Elşad Həsənov: "Fransa Azərbaycana təzyiq etdi nəyə nail oldu ki, Kanada da nail olsun?"
Kanadanın xarici işlər naziri Melani Coli bəyan edib ki, ölkəsi münaqişənin danışıqlar və siyasi həll yolu ilə çözülməsi, özbaşına saxlanılan erməni məhbusların azad edilməsi, Ermənistanın ərazi bütövlüyünə hörmətlə yanaşılması üçün Azərbaycana təzyiq göstərməyə davam edəcək.
O məqsədlə ki, Azərbaycan Ermənistanın ərazi bütövlüyünə hörmət edib, güc tətbiq etməkdən və hədələyici ritorikadan çəkinsin.
Belə görünür ki, Kanadanın "erməni damarı" yenidən tutub. Bu, həmin Kanadadır ki, 44 günlük Vətən müharibəsinin ilk günlərində erməni separatçılarının mənafeyindən çıxış etməyə, Azərbaycana böhtanlar yağdırmağa başladı. Həmçinin "Bayraqdar" PUA-larına görə Türkiyəyə qarşı embarqo tətbiq etdi. Daha sonra Kanada Ermənistandakı Avropa İttifaqının mülki müşahidə missiyasına qoşuldu.
"Erməni lobbisinin sifarişi ilə belə siyasət aparmaq son nəticədə bu ölkənin öz dövlət maraqlarına zərər vuracaq"
Sözügedən məsələni "Bakı-Xəbər"ə şərh edən siyasi ekspert Elşad Həsənov hesab edir ki, Kanadanın ermənilərə "xüsusi sevgisi" var: "Məsələ ondadır ki, Kanadada erməni diasporası güclüdür. Üstəlik, Avroittifaqın mülki müşahidə missiyasında Kanada da yer alıb. Aydın məsələdir ki, onlar kəşfiyyatçılardan ibarətdilər. Təəccüb doğuran məqam odur ki, Kanada uzun illər separatizm təhdidi ilə üz-üzə olduğu halda erməni separatçılarına qahmar çıxır. Məsələ ondadır ki, Kanadanın Kvebek əyalətində fransız azlığı uzun illərdir müstəqilliyə can atır. Bu baxımdan erməni separatçıların tərəfini saxlamaq Kanadanın öz milli maraqlarına ziddir. Nəzərə almaq lazımdır ki, Azərbaycan ərazilərinin işğalı ilə bağlı BMT Təhlükəsizlik Şurasının 4 qətnaməsi var. Ötən 30 ildə bu qətnamələrdən çıxış edərək Kanada bir dəfə ermənilərə qarşı səsini çıxarmadı. İndi hansı üzlə Azərbaycanı ittiham edirlər? Heç bir ölkə bizə təzyiq göstərə bilməz. O cümlədən, Kanada. Azərbaycan suveren dövlət olaraq gərəkən addımları atıb. 2023-cü ilin sentyabrında keçirilən antiterror əməliyyatları nəticəsində Azərbaycan öz suverenliyini Qarabağda tam bərqərar etdi. Kanada bilməlidir ki, Qarabağ erməniləri könüllü olaraq oranı tərk edib. Fransa Azərbaycana təzyiq etdi nəyə nail oldu ki, Kanada da nail olsun? Heç nəyə nail olmayacaqlar. Çünki Azərbaycan Fransa kimi ölkənin casus şəbəkəsini ötən il ifşa etdi. Nəticədə Fransa kəşfiyyat orqanının rəhbəri istefaya getməli oldu. Ona görə də Kanada bütün bunlardan nəticə çıxarmalıdır. Çünki Azərbaycan nə edirsə onu beynəlxalq hüquq normaları çərçivəsində edir. Ona görə də Kanada kimi ölkə Azərbaycana təzyiq göstərə bilməz. Erməni lobbisinin sifarişi ilə belə siyasət aparmaq son nəticədə Kanadanın öz dövlət maraqlarına zərər vuracaq. Rəsmi Kanada anlamalıdır ki, Cənubi Qafqazın açar dövləti Azərbaycandır. Orta Asiya ölkələrinə gedən yol Azərbaycandan keçir. Ona görə də belə qərəzli siyasətə davam edərsə, bundan itirən tərəf Kanada olacaq".
Vidadi ORDAHALLI
