İbrahim Rüstəmli: "Cənubi Qafqazda bir sıra hegemon dövlətlərin mövqe savaşı aktiv fazaya keçib"
Flightradar qlobal uçuş izləmə xidmətinin məlumatına görə, avqustun 2 və 3-də ABŞ-ın Rumıniya və Yaxın Şərqdəki hərbi bazalarından Ermənistanın Zvartnots hava limanına 2 hərbi təyyarə qalxıb. Belə ki, ABŞ Silahlı Qüvvələrinə məxsus "Boeing C-17" hərbi yük təyyarəsi ilə şəxsi heyət hərbi yüklərlə birlikdə Zvartnots hava limanına gətirilib.
Aprelin 5-də Brüsseldə imzalanmış sənədin hərbi əməkdaşlığı nəzərdə tutan məxfi hissəsinə uyğun olaraq, Ermənistan Silahlı Qüvvələrinə ABŞ istehsalı olan yeni nəsil silahlar – snayper tüfəngləri, gecəgörmə cihazları, xüsusi rabitə vasitələri, zirehli zirehli texnika gətirilib. Ermənistan xüsusi təyinatlıları üçün ABŞ ordusunda istifadə edilən mini-hücum pilotsuz təyyarələri, kiçik ölçülü minalar və digər döyüş sursatları da bura daxildir. Bundan əvvəl ABŞ Ermənistan xüsusi təyinatlıları üçün bu sursatlardan istifadə üzrə təlimlər keçirib.
Belə görünür ki, avqustun 1-də Zvartnots hava limanını Rusiya hərbçiləri tərk edəndən sonra ABŞ Ermənistana silah daşımasını gücləndirib.
"Ermənistanı ona görə silahlandırırlar ki, revanşist qüvvələr güclənsin"
Sözügedən məsələni "Bakı-Xəbər"ə şərh edən hərbi ekspert İbrahim Rüstəmlinin fikrincə, bütün bunlar Cənubi Qafqaz uğrunda gedən geosiyasi mübarizə ilə bağlıdır: "Məsələ ondadır ki, 44 günlük Vətən müharibəsindən sonra Cənubi Qafqazda bir sıra hegemon dövlətlərin mövqe savaşı aktiv fazaya keçib. Düzdür, buna kimi də bir savaş var idi, amma bu səviyyədə deyildi. Çünki Ermənistanda Rusiyaya yaxın olan qüvvələr hakimiyyətdə idilər. Ona görə də ABŞ-la Fransa Ermənistana indiki kimi nüfuz edə bilmirdilər. Ancaq 2018-ci ildə Ermənistanda hakimiyyətin dəyişməsi, iki ildən sonra Azərbaycanın erməni işğalına son qoyması bu sahədə vəziyyəti Qərbin xeyirinə dəyişdi. Bunların başında ABŞ və Fransa dayanır. Vaşinqtonun regionda strateji maraqları var. Ancaq başlıca məqsəd Rusiyanı Ermənistandan sıxışdırıb çıxarmaqdır. Bu yöndə də davamlı olaraq çalışırlar. Qərbə yaxın olan media resursları davamlı olaraq Rusiyaya qarşı təbliğat kampaniyası aparırlar. Hər vəchlə erməni ictimai rəyində belə fikir förmalaşdırmağa çalışırlar ki, Rusiya və KTMT Qarabağ döyüşlərində Azərbaycana mane olmayıb. Bundan başqa guya Azərbaycan 2021-2022-ci illərdə Ermənistan ərazilərini ələ keçirib, amma Rusiya buna mane olmayıb. Əslində bütün bunlarda məqsəd həm də Rusiya hərbi bazalarını Ermənistandan çıxarılmasına nail olmaqdır. Elə Zvartnots hava limanından Rusiya sərhədçilərinin çıxarılması da ABŞ-ın planı idi. Çünki onlar istəmirdilər ki, Ermənistanın silahlandırılmasını Rusiya bilsin. Ermənistanı ona görə silahlandırırlar ki, revanşist qüvvələr güclənsin. Rusiyanın bu ölkədən hərbi qüvvələrinin çıxarılması ilə bağlı tələblər artsın və ermənilər özlərini daha inamlı hiss etsinlər. Bu səbəbdən artıq açıq şəkildə Ermənistan silahlandırılır".
Vidadi ORDAHALLI
