Mübariz Göyüşlü: "Erməni mediasının irəli sürdüyü iddiaların heç bir əsası yoxdur"
Erməni mətbuatı öz səhv ənənəsini davam etdirərək cinayətkarları, separatçıları, əli Azərbaycan xalqının qanına batmış şəxsləri, ərazilərimizdə bölücülüklə, separatizmlə məşğul olanları "qəhrəman", "günahsız" kimi qələmə verir.
Vaxtilə Qarabağda mövcud olmuş separatçı dəstənin başçılarının, "rəhbərliyinin", Arayik Arutyunyan, sabiq "dövlət naziri" Ruben Vardanyan və qondarma "özünümüdafiə ordusu"nun keçmiş komandiri Levon Mnatsakanyanın Bakıda həbsdə saxlanılmasına min cür saxta don geydirməyə çalışırlar.
Erməni mətbu orqanı "Joqovurd" iddia edir ki, guya sözügedən separatçıların səhhəti ağırlaşıb. Guya Levon Mnatsakanyanın şəkər xəstəliyi ilə bağlı ciddi problemləri var və həbsxana şəraitində xəstəlik daha da ağırlaşıb, Bako Saakyanın da qan təzyiqi və ürək-damar sistemində ciddi problemləri mövcuddur. "Ruben Vardanyanın ailəsi aprel ayında onun aclıq aksiyası keçirdiyini elan edərək, bütün erməni məhbusların dərhal azad edilməsini tələb edib. Onun da səhhəti aclıq aksiyası və saxlanma şəraitinin pis olması səbəbindən pisləşib".
Erməni nəşrinin yazdığından belə çıxır ki, guya R.Vardanyan apreldən indiyədək "aclıq aksiyası" keçirir. Nəşr yazır ki, A. Arutyunyan isə qohumları ilə söhbəti zamanı açıq şəkildə bildirib ki, onların qayıdışlarından ümidlərini kəsməli və onlarsız yaşamalıdırlar.
Bu da yeni erməni ssenarisidir. Onları həbsxanadan, ədalət məhkəməsinin qarşısına çıxmaqdan xilas etmək üçün hər cür hiyləgərliyə, uydurmalara əl atırlar. Necə olur, həbsə girənə qədər bunlar hər cür separatçı bəyanatlar verirdilər, yüz cür cinayət törədirdilər, onda qan təzyiqləri, şəkərləri "kəlləçarxa qalxmırdı" indi onlarda bu xəstəliklər peyda olub? Bir məqamı da xatırladaq ki, Beynəlxalq Qırmızı Xaç Komitəsinin Bakı ofisinin nümayəndələri separatçılara baş çəkir və onlar dəfələrlə bəyan ediblər ki, sözügedən şəxslərin nə saxlanma şəraitlərindən, nə də başqa məsələlər barədə şikayətləri var. Amma indi erməni mediası faciəvi obraz yaratmaqla məşğuldur ki, guya onlar Bakıda pis vəziyyətdədirlər, guya onlar burada "qanunsuz" saxlanılır. Bəs onların törətdikləri cinayətləri erməni mediası niyə bir dəfə dilə gətirmir, nə üçün yazmır ki, bu adamlar insanlıq əleyhinə müharibə cinayətlərinin iştirakçıları, təşkilatçıları olublar, Azərbaycanın ərazi bütövlüyünə qarşı cinayət törədiblər?
"...Müharibə canilərinin, separatçıların azadlığa buraxılmasına, Azərbaycandan çıxarılmasına nail olmaq istəyirlər"
Müasir İnkişaf Birliyinin sədri, siyasi şərhçi Mübariz Göyüşlü "Bakı-Xəbər"ə şərhində bildirdi ki, erməni mətbuatı yalnız həbsdə olan separatçılarla bağlı deyil, könüllü şəkildə Qarabağdan köçüb getmiş ermənilərin yenidən ora qaytarılması ilə bağlı da absurd fikirlərlə çıxış edir. "Ermənilər və onların havadarları tez-tez bu iddialarla çıxış edirlər. Əslində, bu şəxslər müharibə caniləridir, Azərbaycan xalqına və dövlətinə qarşı hərbi cinayətlər törədiblər. Bunlar dövləti və müharibə cinayətində iştirak etmiş şəxslərdir. Azərbaycan onlara münasibətdə çox humanist davranır, onların məhkəməsinin keçirilməsini həyata keçirir. Bu separatçıların vəziyyəti, saxlanma şəraiti yaxşıdır. Onlara qarşı insan ləyaqətini alçaldan hər hansı məsələ yoxdur. Amma biz bunu ermənilərdə görməmişik, onlar azərbaycanlılara qarşı çox qəddar davranışlar göstəriblər, amansız münasibətlər sərgiləyiblər.
Erməni mediasının irəli sürdüyü iddiaların heç bir əsası yoxdur. Bunlar əslində Azərbaycan xalqının, Azərbaycan dövlətinin beynəlxalq imicinə qarşı təbliğatdır. Bu cür absurd məsələləri gündəmə gətirməklə müharibə canilərinin, separatçıların azadlığa buraxılmasına, Azərbaycandan çıxarılmasına nail olmaq istəyirlər. Məqsədləri odur ki, onlar azad olunsunlar və törətdikləri cinayətlərə görə ədalət məhkəməsi qarşısında cavab verməsinlər. Amma bu mümkünsüzdür, cinayətkarlar hər şeyə görə cavab verəcəklər"-deyə M.Göyüşlü bildirdi.
M.Göyüşlü hesab edir ki, separatçılar mütləq şəkildə öz layiqli cəzalarını alacaqlar, bütün bu iddialar da, aparılan kampaniyalar da iflasa uğrayacaq. "Onların səsləndirdikləri fikirlərin hamısı yalandır, gerçəklikdən uzaqdır. Əgər o canilərin hər hansı bir xəstəlikləri varsa, onlara lazımı səviyyədə diqqət göstərlir. Şəxsən mən bu canilərin çox ağır bir şəkildə cəzalandırılmanı haqq etdiklərini düşünürəm. Bunlar azərbaycanlılara qarşı o qədər qəddar, amansız cinayətlər törədiblər ki, bəlkə də dünyada bunun bənzəri yoxdur. Törətdikləri cinayətlər əsas verir ki, ümumiyyətlə onlar sorğu-sualsız, məhkəməsiz edam edilsinlər. Azərbaycan xalqı onlardan o qədər zülmlər görüb ki, bu separatçı "liderlərin" güllənməsinə belə narazılıq etməz. Amma Azərbaycan dövləti çox humanist davranıb məhkəmə qaydası ilə onları yarğılayır. Hesab edirəm ki, ədalət qələbə çalacaq, onlar layiqli cəzalarına çatacaqlar"-deyə M.Göyüşlü vurğuladı.
İradə SARIYEVA
