Ramil Məmmədli: "Bu fəaliyyət nəinki İsrailin qorunmasına, bütövlükdə İrana qarşı yönəlib"
Xəbər veildiyi kimi, avqustun 2 və 3-də ABŞ-ın Rumıniya və Yaxın Şərqdəki hərbi bazalarından Ermənistanın Zvartnots hava limanına doğru 2 hərbi təyyarə qalxıb. ABŞ Silahlı Qüvvələrinə məxsus "Boinq C-17" hərbi yük təyyarəsi ilə şəxsi heyət hərbi yüklərlə birlikdə Zvartnots hava limanına gəlib.
Aprelin 5-də Brüsseldə imzalanmış sənədin hərbi əməkdaşlığı nəzərdə tutan məxfi hissəsinə uyğun olaraq, Ermənistan silahlı qüvvələrinə ABŞ istehsalı olan yeni nəsil silahlar gətirilib.
O da məlum olub ki, iki təyyarədən biri İran ərazisindən atılan raketlərin və digər təyyarələrin trayektoriyalarını izləyən xüsusi alətlər daşıyıb. Bu zaman İran ərazisindən İsrailə mümkün hücum riski xüsusilə nəzərə alınıb. Gətirilən qurğular Ermənistanın İranla sərhədində yerləşdiriləcək. Ancaq bu hamısı deyil. ABŞ təbii ki, bu missiyanı erməni hərbçilərinə həvalə etməyib, bu cihazları idarə edəcək 30-50 nəfəri çatdırıb. Rusiya və İranın diqqətini İranla sərhəddə yerləşdiriləcək şəxsi heyətə cəlb etməmək üçün hərbçilər diqqətlə seçilib – onların əksəriyyəti Amerika ordusunda xidmət edən erməni əsilli ABŞ vətəndaşlarıdır. Onlar Ermənistan ordusunun Zəngəzurdakı hərbi bazasında yerləşdirilib.
Görünən odur ki, Ermənistanla İran sərhəddində mini hərbi baza qurulacaq. O cümlədən İrandan İsrailə atılan raketlər yerindəcə zərərsizləşdiriləcək. Əslində İrandan İsrailə yönəldiləcək raketlərin, PUA-ların vurulmasına hazırlıq prosesi gedir.
"Bundan sonra isə Tehrana yönəlik hərbi fəaliyyətlərdə Ermənistan daha fəal iştirak edəcək"
Sözügedən məsələni "Bakı-Xəbər"ə şərh edən hərbi ekspert Ramil Məmmədli hesab edir ki, bütün bu fəaliyyət nəinki İsrailin qorunmasına, bütövlükdə İrana qarşı yönəlib: "Ermənistan baş naziri Nikol Paşinyan bir tərəfdən İranın yeni seçilmiş prezidentinin andiçmə mərasiminə gedir. Özünü "etibarlı" qonşu ölkə kimi təqdim etməyə çalışır. O biri tərəfdən İrana qarşı fəaliyyətdə birbaşa iştirak edir. Bu baxımdan ABŞ-ın Zəngəzurda baza qurması təkcə İsraili İran raketlərindən qorumaq məqsədi daşımır. Düzdür, həmin baza sayəsində İrandan atılan raketlər zərərsizləşdiriləcək. Radioelektron vasitələrlə onların uçuşlarına maneələr yaradılacaq, müdaxilələr ediləcək və s. Bununla yanaşı, ABŞ Ermənistanın cənubunda yerləşməklə İran barədə kəşfiyyat məlumatları toplayacaq və bundan məharətlə qarşı tərəfə yönəlik istifadə edəcək. Əslində onsuz da ABŞ-ın Ermənistan üzərindən İrana yönəlik kəşfiyyat fəaliyyəti var idi. ABŞ-ın ən böyük səfirliklərindən birinin Cənubi Qafqazın ən kiçik dövlətində mövcud olması təsadüfü deyildi. Bundan sonra isə Tehrana yönəlik hərbi fəaliyyətlərdə Ermənistan daha fəal iştirak edəcək. Görək İran buna necə reaksiya verəcək? Yerli-yersiz Azərbaycanı ona qarşı İsraillə əməkdaşlıqda haqsız yerə ittiham edən Tehran görək bütün bunlara görə Ermənistandan izahat tələb edəcəkmi? Bax maraq döğuran məsələlərdən biri də budur".
Vidadi ORDAHALLI
