İlyas Hüseynov: "Toivo Klaarın müsahibəsi tamamilə qərəzli və faktları təhrif edən bir müsahibədir"
Bu postda missiyasını başa vuran Avropa İttifaqının (Aİ) Cənubi Qafqaz və Gürcüstan böhranı üzrə Xüsusi Nümayəndəsi Toivo Klaar yenə də ənənəvi ermənipərəstliyini nümayiş etdirib. Toivo Klaar Jam.news-a müsahibəsində bildirib ki, rəsmi Bakı Qarabağ ermənilərinin "öz ata-baba yurdlarına" qayıtmasına kömək etməlidir, guya bu, Azərbaycanın öhdəliyidir.
Klaar həmçinin deyib ki, Ermənistanla Azərbaycan arasında sülh müqaviləsinin böyük hissəsi razılaşdırılıb və onun imzalanması üçün siyasi iradə lazımdır. Onun fikrincə, tərəflər arasında yekun razılığın əldə edilməsi "əlçatan məsafə" daxilindədir. Avropalı diplomat deyib ki, sülh müqaviləsi və onun bəndlərinin həyata keçirilməsi regiondakı vəziyyəti tamamilə dəyişəcək.
"Düşünürəm ki, ölkələrin liderləri bu mövqeyi bölüşürlər və bu məsələ ilə bağlı yekun razılaşmaların əldə edilməsi üçün bütün lazımi addımları atacaqlar" deyə Klaar bildirib.
Erməni mediasına görə, diplomat eyni zamanda bildirib ki, bu proses çox kövrəkdir, bunu iki ölkə liderlərinin Böyük Britaniyada danışıqlar aparmaması sübut edir.
Yeni görüşlərə gəlincə, Klaarın qeyd etdiyi kimi, tərəflər bu məsələni həll edərsə, Aİ yenidən vasitəçi rolunu öz üzərinə götürməyə hazırdır.
Kor tutduğunu buraxmayan kimi, avropalı diplomat da Qarabağdan könüllü köçüb getmiş ermənilərin yaxasını buraxmaq istəmir. Klaar absurd fikirlərini davam etdirərək "Qarabağ erməniləri məsələsi nizamlanma prosesinin tərkib hissəsinə çevriləcək, onların təhlükəsiz və ləyaqətlə qayıtması ilə bağlı Bakı ilə birbaşa danışıqlar aparılacaq" deyib.
Yenə də iddia edib ki, Azərbaycanın öhdəlikləri var, Bakı bundan imtina etmir.
Klaar deyib ki, Bakının irəli sürdüyü Qərbi Azərbaycan məsələsi ilə ermənilərin Qarabağa qayıdışına guya "eyni müstəvidə baxmaq olmaz". Klaar deyib ki, birinci məsələ Qarabağ ermənilərinin "öz ata-baba yurdlarına" qayıtmasının asanlaşdırılmasıdır, bu, Azərbaycanın öhdəliyidir.
Bundan əvvəl Ermənistan Xarici İşlər Nazirliyi bəyan etmişdi ki, Ermənistan Azərbaycandan sülh müqaviləsi layihəsi ilə bağlı 10-cu təkliflər paketini iyun ayında alıb. İrəvan isə sülh müqaviləsi üçün cavab təklifləri paketi hazırlayır.
Klaarın hansı cəfəng iddialar irəli sürməsindən asılı olmayaraq, Azərbaycanın Qarabağdan köçüb getmiş erməniləri geri qaytarmaqla bağlı hər hansı bir öhdəliyi yoxdur. Azərbaycan belə bir öhdəliyi üzərinə götürməyib. Əvvəla, Azərbaycan erməniləri Qarabağdan zorla qovmayıb, digər tərəfdən də onlara çağırış etmişdi ki, qalıb Azərbaycan vətəndaşları kimi yaşaya bilərlər. İkincisi də, onlara hər hansı bir statsunun verilməyəcəyini də rəsmi Bakı dəfələrlə bəyan edib.
"Azərbaycan Qarabağdan getmiş ermənilərin qarşısında heç bir öhtəlik götürməyib"
Klaarın açıqlamasına şərh verən politoloq İlyas Hüseynov "Bakı-Xəbər"ə şərhində "Qeyd etmək lazımdır ki, Toivo Klaar fəaliyyəti dövründə dəfələrlə çox qərəzli mövqedən çıxış edib və biz bu mövqeni bir sıra hallarda erməni mövqeyinə yaxın, yaxud birbaşa erməni mövqeyinin ifadəsi kimi anlamışıq, buna da rəsmi Bakı çox sərt, kəsin cavab verib, bütün açıqlamanı milli maraqlarımız, milli mənafelərimiz kontekstində dəyərləndirib. Hazırda Avropada gedən kadr dəyişiklikləri fonunda Toivo Klaarın sentyabrın 1-dən əsas vəzifəsi, iş yeri Aİ-nin Özbəkistanda səfiri kimi fəaliyyətə başlaması olacaq. Klaar bu vəzifədə öz fəaliyyətini qurmalıdır. Lakin Toivo Klaar öz müsahibəsində yenidən faktları təhrif etmək, yenidən ziddiyyətləri alovlandırmaq yolunu seçib. Onun bütün fikirləri, əlbəttə ki, həqiqətdən uzaqdır. Azərbaycan Qarabağdan getmiş ermənilərin qarşısında heç bir öhtəlik götürməyib. Əgər o fikrini səhv ifadə edibsə buna bir korrektə edə bilər. Çünki məhz Azərbaycan tərəfi reinteqrasiya ilə bağlı təklif irəli sürmüşdü və bu təklifin əsas mahiyyəti ondan ibarət idi ki, Qarabağda yaşayan ermənilər Azərbaycan vətəndaşlığını qəbul edərək Azərbaycan ərazisində qalıb öz həyatlarına davam edə bilərlər. Onlar isə Azərbaycan vətəndaşlığını qəbul etməkdən imtina etdilər və vətəndaşı olduqları ölkəyə üz tutdular. Bu ermənilərin hamısı Ermənistan Respublikasının vətəndaşları idilər, bu ölkənin pasportunu daşıyırdılar. Onlara da heç bir təzyiq olmayıb, heç bir mıhdudiyyətlərlə qarşılaşmayıblar, çox rahat şəkildə Laçın yolundan istifadə edərək Ermənistana üz tutublar".
İ.Hüseynov qeyd etdi ki, Azərbaycan da bu halda onların təhlükəsizliyini ən üst səviyyədə təmin edib. İ.Hüseynovun sözlərinə görə, digər tərəfdən, qeyd etmək lazımdır ki, məhz hazırkı reallıqlarda Azərbaycan balanslı və paritet əsasında münasibətlərin formalaşmasının tərəfdarıdır. "Əgər Qarabağ ərazisinə ermənilərin qaytarılması prosesi olacaqsa, onda azərbaycanlılar da öz tarixi torpaqlarına, hazırkı Ermənistan Respublikasına şərəflə, ləyaqətlə və təhlükəsizlik şəraitində qayıtmalıdırlar. Bu, Azərbaycanın haqlı və beynəlxalq hüquqa söykənən tələbidir. Toivo Klaar məsələnin bir tərəfini deyirsə digər tərəfini də qeyd etməlidir və elə zənn etməməlidir ki, bunlar bir-birindən fərqli anlayışlardır, fərqli yanaşmalardır. Bu baxımdan, Toivo Klaarın müsahibəsi tamamilə qərəzli və faktları təhrif edən bir müsahibədir"-deyə İ.Hüseynov vurğuladı.
İradə SARIYEVA
