Daşdəmir Əliyev: "Fransa prezidenti bu açıqlaması ilə Ermənistanı növbəti müharibəyə təhrik etdiyini açıq biruzə verib"
Fransa Prezidenti Emmanuel Makron Böyük Britaniyanın Oksford şəhərində keçirilən Avropa Siyasi İcmasının Zirvə toplantısında növbəti dəfə Azərbaycana qarşı qərəzli mövqe nümayiş etdirib.
Makron tədbir çərçivəsində keçirdiyi mətbuat konfransında azərbaycanlı jurnalistlərin Fransanın Ermənistanı silahlandırması ilə bağlı suallarına cavab verərkən ölkəmizə qarşı ittihamlar səsləndirib.
Belə ki, o, 2020-ci ildə Azərbaycanın Ermənistanın təmas xəttindəki təxribatına və yaranmış eskalasiyaya cavab olaraq əks-həmlə əməliyyatlarını həyata keçirməsini ölkəmizin müharibəyə başlaması kimi təqdim edib.
Halbuki, Azərbaycan 2020-ci il sentyabrın 27-də başlayan sözügedən əməliyyat nəticəsində BMT Təhlükəsizlik Şurasının 822, 853, 874, 884 saylı qətnamələrinin və ATƏT-in qərarlarının icrasına nail olub. Bununla da, 44 günlük Vətən müharibəsindən sonra Azərbaycan özünün ərazi bütövlüyünü bərpa edə bilib.
Bununla yanaşı, o, ölkəsinin Ermənistanı silahlandırmasına haqq qazandıraraq, bunları deyib: "Bu, təbii haldır. İki suveren ölkə müdafiə sahəsində əməkdaşlıq edir. Hansısa bir dövlətin özünü silahlandırması normal haldır".
Belə qənaətə gəlmək olarmı ki, Oksford görüşündən sonra Fransanın Ermənistanı silahlandırması daha da güclənəcək?
Hərbi-siyasi şərhçi, ehtiyatda olan polkovnik-leytenant Daşdəmir Əliyev "Bakı-Xəbər"ə açıqlamasında bildirdi ki, hazırda Ermənistanla Azərbaycan arasında sülh danışıqları davam etdiyi bir vaxtda E.Makronun bu cür qərəzli fikirlər səsləndirməsi Fransanın sülh prosesinə mane olmaq cəhdlərinin daha bir bariz nümunəsidir: "Rəsmi Paris Ermənistanı silahlandırdığını heç kimdən gizlətmir, bunu açıq etiraf edir. Bir müddət əvvəl Fransanın müdafiə naziri Sebastyan Lekornu öz paylaşımında bildirib ki, onlar Ermənistanla müdafiə əlaqələrini gücləndirməyə davam edir. Yeni mühüm mərhələ "CAESAR" özüyeriyən artilleriya qurğularının alınmasına dair müqavilənin imzalanması oldu. Ermənistana satılacaq "CAESAR"ların dəqiq sayı açıqlanmasa da, baş verənlər Fransanın Cənubi Qafqazda eskalasiyanı yeni və təhlükəli mərhələyə daşıdığını göstərir. Rusiya-Ukrayna müharibəsində də aktiv tətbiq olunan "CAESAR" haubitsaları müharibənin gedişatını dəyişməsə də, ciddi dağıdıcı gücə malikdir. Azərbaycanla qısa zamanda sülh müqaviləsi imzalamağa hazır olduğunu deyən Ermənistanın isə bu kalibrdə və gücdə artilleriya sistemləri əldə etməsi üçün heç bir ciddi hərbi ehtiyacı ola bilməz. "CAESAR"ları satın almaqla Ermənistan əslində Azərbaycanla revanşa hazırlaşdığını, Fransa isə bu silahları satmaqla rəsmi İrəvanı müharibəyə hazırladığını açıq ortaya qoyur. Ermənistanın Fransadan 3 ədəd GM200 radar sistemi, 50 ədəd "Bastion" tipli zirehli texnika satın alması və "Mistral" qısa mənzilli hava hücumundan müdafiə sistemlərinin gələcəkdə alınmasına dair imzaladığı müqavilə ilə başlanan revanşa hazırlıq prosesinin tərkib hissəsi sayılmalıdır.
Ermənistanda tez-tez hərbi təlimlərin keçirilməsi, ehtiyatda olan hərbçilərin təlim toplanışlarının aparılması, yerli hərbi sənaye şirkətlərinə bu il 495 milyon dollar həcmində sifarişlərin verilməsi təhlükəli tendensiyadan xəbər verir. Fransa prezidenti bu açıqlaması ilə Ermənistanı növbəti müharibəyə təhrik etdiyini açıq biruzə verib".
Azərbaycan Xarici İşlər Nazirliyi isə öz növbəsində E.Makronun ənənəvi bu qərəzli mövqeyinə münasibət bildirərək qeyd edib ki, münaqişənin sülh yolu ilə həllinə töhfə verməyən, Ermənistanın Azərbaycan ərazilərinin işğalına son qoymasının qarşısını alan məhz Fransa kimi dövlətlərin Ermənistanın 30 ilə yaxın müddətdə təcavüzünü ört-basdır edən siyasəti olub: "Fransa tərəfinə xatırladırıq ki, Azərbaycanın suveren ərazilərində Ermənistanın 30 il davam edən işğalına son qoymaq, Azərbaycanın suverenliyini və ərazi bütövlüyünü bərpa etmək üçün apardığımız müharibə ölkəmizin beynəlxalq hüquq çərçivəsində legitim hüququ idi. Azərbaycanın istənilən səyi, o cümlədən hərbi potensialının gücləndirilməsi ədalətli məqsədə yönəlib və yönəlməkdədir. Lakin, bunu işğalçı dövlət olan Ermənistana münasibətdə söyləmək olmaz.
30 ilə yaxın Azərbaycan ərazilərini işğal altında saxlayan, bir milyona yaxın azərbaycanlını öz doğma yurd-yuvasından didərgin salmış, kütləvi qırğınlar və insanlığa qarşı cinayətlər törətmiş Ermənistanın Fransa tərəfindən sülhsevər ölkə kimi təqdim edilməsi bu ölkənin həm vasitəçilik dövründə, həm də 44 günlük vətən müharibəsindən sonra apardığı siyasətin nə qədər ədalətsiz olduğunu nümayiş etdirir".
Məhəmmədəli QƏRİBLİ
