Elşən Manafov: "Erməni politoloqun sülh danışıqları ətrafında mövcud durumu təhrif etmək istəyi birmənalıdır"
Qafqaz İnstitutunun direktoru, politoloq Aleksandr İskəndəryan iddia edir ki, guya bu gün Azərbaycana Ermənistanla sülh müqaviləsi lazım deyil: "Yumşaq desək, biz hazırda hərbi müdafiə üsulları ilə o qədər də yaxşı təmin olunmamışıq.
Ona görə də ideyamız Ermənistanın təhlükəsizliyini başqa yolla, yəni danışıqlar prosesi, sülh sazişinin bağlanması, sərhədlərin delimitasiyası və demarkasiyası yolu ilə təmin etməkdir".
Politoloqun fikrincə, Azərbaycanın Ermənistanın gərginləşməsindən və risqlərindən qorxmağa əsası yoxdur: "Azərbaycanda heç kim düşünmür ki, sabah Ermənistan Stepanakerti (Xankəndi) və ya Şuşanı geri almağa başlayacaq. Belə olan halda Azərbaycana sülh niyə lazımdır, bu sülh müqaviləsi nəyə lazımdır?".
İskəndəryan qeyd edib ki, Azərbaycan regionda geosiyasi vəziyyət dəyişmədən Ermənistanı mümkün qədər zəiflətməyə və bunu mümkün qədər tez etməyə çalışır.
Qəribədir, Azərbaycan niyə sülhdə maraqlı olmasın ki? Ümumiyyətlə, belə iddiaların əsası varmı?
"Delimitasiya sahəsində danışıqlarda qeyri-müəyyənlik, destruktivlik numayiş etdirən məhz Ermənistandır"
Sözügedən məsələ ilə bağlı fikirərini "Bakı-Xəbər"lə bölüşən politoloq Elşən Manafov erməni ekspertin iddialarına bir neçə aspektdən yanaşdı: "Ermənistanlı politoloq 2020-ci ilin 44 günlük müharibəsindən sonra həm bölgədə geosiyasi durumun, həm də danışıqlar ətrafında vəziyyətin öz ölkəsinin xeyrinə olmayaraq dəyişməsinin fərqindədir. Əks halda Azərbaycanı sülh danışıqlarının uzadılmasında və ümumiyyətlə, sülh müqaviləsinin imzalanmasında maraqlı olmadığını iddia etməzdi. İskəndəryan etiraf edir ki, Ermənistan problemin müharibə yolu ilə həllinə qadir deyil, buna iqtidarı çatmır. Ona görə də sülh müqaviləsinin imzalanmasında maraqlıdır. Hərçənd, İskəndəryanın sülh danışıqları ətrafında mövcud durumu təhrif etməsi istəyi də birmənalıdır. Əvvəla, İskəndəryanın mülahizələrindən fərqli olaraq, danışıqlarda destruktiv mövqe tutan tərəfin Ermənistan olması birmənalıdır. Çünki məhz Ermənistan sürətlə silahlanma yoluna qədəm qoyub. ABŞ-ın dəstəyi, habelə Fransa ilə hərbi-texniki əməkdaşlığı genişləndirmək yolu ilə ordusunu gücləndirir. Azərbaycanla mövcud problemlərin güc müstəvisi üzərində həllinə ümidlərini itirmir. Onun ancaq Hindistanla imzaladığı müqavilə Ermənistan ordusunun 600 milyon dollar həcmində silah-sursatla təchizatını nəzərdə tutur. Digər tərəfdən, Ermənistan NATO-nun hərbi təlimlərinə qoşulmaqla Azərbaycanla münasibətlərin nizamında kollektiv Qərbin köməyinə umid edir. Onun Qərblə tərəfdaşlığı bölgənin geosiyasi konfiqurasiyasının Qərbin istəyi ilə dəyişdirilməsinə, Rusiyanı Cənubi Qafqazda müharibəyə cəlb etmək maraqlarına xidmət edir. Azərbaycanla demarkasiya və delimitasiya sahəsində danışıqlarda qeyri-müəyyənlik, destruktivlik numayiş etdirən məhz Ermənistandır. Azərbaycanın ölkənin əsas qanuna dəyişikliklərin edilməsi ilə bağlı haqlı tələblərinə Paşinyan iqtidarı ölkənin daxili işi kimi yanaşır. Və ən nəhayət, Ermənistan baş naziri Paşinyanın bu günlərdə Londonda Prezident Əliyevlə danışıqlardan yayınması məhz erməni tərəfinin danışıqların bilərəkdən uzadılmasında maraqlı olduğunu göstərdi".
Vidadi ORDAHALLI
