Fransanın ev sahibliyi etdiyi XXXIII Yay Olimpiya Oyunları çoxsaylı çatışmalıqlara görə ciddi tənqid obyektinə çevrilməkdədir. Belə görünür ki, Emmanuel makron hakimiyyəti bu ali idman tədbirinnin təşkilatçılığını layiqincə yerinə yetriə bilməyib. Bu səbəbdən çoxsaylı narazılıqlar davam edir.
Qeyd edək ki, Yay Olimpiya Oyunlarının açılış mərasimi də ciddi tənqidlərə məruz qalıb. Çünki burada ifadə azadlığı və tolerantlıq pərdəsi altında insan ləyaqətinin tapdalanılıb, dini və əxlaqi dəyərlərin ələ salınıb. Xatırladaq ki, iyulun 26-da Fransa paytaxtının mərkəzində Paris Olimpiadasının açılış mərasimi olub. İdmançıların paradı Sena sularında baş tutub və bütün nümayəndə heyətləri 85 qayıqda yerləşdirilib. "The Guardian" qəzeti mərasimin Sena çayında keçirmək cəhdinin minlərlə tamaşaçının məyusluğuna səbəb olduğunu bildirib. Qeyd olunub ki, bu, logistik problemlərə və tamaşaçıların şounu tam görə bilməməsinə səbəb olub. Açılışdan sonra teatr tamaşası başlayıb, sonunda əfsanəvi italyan rəssamı Leonardo Da Vinçinin "Son şam yeməyi" əsərində təsvir olunan bibliya hekayəsinin parodiyası dini və əxlaqi dəyərlərin ələ salınması oldu. Açılış mərasimində xristianların dini hisləri təhqir olundu, peyğəmbər İsa Məsihin etikadan kənar obrazı yaradıldı. Artıq Olimpiya Oyunlarının təşkilat komitəsi açılış mərasiminin bəzi məqamlarına görə üzr istəyib. Bunun ardınca idmançıların çoxsaylı problemlərlə üzləşdikləri üzə çıxdı. Elə indi də Parisdə Yay Olimpiya Oyunlarında iştirak edən müxtəlif ölkələrin idmançıları paytaxtdakı yaşayış şəraitini tənqid edirlər. Məsələn, avstraliyalı su polosu oyunçusu Matilda Kerns və Fil Dişi Sahilindən olan yüngül atlet Uitni Tee "Le Figaro" qəzetinə yataq otaqlarının çox rahatsız olduğunu deyiblər. "L'Equipe" nəşrinin məlumatına görə, idmançılar müəyyən qida məhsullarının çatışmazlığından da şikayətlənir. "Aftonbladet" qəzeti yazır ki, İsveç stolüstü tennis komandası idmançıların təlim-məşq bazalarına getdiyi avtobuslardakı tıxacdan şikayətlənib, həmçinin nəqliyyatda soyutma sistemlərinin çox vaxt nasaz olduğunu bildiriblər. Binalarda kondisioner olmadığı aşkar edildikdən sonra komandalar Olimpiya kəndində yaşayış şəraiti ilə bağlı narahatlıqlarını ifadə ediblər. İdmançıların etirazlarından sonra Oyunların təşkilatçıları elan ediblər ki, Olimpiya iştirakçıları portativ soyuducu qurğular quraşdıra bilərlər. Özlərinə kondisioner alan idmançılar arasında otaqlarında mükəmməl soyutma, rütubətə nəzarət və havanın təmizlənməsi sistemləri quraşdıran Yaponiya, ABŞ, Böyük Britaniya, İtaliya, Avstraliya, Danimarka, Kanada, Yunanıstan və digər milli komandalar var. Amma bunu heç də hamı edə bilmir. Bu fonda kişilər arasında 100 metr məsafəyə arxası üstə üzmə yarışında qızıl medal qazanan italiyalı üzgüçü Tomas Cekkon Paris Olimpiya kəndindəki şəraiti sərt tənqid edib.İdmançının parkda gecələməsi Olimpiya kəndindəki neqativ halları yenidən gündəmə gətirib. Bununla bağlı açıqlamasında Cekkon bildirib: "Kondisioner yoxdur, hava isti, yeməklər pisdir. Buna görə də bir çox idmançı başqa yerlərə köçür. Bu, kapriz və ya bəhanə deyil, bəlkə də hər kəsin bilmədiyi bir həqiqətdir". O, xüsusilə günorta saatlarında havanın isti keçdiyini və səs-küy səbəbindən yatmaqda çətinlik çəkdiyini bildirib. Tennisçi Coco Gauff, üzgüçü Ariarn Titmus və Asya Tuati kimi idmançılar da Cekkona qoşularaq təşkilatın Parisdəki yerləşdirməsini sərt tənqid ediblər. 400 metr məsafəyə sərbəst üzməyə görə Olimpiadanın qızıl medalını qazanan Ariarn Titmus bildirib ki, yerləşdirmə şəraiti yaxşı olsaydı, dünya rekordunu qıra bilərdi. Onun sözlərinə görə, Olimpiya kəndindəki şərait yüksək performans göstərmək üçün uyğun deyil. Problemlər digər müstəvilərdə də özünü göstərir.
