Arzuman Abdulkərimov: "Bu bizi narahat etmir, çünki ilk olaraq Fransa bizə qarşı qərəzli davranıb, işğalçı Ermənistanı müdafiə edib"
İyulun 17-də Qvadelupanın Azadlığı Naminə Xalq Birliyinin təşkilatçılığı və Bakı Təşəbbüs Qrupunun dəstəyi ilə Fransa müstəmləkəçiliyindən əziyyət çəkən Korsika, Melaneziya, Polineziya, Karib və Antil adalar qrupundan olan 15-dən çox siyasi partiya və müstəqillik hərəkatlarının rəhbər şəxslərinin iştirakı ilə Bakıda birinci Qurultayın açılış mərasimi keçirilib.
Qurultayın keçirilməsi ideyası Fransanın dənizaşırı ərazilərinin müstəqillik uğrunda mübarizə aparan siyasi partiya və hərəkatlarına məxsusdur. Niderland koloniyaları olan Bonayre və San-Martin adalarından 3 təşkilat Qurultayın işində fəxri qonaq qismində iştirak edib.
Bəllidir ki, Fransa böyük ölkə və BMT TŞ-nin daimi üzvüdür. Bu mübarizənin perspektivi ilə bağlı ciddi müqavimət göstərmək imkanları var. Bakının rəhbərlik etdiyi bu təşəbbüs müstəmləkələrin taleyi və Azərbaycan-Fransa münasibətlərinə necə təsir edəcək?
Siyasi şərhçi Arzuman Abdulkərimov "Bakı-Xəbər"ə açıqlamasında bildirdi ki, Fransa müstəmləkə siyasətini israrla davam etdirdiyi üçün Bakı Təşəbbüs Qrupu yaradılıb: "Qeyd edək ki, Bakı Təşəbbüs Qrupu Azərbaycan Respublikasının sədrlik etdiyi Qoşulmama Hərəkatının Əlaqələndirmə Bürosunun nazirlər toplantısı çərçivəsində 2023-cü il iyulun 6-da Bakıda "Müstəmləkəçiliyin tamamilə aradan qaldırılmasına doğru" mövzusunda konfransın iştirakçıları tərəfindən yaradılıb. Artıq bir ildir ki, Qrup müstəmləkəçilikdən əziyyət çəkən xalqların azadlıq uğrunda apardıqları ədalətli mübarizəyə dəstək verir. Bu xüsusda, BTQ tərəfindən artıq 15-dək beynəlxalq konfrans təşkil edilib. Onlardan 4-ü BMT-nin Nyu-York, Cenevrə və Vyanadakı qərargahlarında, biri İstanbulda, digərləri isə Bakıda keçirilib. Təbiidir ki, bu mübarizənin ciddi effekti var. Nəticə göz qabağındadır. Fransa keçmiş müstəmləkələrindən qovulur. Həmin bölgələrdə Parisə qarşı etiraz aksiyaları səngimir, narazılıqlar günü-gündən daha da artır. Amma görünən odur ki, Fransa müstəmləkə siyasətindən asanlıqla əl çəkmək istəmir. Keçmiş müstəmləkələrdə keçirilən aksiyalarda artıq konkret tələblər qoyulur, müstəqilliyin vacibliyi irəli sürülür. Bunun səbəblərindən biri də Bakıda keçirilən çoxsaylı beynəlxalq konfranslar, forumlardır. Həmin tədbirlərdə keçmiş koloniyaları təmsil edən şəxslər bildirdilər ki, artıq idarə edilmək istəmirlər. Ən əsası, məhz Bakıda keçirilən tədbirlərdə birgə fəaliyyət proqramı ortaya qoyulub. Bakıda Fransanın müstəmləkə mahiyyətinin ortaya qoyulduğu tədbirlər öz konkret nəticəsini göstərir. Artıq Azərbaycan paytaxtı hüquqları tapdalanan azsaylı xalqlar üçün ümid yerinə çevrilir və proses davam edəcək. Təbiidir ki, Bakının bu addımları Fransanın xoşuna gəlmir. Bu bizi narahat etmir. Çünki ilk olaraq Fransa bizə qarşı qərəzli davranıb, işğalçı Ermənistanı müdafiə edib. Biz də haqq-ədalətə söykənərək adekvat cavab veririk".
Məhəmmədəli QƏRİBLİ
