Ukrayna müharibəsinin mahiyyəti dəyişdi - rus şəhərlərində döyüş gedir, Qərb məmnundur...
Qulamhüseyn Əlibəyli: "Bu, müharibədə yeni bir mərhələnin başlanğıcı kimi qiymətləndirilə bilər"
Son günlər Rusiya–Ukrayna müharibəsində sensasiyalı hadisələr baş verir. Ukraynalı hərbçilərin Kurska qəfil hücumu böyük rezonansa səbəb olub. Rusiya Silahlı Qüvvələrinin aramsız hücum əməliyyatları fonunda Ukrayna hərbçilərinin Rusiyanın ərazisinə daxil olması gözlənilməz idi.
Avqustun 6-da səhər saatlarında Ukrayna Silahlı Qüvvələrinin təxminən 1000 nəfərdən ibarət bölmələri Kursk vilayətinə hücum edib. Mediada və sosial şəbəkələrdə yayılan ilkin məlumatlara görə, ukraynalılar sərhəddən vilayətin mərkəzinə doğru 12 kilometrə qədər irəliləyərək, 10 yaşayış məntəqəsini ələ keçiriblər. Ən son məlumatlara görə, Rusiyanın Kursk vilayətindəki Sudja şəhərinin bir hissəsi Ukrayna ordusunun nəzarətindədir.
Bütün bunlarla yanaşı, Ukrayna qoşunlarının Kurska daxil olması fonunda Qərbdən Kiyevə dəstək bəyanatları gəlir. İstər ABŞ, istərsə də Avropa İttifaqı rəsmiləri açıq deyirlər ki, Ukraynaya dəstək artırılacaq. Yəni Ukrayna daha irəli getsin. O baxımdan nə baş verir? Ümumən Kursk döyüşləri nə vəd edir?
"Görünən odur ki, Qərbin silah yardımı artacaq, müharibə daha da şiddətlənəcək"
Sözügedən məsələyə aydınlıq gətirən sabiq millət vəkili, hüquqşünas Qulamhüseyn Əlibəyli "Bakı-Xəbər"ə açıqlamasında bununla bağlı bir sıra məqamlara toxundu: "Ukrayna ordusunun Kursk vilayətinə daxil olması və bir sıra uğurlar əldə etməsi çox ciddi nəticədir. Bu, indiyə qədər Rusiya-Ukrayna müharibəsində yeni bir mərhələnin başlanğıcı kimi qiymətləndirilə bilər. Nəyə görə? İlk növbədə ona görə ki, Rusiya birinci Ukraynaya hücum edib. Həmçinin Ukrayna ərazisinin böyük hissəsini işğal edib. Döyüşlər indiyə qədər Ukrayna ərazisində gedirdi. Ukraynanın yaşayış məntəqələri viran qoyulub. Ukrayna ordusu öz ərazilərini azad etmək uğrunda vuruşurdu. İndi Kurska hücum isə onu göstərir ki, Ukrayna təkcə öz əraziləri uğrunda vuruşmur. Rusiyaya hücum etməklə balans yaratmaq istəyir. Bunun vasitəsi ilə Rusiya qüvvələrini həmin istiqamətə çəkməklə, Pokrov istiqamətində vəziyyəti stabillşdirməyə çalışır. Çünki həmin istiqamətdə vəziyyət çox ağır idi. Rusiya Ordusu addım-addım irəliləyirdi. Ona görə də bu, Ukraynanın strateji üstünlüyü kimi qiymətləndirilməlidir. Qərbə gəldikdə isə, onlar istəmirlər ki, Rusiya Ukraynanı tam işğal etsin. Ancaq Qərb o qədər silah verir ki, Ukrayna Rusiya təcavüzünü dayandırsın. Tez bir zamanda Ukraynanın öz ərazi bütövlüyünü bərpa etməsində maraqlı deyillər. O üzdən, silahları az-az verirlər. Çünki Qərb istəyir ki, bu müharibədə həm Rusiya, həm də Ukrayna kifayət qədər zəifləsin. Rusiyanı tükəndirsinlər. Düzdür, Ukraynaya daha çox yardım göstərirlər, amma buna məcburdular. Əks təqdirdə Putun Ukraynanı götürəndən sonra digər ölkələri təhdid edəcək. Bu isə Qərbə təhlükədir. Bu üzdən hərbi tarazılığı qorumağa cəhd edirlər. Görünən odur ki, Qərbin silah yardımı artacaq, müharibə daha da şiddətlənəcək. Proseslərin buna doğru gedəcəyi gözlənilir. Strateji məqsəd Rusiyanı tükəndirməkdir".
Vidadi ORDAHALLI
