Elxan Şıxəliyev: "Bu, müharibəyə də, Ermənistanın geri dönüşünə də gətirib çıxara bilər"
2024-cü il martın 17-də NATO-nun baş katibi Yens Stoltenberqin Azərbaycana ikigünlük rəsmi səfəri baş tutdu. Azərbaycana rəsmi səfəri zamanı onu Prezident İlham Əliyev qəbul edərək, onunla bir sıra məsələlərlə bağlı müzakirələr aparıb. O cümlədən, NATO ilə əməkdaşlıq, Ermənistanla sülh prosesinin vəziyyəti ilə bağlı fikir mübadiləsi aparıb.
Prezident İlham Əliyevin NATO-Azərbaycan münasibətlərini yaxşı əməkdaşlığın 30 ili kimi xarakterizə etməsinin qarşılığında Yens Stoltenberq "Azərbaycan NATO-nun çoxdankı əməkdaşıdır və mən bu əməkdaşlığın daha da möhkəmləndirilməsinə ümid bəsləyirəm" - deyə bildirib. Bunun ardınca həm Ermənistan, həm də Azərbaycan ABŞ-nin paytaxtı Vaşinqtonda keçirilən NATO sammitində iştirak edib. Ancaq çox maraqlıdır ki, Əliyevin və Paşinyanın NATO ilə təmaslarına Kremlin fərqli reaksiyaları müşahidə olunur. Moskva Azərbaycanın bu təmaslarına olduqca loyal, Ermənistanın bu yöndə gedişlərinə isə aqressiv münasibət sərgiləyir. Səbəb nədir?
Hərbi-siyasi şərhçi, ehtiyatda olan polkovnik-leytenant Elxan Şıxəliyev "Bakı-Xəbər"ə açıqlamasında bildirdi ki, Ermənistanın NATO ilə əməkdaşlığı üzərinə bir niyyəti var: "Bunu da Rusiya hiss edir. Son zamanlar Ermənistanda ABŞ ilə hərbi təlimlər keçirirlər. Sonrakı mərhələdə ABŞ Müdafiə nazirliyi səviyyəsində Ermənistana müşavirini təyin etdi və davamlı olaraq orada çalışacağını qeyd etdi. Bu planlar onu göstərir ki, həm Ermənistan Avroatlantik məkana inteqrasiya olunmaq istəyir, həm də gələcəkdə NATO ilə əməkdaşlığını genişləndirməyə çalışır. ABŞ da Ermənistanın Rusiyadan uzaqlaşdırılmasında maraqlıdır. Onun əraziləri coğrafiyada strateji ərazidir. Gələcəkdə o ərazilərə hakim olmaq üçün Ermənistanı cəsarətləndirirlər, təhrik edirlər. Əvvəlcə bunu Gürcüstana, sonra Ukraynaya etdilər. Onlar da müharibəyə sürükləndilər. Dördüncü olaraq, potsovet ölkələrindən Ermənistan buna həvəslənir. Rusiyadan gələn reaksiyalar da adekvatdı. Rusiya deyir ki, NATO - nun Şərqə doğru genişlənməsi Rusiya ilə müharibəyə səbəb ola bilər. Bu dediyim ölkələrdə müharibə səbəbi elə bu olmuşdu. Əslində, Ermənistanı cəsarətləndirmə səbəbləri odur ki, gələcəkdə mümkün ola biləcəksə, Rusiya-Ukrayna müharibəsində Rusiya məğlubiyyətə uğradılsın, Ermənistan ərazisindən çəkilsin və 102 - ci bazanı çıxarsın. Bu boşluğu ABŞ, Fransa və NATO qüvvələri doldursun. Rusiyanın da narahatlığı bunun üzərinədir. Əgər gələcəkdə Ermənistan bu ölkələrlə həqiqi əməkdaşlığa, müttəfiqliyə keçəcəksə, Ermənistan ərazisində bu qüvvələrin gücləri yerləşdiriləcək. Bu da Rusiyaya qarşı istifadə oluna bilər. Rusiya ilə bunun üzərindən Ermənistanın münasibətləri kəskinləşəcək, hətta müharibə fazasına qədər gəlib çıxacaq. Ermənistan bu yolu seçib əslində. Maraqlı olan ölkələr də düşünür ki, Ermənistan Rusiyanın təsiri altından NATO - nun təsiri altına keçə biləcəksə, bu yaxşı haldır. Rusiya bunu müharibə səbəbi edə bilər. Belə olduğu halda da, NATO sonda ölkələri dəstəkləmir. Cənubi Qafqaz üzərindən bir plan var. Bu, müharibəyə də, Ermənistanın geri dönüşünə də gətirib çıxara bilər. Nəticəni biz Rusiya-Ukrayna müharibəsinə uyğun olaraq görəcəyik".
Məhəmmədəli QƏRİBLİ
