Faiq Ələkbərli: "Burada siyasi amillər, ikili yanaşmalar, türk və islam düşmənçiliyi də var"
Fransanın paytaxtı Parisdə keçirilən 33-cü Yay Olimpiya Oyunlarına 204 ölkədən 10 min idmançı qatılıb. İyulun sonlarından başlayan Olimpiya Oyunları avqustun 11-nə qədər davam edəcək.
Paris-2004 Olimpiyadasında ölkələr üzrə medal sıralaması hər gün mətbuatda dərc edilir.
Avqustun 6-da təqdim edilən siyahıya 21 qızıl medalla ABŞ başçılıq edir, onun ardınca Çin, Fransa, Avstraliya, Böyük Britaniya, Cənubi Koreya, Yaponya və başqa ölkələr gəlir. Azərbaycanın isə hələlik iki qızıl medalı var. Təəssüflər olsun ki, Türkiyə idmançıları hələlik qızıl medal qazana bilməyiblər, qardaş ölkənin bir gümüş, bir bürünc medalı var.
Türkiyənin Paris Olimpiya Oyunlarında qızıl medal qazana bilməməsi qardaş ölkənin mediasında da, ictimaiyyətində də qızğın müzakirə edilir, bəzən idmançılara, Türkiyənin idman federasiyalarına qarşı tənqidlər də səslənir. Bu məsələ bizim cəmiyyətdə də müzakirə edilir, bəzi haqlı sualların yaranmasına səbəb olur.
Faktdır ki, Fransa və başqa Qərb dövlətləri çoxdan bəridir idmanı, idman yarışlarını, Olimpiya Oyunlarını siyasi təzyiq vasitəsinə çeviriblər, ondan siyasi məqsədlər üçün istifadə etməkdən çəkinmirlər. Paris Olimpiyadasında qardaş ölkənin idmançılarının uğur qazana, qızıl medal əldə edə bilməməsinin səbəblərindən biri kimi məhz Fransanın ikili standartlı münasibəti ön plana çəkilir.
Paris Olimpiyasında Türkiyənin belə nəticəsində səbəb nədir? İkili standartalar, ya idmanın zəifliyi?
Ekseprtlər bildirirlər ki, Türkiyə hər dəfə Olimpiya Oyunlarında qızıl medallar qazanıb və biz də qardaş ölkənin idmançılarının nailiyyətlərinə sevinmişik. Paris Olimpiyadasında Türkiyə idmançılarının uğurlu nəticə əldə edə bilməməsinin səbəbi nə qardaş ölkənin idman strategiyasının zəif olması, nə də idmançılarının zəif olmasıdır, bu Fransanın antitürkiyə siyasətinin nəticəsidir. 85 milyonluq bir ölkənin idmançılarına ikili yanaşmanın sərgilənməsinin qəbuledilməz olduğunu deyən ekspertlər hesab edirlər ki, bu Türkiyə Prezidenti Rəcəb Taib Ərdoğanın 26 iyulda Parisdə Yay Olimpiya Oyunlarının açılışında Makron hökumətinin göstərdiyi biabırçı performanslara etirazını bildirməsindən qaynaqlana bilər.
"Fransa Türkiyənin qızıl medalçılar siyahısında ön sıralara çıxmasını qətiyyən istəmir"
Bütöv Azərbaycan Ocaqları (BAO) sədrinin müavini, fəlsəfə doktoru Faiq Ələkbərli "Bakı-Xəbər"ə təəssüflə bildirdi ki, idman sahəsində türk dünyasına, islam aləminə qarşı zaman-zaman qərəzli yanaşmalar olub, idmançılar qəsdən uduzdurulub. "Türkiyə idmançıları əvvəlki Olimpiya Oyunlarında yaddaqalan uğurlar əldə edib, qızıl medallar qazanıb. Amma Paris Olimpiyadasında Türkiyəyə qarşı haqsız yanaşma özünü göstərdi. Bunlar ya hakimlərin ədalətsizliyi üzündən, ya da Fransanın təsiri ilə baş verib. Türkiyə idmançılarının ədalətsizliyə məruz qaldığını düşünürəm. Vaxt olub ki, bizim öz idmançılarımız da qəsdən uduzdurlub. Bunun da şahidi olmuşuq. Fransanın və Avropa Birliyi dövlətlərinin Türkiyəyə olan münasibəti özünü burada da biruzə verdi. Fransa başda olmaqla bəzi Avropa dövlətlərinin Türkiyəyə, Azərbaycana, eləcə də digər türk və islam dövlətlərinə qərəzli münasibəti bəllidir. Bu məsələdə Türkiyənin də haqsızlığa uğradığını deyə bilərik. Çünki Fransa kimi antitürk, antiislam dövlətlər idmandan da siyasi vasitə olaraq istifadə edirlər. Biz orada Özbəkistanın və başqa türk, islam dövlətlərinin də haqsızlıqla üzləşdiyini görürük. Bu amil də var ki, Fransa Türkiyənin qızıl medalçılar siyahısında ön sıralara çıxmasını qətiyyən istəmir, bu səbəbdən də pərdə arxasından müəyyən problemlər yaradır. Bu bəlli məsələdir".
F.Ələkbərli hesab edir ki, daxildən də bu məsələlərə başqa cür don geydirənlərin olması təəssüf doğurur, Türkiyəni, Türkiyə idmançılarını ittiham etməyə cəhd edənlər başlarını qaldırıb Fransanın antitürk mövqeyinə baxsınlar. "Haqlı tənqidlər ola bilər, ancaq bəzən tənqid məsələsində ifrata varanlar da olur. Anlamaq lazımdır ki, bu Türkiyənin idman strategiyasının zəif olması ilə bağlı deyil, burada siyasi amillər, ikili yanaşmalar, türk və islam düşmənçiliyi də var. Birinci dəfə deyil ki, türk millətindən olan idmançılara qarşı haqsızlıq olub, biz bunu dəfələrlə görmüşük. Odur ki, hər şeyi dərindən ölçüb-biçmək lazımdır. Fransanın da məqsədi daxildə narazılıq yaradıb idmançıları Türkiyə cəmiyyətinin gözündən salmağa nail olmaqdır. Amma qardaş ölkənin insanları Fransaya bu fürsəti verməməlidir. Hələ Olimpiyada ayın 11-nə qədər davam edəcək, qarşıda qardaş ölkənin idmançılarının qızıl medal da qazanmaq şansları da olacaq. Təki Fransa düşmən siyasətindən əl çəksin və hakimləri ədalətsizliyə məcbur etməsin" - deyə F.Ələkbərli bildirdi.
İradə SARIYEVA
