində iştirak etməyəcəyini açıqlayıb. YAP-ın namizədi Əli Hüseynovdur. O, ikinci, üçüncü, dördüncü, beşinci və altıncı çağırış Milli Məclisin deputatı olub. Altıncı çağırış Milli Məclisin birinci vitse-spikeri vəzifəsini tutub. Azərbaycan Demokratik Maarifçilik Partiyasının sədri Elşən Musayev 116 saylı Qəbələ seçki dairəsindən namizəd olur. Hakim partiyanın buradakı namizədi Ədilə Tağıyevadır. YAP tərəfindən 2 saylı Şərur-Kəngərli seçki dairəsindən namizədliyini vermis Siyavuş Novruzovu, 4 saylı Naxçıvan şəhər seçki dairəsindən namizədliyini vermis Eldar İbrahimovu, 34 saylı Xətai ikinci dairəsindən namizədliyini vermis Mixail Zabelini, 125 saylı Zəngilan – Qubadlı seçii dairəsindən namizədliyini vermiş İmamverdi İsmayılovu da rəqibləri tərəfindən məğlub etmək asan məsələ deyil. Onu da qeyd edək ki, 25 siyasi partiyadan 459 nəfərin namizədliyi verilib, onlardan 305-i qeydə alınıb. Bütün bunlar seçkilərdə kəskin rəqabətin olacağını göstərir.
Tahir TAĞIYEV
