Hüseyn İbrahimov: "Sərhədlərin açılması revanşist dairələrin işinə gəlmədiyi üçün belə kampaniya aparılır"
Türkiyə ilə sərhəd hələ açılmayıb, amma erməni tərəfi indidən bundan narahatdır. Erməni mediası yazır ki, sərhədlər açılsa, Türkiyə bizi "udacaq":
"Məqsəd aydındır. Ölkə iqtisadiyyatı Türkiyə tərəfindən birbaşa mənimsənilsin. Sərhədlər də əslində bu şərtlə açılacaq. Ermənistan ilk növbədə sərhədi açmaqla hansı bədəli ödəyəcək? Əsas sual budur. Biz Türkiyə bazarına nə təklif etməliyik ki, birtərəfli deyil, ikitərəfli ticarət olsun, əgər ticarət ikitərəfli deyilsə, bu, Ermənistanın Türkiyə tərəfindən mənimsənilməsinə səbəb olacaq. Türkiyə ilə iş görməkdən, iqtisadi səmərə əldə etməkdən danışanlar ötən ilin statistikasına baxa bilərlər. Son 10 ildə Türkiyədən Ermənistana 300 milyon dollar dəyərində, 10 dəfə az mal idxal edilib. Ermənistandan 3-3,5 milyon dollar dəyərində mal ixrac edilib".
"Halbuki bu, regional təhlükəsizliyə öz töhfəsini verəcək"
Sözügedən məsələni "Bakı-Xəbər"ə şərh edən İdarəçilik Akademiyasının müəllimi, sosioloq Hüseyn İbrahimov hesab edir ki, Türkiyəyə belə münasibət uzun illər Ermənistanda aparılan şovinist, xəstə təbliğatla bağlıdır: "Məlum olduğu kimi, Türkiyə-Ermənistan sərhədi hələ açılmayıb. Açılmamasının səbəbi də bəllidir. Səbəb onunla bağlıdır ki, Azərbaycanla Ermənistan arasında sülh sazişi hələ imzalanmayıb. Türkiyənin əsas şərtlərindən biri budur. Bütün bunlara baxmayaraq, Ermənistanda bəlli revanşist dairələr bundan ciddi narahatdılar. Onlar hesab edirlər ki, sərhədlər açılsa, Ermənistan Türkiyənin iqtisadi nüfuz təsirinə keçəcək. Sonrakı mərhələdə isə, guya Türkiyə Ermənistanı ələ keçirəcək. Halbuki, bu belə deyil. Ən azından ona görə ki, Türkiyə-Gürcüstan əlaqələri timsalında ortada müsbət nümunələr var. Türkiyə Gürcüstan iqtisadiyyatına milyardlarla dollar sərmayə qoyub. Ölkə iqtisadiyatının inkişafına Türkiyə öz töhfəsini verir. Sərhədlər açılsa Ermənistan inkişaf edəcək. Ən başlıcası, bu, regional təhlükəsizliyə öz töhfəsini verəcək. Cənubi Qafqazda müharibə təhlükəsini ortadan qaldıracaq. Sərhədlərin açılması revanşist dairələrin işinə gəlmədiyi üçün Türkiyəyə qarşı belə kampaniya aparılır. Bəlli media orqanları bunu təhlükəli hal kimi təqdim etməyə çalışırlar. Çünki onlar düşmənçilikdən, nifrətdən bəslənirlər. O cümlədən, Ermənistanı himayə edən Fransa da maraqlı deyil ki, Türkiyə ilə sərhədlər açılsın. Çünki sərhədlərin açılması düşmənçiliyin ortadan qaldırılması, qondarma "genosid" iddialarının arxa plana keçməsi anlamına gəlir. Bu səbəbdən hər vasitə ilə çalışırlar ki, cəmiyyəti qorxutsunlar. İctimai rəyi buna qarşı kökləsinlər. Halbuki, sərhədlərin açılması daha çox Ermənistanın manafeyinə uyğundur. Söhbət məsələnin sosial-iqtisadi tərəflərindən gedir".
Vidadi ORDAHALLI
