Məhərrəm Zülfüqarlı: "Apardıqları toponim müharibəsi Ermənistan konstitusiyasından qaynaqlanır, konstitusiya dəyişməlidir"
Erməni mətbuatı gecə-gündüz dayanmadan Azərbaycana qarşı əsassız ərazi iddiası irəli sürür, toponim müharibəsini davam etdirir. Elə bir erməni mətbuatı tapılmaz ki, hər gün orada Azərbaycana qarşı ərazi iddiası sərgilənməsin.
Bunlar bu mənasız və absurd kampaniyanı aparmağı qarşılarına məqsəd qoyublar. Bununla heç nə əldə edə bilməyəcəklərini bilə-bilə yenə də özlərini aldadırlar. Bu da təsadüfi deyil, onlar yalandan qidalanırlar, güc alırlar, vampirin qidası qan, bunlarınkı da saxtakarlıq və yalandır.
Erməni mediası, bəzi üzdən iraq ekspertlər Azərbaycanı Ermənistana qarşı "toponim müharibəsi" aparmaqda ittiham edirlər, guya biz "toponim müharibəsi" aparırıq, amma özlərini görmürlər. Əsl toponim müharibəsi aparan, ərazi iddiasını dövlət siyasətinə çevirən, bunu konstitutsiyasında əks etdirən Ermənistandır, onu təbliğ edən erməni mətbuatıdır.
Erməni mediası Azərbaycan Respublikasının rayonlarını qondarma adlarla ifadə edir. Şuşanı "Şuşi", Laçını "Berdzor", Ağdamı "Akna" yazırlar, Xankəndini "Stepanakeret", Ağdərəni "Mardakert" adlandırırlar. Bir sözlə, bütün güclərini bu istiqamətdə saxtalaşdırmaya sərf edirlər. Ermənistan Azərbaycanın ərazi bütövlüyünü tanıyırsa bəs bu toponim müharibəsi nəyə lazımdır?
"...Bu kampaniya iflasa uğrayacaq"
Tarix elmləri doktoru, professor Məhərrəm Zülfüqarlı "Bakı-Xəbər"ə şərhində bildirdi ki, tarixən yer-yurd adlarının saxtalaşdırılması, dəyişdirilməsi işğallar dövründə baş verib və işğalçılara nökərçilik edən köçürülən əhali də bundan istifadə edib. "Məsələn, Çar Rusiyasının işğalçı siyasətinə baxaq, Gəncəni 1804-cü ildə işğal edən kimi şəhərin adını dəyişib Yelizavetpol qoydu, Sovet dövründə isə dəyişib Kirovun adı ilə Kirovabad adlandırdılar. Ermənilər də məhz bu xislətin də daşıyıcılarıdır. Yəni onlar da bilirlər ki, bura köçürülmədilər, gəlmədilər, Türkmənçay müqaviləsindən sonra Çar Rusiyası tərəfindən bizim ərazilərə köçürülüblər. İşğalçıya alət olmaq, icraçı rolunu oynamaq üçün burada məskunlaşdırılıblar. Amma nəsillər dəyişdikcə şüurlardan bunu silməyə çalışıblar. Ona görə də toponimləri, yer-yurd adlarını dəyişməyə başlayıblar. Baxın, Qərbi Azərbaycandakı bütün toponimlərin adını dəyişiblər, Qarabağı və ətraf rayonları işğalda saxladıqları dövrlərdə də şəhər, kənd, yer-yurd adlarını saxtalaşdırıblar. Ermənilər Xankəndini "Stepanakeret" adlandırırlar. Stepan Şaumyan Azərbaycan xalqının düşmənidir, "Bakı Sovetinin" rəhbəri olub və mart soyqırımının bilavasitə təşkilatçısı idi. Azərbaycanın qədim şəhəri Xankəndinin adını dəyişib onun adını vermişdilər. İndi biz Xankəndinin tarixi adını özünə qaytarmışıq".
Ermənilərinin bu cür siyasətinin qarşısını almaq üçün bütün vasitələrdən istifadə etdiyimizi deyən M.Zülfüqarlı hesab edir ki, bu gün Ermənistan mediasının apardığı toponim müharibəsi iflasa uğrayacaq. "Apardıqları toponim müharibəsi Ermənistan konstitutsiyasından qaynaqlanır, konstitutsiya dəyişməlidir. Ermənistan konstitutsiyasından Azərbaycana qarşı ərazi iddları çıxarılmalıdır.
Bizim şəhərlərə, kəndlərə elə qondarma adlar qoyublar ki, mənası belə bilinmir. Amma onların apardıqları bu kampaniya iflasa uğrayacaq. Bütün dünya artıq hər şeyi bilir. Google-dəki xəritələrdə də Azərbaycan şəhər və kəndlərinin tarixi adları bərpa olunub. Odur ki, onlar nə deyirlər desinlər, gerçəklik dəyişməyəcək. Yaxşı olar ki, konstitutsiyalarına əl gəzdirsinlər"-deyə M.Zülfüqarlı bildirdi.
M.Zülfüqarlı qeyd etdi ki, biz Qərbi Azərbaycanda erməniləşdirilmiş toponimlərimizin bərpası işinə başlamalıyıq. M.Zülfüqarlının fikrincə, gələcəkdə Ermənistanda normal, demokratik bir rejim hakimiyyətdə olarsa, Rusiyanın və başqa böyük dövlətlərin caynağı o ölkədən çəkilərsə bu qarşılıqlı razılaşma əsasında toponimlərin adlarının bərpası həyata keçirilə bilər. "Bu elə uzaq bir dövr deyil. XIX əsrdən başlayaraq Sovet dövründə və sonrakı mərhələdə davam edən bir məsələdir. Bu yaddaşlarda da, sənədlərdə də var. Ona görə də, toponimləri bərpa etmək asandır. Təki Ermənistandakı rejim əvvəlki separatçı rejimlərə, revanşistlərə dəstək verməsin, torpaq iddiasında olmasınlar. Onlar təkcə bizə qarşı deyil, qardaş Türkiyəyə, qonşu Gürcüstana da ərazi iddiası irəli sürürlər. İndiki rəhbərlik bu xəstəliyi başa düşür, sağaltmağa çalışır, deyir ki, real tarixə inanmaq lazımdır, nağıllara uymaq lazım deyil. Yəni bu proses gedərsə, yer-yurd adları, toponimlərlə bağlı məsələlər həll oluna bilər, hər bir kəndin, hər bir rayonun, hər bir çayın, gölün adlarına özlərinə qaytarıla bilər".
M.Zülfüqarlı vurğuladı ki, ad dəyişmək işğalçının xislətindədir, qanındadır. O, qeyd etdi ki, məsələn, Rusiya ərazisində olan Kalininqrad şəhərinin əsl adı Köniqsberqdir, o bir alman şəhəridir, amma ona Sovet dövründə Ağsaqqallar Şurasının sədri Kalinin adını veriblər. "Hamı bilir ki, bu qondarma bir addır, gələcəkdə bu cür şəhərlərin tarixi adlarının qaytarılmasına hetiyac var. Yəni demək istəyirəm ki, təkcə bizim ərazilərlə bağlı deyil, Avropada da, Asiyada da, Amerikada da belə proseslər olub. Dövlət gücləndikcə bu problemi həll edə bilir. Azərbaycan da Cənubi Qafqazda ən güclü dövlətdir, nəinki öz problemlərinin həllinə, eləcə də başqa dövlətlərin probleminin həllinə də yaxından dəstək verir" - deyə M.Zülfüqarlı əlavə etdi.
İradə SARIYEVA
