Qarabağdan gedənləri İrəvanda qazanc mənbəyi edən işbazlar yaranıb - siz niyə gedirdiniz ki...
Rauf Zeyni: "Belə demək mümkünsə, orada sahibsiz qalan bir kontingent varsa o da Qarabağdan köçüb getmiş ermənilərdir"
Qarabağdan könüllü köçüb Ermənistana gedən ermənilərə bu ölkədə heç də xoş münasibət yoxdur. Erməni mətbuatı özü yazır ki, Qarabağdan İrəvana gəlmiş ermənilərin yaşayışı üçün orada ciddi problemlər var.
Yeni yayılan məlumata görə, Qırmızı Xaç Cəmiyyəti adından Qarabağdan köçüb İrəvana getmiş ermənilərin şəxsi məlumatlarını toplayan fırıldaqçılar peyda olub. Qırmızı Xaç da onlara xəbərdarlıq edib ki, sizin məlumatlarınızı biz toplamırıq, onları toplayanlar fırıldaqçılardır.
Qırmızı Xaç Cəmiyyətinin mətbuat mərkəzinin rəhbəri Artur Hovhannisyan "yardım göstərmək bəhanəsi ilə" təmsil etdiyi ofis adından vətəndaşlara, xüsusən də Qarabağdan Ermənistana köçmüş şəxslərin şəxsi və bank məlumatlarını toplayan fırıldaqçılar barədə xəbərdarlıq edib.
Hovhannisyan vətəndaşları şəxsi və bank məlumatlarını kənar şəxslərə açıqlamaqdan çəkinməyə çağırıb. Hovhannisyan "Erməni Qırmızı Xaç Cəmiyyətinin nümayəndələri heç vaxt telefonla şəxsi və ya bank məlumatlarını müzakirə etmirlər" deyib.
Qarabağdan köçüb getmiş ermənilərin şəxsi məlumatlarının, bank hesablarını Ermənistanda müəyyən qüvvələrin ələ keçirmək cəhdinin olduğu gizlin deyil. Ermənistanda da, xaricdə də hər zaman Qarabağdan getmiş ermənilərdən qazanc mənbəyi kimi istifadə olunur. Vaxtilə onlar üzərindən çirkin oyunlar oynayan, kirli pullarını onlara ayırdıqları yardım hesabına şəffaflaşdıran qurumlar indi də onlardan əl çəkmək istəmir. Belə yerdə deyirlər, arığın nə işi vardı qoruqda ki, vurub qıçını sındırdılar". Onlar niyə Azərbaycan vətəndaşlığını qəbul edib burada qalmadılar ki, indi başlarına hər cür oyun gəlir? Əslində, onların fırıldaqçıların hədəfində olmasına təbii yanaşmaq lazımdır, çünki özləri də hər zaman fırıldaq işlədib başlarını o cür saxlayıblar. Hər şey bumeranq kimidir, etdikləri nə vaxtsa özünə qayıdır. İndi də ermənilərin fırıldaqları qayıdıb öz başlarına gəlir.
"Bu kontingentdən təkcə bu bu gün istifadə olunmur, illər boyu Qarabağ klanı tərəfindən Azərbaycanın həm müstəqilliyinə, həm ərazi bütövlüyünə təhdid olaraq seçilib, onlardan daima istifadə olunub"
Müstəqil ekspert Rauf Zeyni "Bakı-Xəbər"ə şərhində bildirdi ki, bütün dövrlərdə müəyyən işbazlar yaranmış vəziyyətdən, ayrı-ayrı əhali qurupunun durumundan istifadə edərək gəlir, qazanc əldə etmək istəyirlər. "Bu gün də İrəvanda Qırmızı Xaç Cəmiyyətinin adından istifadə edən işbazlar peyda olub. Belələri indi də Qarabağdan köç etmiş erməniləri seçiblər. Ən çox istifadə olunan qrupları seçib onlardan yararlanmağa çalışıblar. Onlar üçün kontingentin fərqi yoxdur, kim olur olsun, təki istifadə etsinlər. Bu işbazlar qərar qəbul ediblər ki, Qırmızı Xaç Cəmiyyətinin adından istifadə etsinlər. Qırmızı Xaçın da İrəvandakı ofisindən müraciət edilib ki, bu işlərə son qoysunlar. Oğrunun, işbazın, quldurun, terrorçunun milliyyəti olmur. Onlar hansı işi görməklə bağlı qərar qəbul ediblərsə, o işi edəcəklər".
R.Zeyni hesab edir ki, bu işlə Ermənistanın hüquq-mühafizə orqanları məşğul olmalıdır, məsələni araşdırıb ifşa etməlidir. "İctimaiyyət də bilməlidir ki, onlar nəyə görə məhz Qırmızı Xaçın adından istifadə etməyi seçiblər. Belə demək mümkündürsə, orada sahibsiz qalan bir kontingent varsa o da Qarabağdan köçüb getmiş ermənilərdir. Sahibsiz olduqları üçün işbazlar onları seçiblər. Bu kontingentdən təkcə bu bu gün istifadə olunmur, illər boyu Qarabağ klanı tərəfindən Azərbaycanın həm müstəqilliyinə, həm ərazi bütövlüyünə təhdid olaraq seçilib, onlardan daima istifadə olunub. Bu gün də həmin işbazlar fikirləşirlər ki, bunlardan daim istifadə olunub, biz də istifadə edək"-deyə R.Zeyni bildirdi.
İradə SARIYEVA