Olimpiya Oyunlarına gəlmiş Böyük Britaniya nümayəndə heyətinin bəzi idmançıları Olimpiya kəndində qida qıtlığı ilə üzləşdiklərini və yeməkxanada heç nədən razı olmadıqlarını bildiriblər. "L'Equipe" idman mətbuat orqanı da Olimpiya kəndinin yeməkxanasında qida çatışmazlığı ilə üzləşdiyindən yazıb.
Qidanın miqdarı ilə bağlı da çox sayda şikayət olduğu bildirilir. Qeyd olunur ki, ən çox şikayətlənən britaniyalı idmançılardır. Atletlər yumurta və toyuq əti rasionunun qənaətbəxş olmadığı qənaətindədirlər. Mal ətinin bişirilməsindən də şikayətlər çoxdur. "Times"da bildirilir ki, Britaniya nümayəndə heyətinin rəhbəri Endi Anson Olimpiya kəndində təklif olunan yeməklərin uyğun olmadığını hesab edir və radikal təkmilləşdirməyə çağırır. Bildirilir ki, hətta Britaniyadan aşpaz gətirilməsi ilə bağlı fikirlər yayılıb. Üçqat Olimpiya çempionu, britaniyalı üzgüçü Adam Piti bildirib ki, idmançılar Olimpiya kəndində təklif olunan balıq yeməklərində qurdlar tapırlar. 30 yaşlı üzgüçü Paris Oyunlarında 100 metr məsafəyə brass üsulu ilə üzmə yarışında gümüş medal qazanıb, bundan sonra onun koronavirus testi də müsbət çıxıb: "Qidalanma idmançıların gözlədiyi səviyyə üçün kifayət qədər yaxşı deyil. Axı biz yarışlar üçün güc toplamalıyıq. Tokioda yeməklər Rio-de-Janeyroda olduğu kimi inanılmaz dərəcədə yaxşı idi. Amma bu dəfə kifayət qədər proteinli qida variantları yoxdur, uzun növbələr və yemək üçün 30 dəqiqə gözləmələr olur. Mən ət yemək istəyirəm, mübarizə aparmaq üçün mənə protein lazımdır və evdə də belə qidalanıram. Bəs niyə burada nəyisə dəyişməliyəm? Mən də balıq yeməklərini sevirəm, amma insanlar onun içindən qurd tapırlar. Bu, yaxşı hal deyil. Mən, sadəcə insanların öz işlərini daha yaxşı görməsini istəyirəm. Düşünürəm ki, vəziyyəti ən yaxşı şəkildə açıqlaya bilən idmançılardır".
"Paris-2024" Olimpiya kəndinə gələn atletlər karton çarpayıları da tənqid obyektinə çeviriblər. Su polosu üzrə avstraliyalı çempion Tilly Kearns qeyd edir: "Karton çarpayıda gecələr. Kürəyimi itirirəm". Qısa məsafəyə qaçış üzrə idmançı Vitni Tay isə bildirir: "Çarpayılar həqiqətən də kartondandır, çox sərtdirlər". Fransız cüdoçu Julyan Brular qeyd edir: "Zarafat deyil, gördüyünüz kimi Olimpiya çarpayısı kartondandır". 26 000 ədəd olan bu çarpayıların hamısı kağız və ya plastik materialdan hazırlanıb. Ancaq Olimpiya kəndində təkcə çarpayılar gülüş obyekti olmayıb. Otaqlarda televizorların olmaması da idmançıları məyus edib. Həmçinin müxtəlif ölkələrdən gəlmiş idmançılar "TikTok" sosial şəbəkəsində yeməklərin ədviyyatsız, bir növ dadsız olmasına təəssüfləniblər. İdmançılar paltarlarının yuyulmasında da problemlərlə üzləşdiklərini bildirirlər. Bu vəziyyətdə yüngül atletika dünya rekordçusu, isveçli Armand Duplantis Olimpiya kəndində yaşamaqdan imtina edib. İsveç millisinin kapitanı Kaysa Berqkvist idmançının daha uyğun mənzil tapdığını bildirib: "O, peşəkardır və hörmət edilməli olan ehtiyacları var. Armand Duplantis bacardığı qədər hazırlaşmalıdır". Britaniyalı idmançılar Paris Olimpiya Oyunlarında uşaq biletlərinin qiymətini tənqid ediblər. Belə ki, körpələr üçün də biletin qiyməti yetkin insan üçün nəzərdə tutulduğu qədərdir. Böyük Britaniyanın avarçəkmə üzrə yığma komandasının üzvü Matilda Hodgkins-Birn isə idmançılara hər çıxış günü üçün yalnız iki bilet verilməsini düzgün hesab etmədiyini bildirib. Ümumiyyətlə o, niyə bunun üçün ödəniş etməli olduqlarını başa düşmədiyini deyib. Qeyd edək ki, Paris Olimpiya Oyunları 11 avqustda başa çatacaq.
Samirə SƏFƏROVA
