Ermənistan hakimiyyəti anti-Rusiya oyunları vasitəsilə Qərbdən şəxsi dividendlər almaq istəyir. Belə bir açıqlama ilə erməni politoloqu Suren Surenyants çıxış edib. O, amerikalı parlamentarilərin Ermənistana səfərini şərh edərkən bildirib ki, Rusiya bütün bu qəbildən olan halları qeydə alır.
Xatırladaq ki, senator Rocer Uikerin başçılıq etdiyi ABŞ Konqresinin nümayəndə heyəti iyulun əvvəlində Ermənistana səfər edib. Ermənistan Milli Assambleyasında baş tutan görüşdən sonra erməni spiker və ABŞ konqresmenləri brifinq keçirərək "rus ayısı"nın təhlükəsi barədə xəbərdarlıq ediblər. Surenyantsın sözlərinə görə, parlamentdəki brifinq zamanı tərəflərin İrəvanla Vaşinqton arasında əməkdaşlığın müxtəlif aspektləri barədə danışacağı gözlənilirdi: "Ancaq biz gördük ki, Ermənistana gələn amerikalı tərəfdaşlar İrəvanın Rusiya əleyhinə bəyanatlarına diqqət yetirib, hələ bunlar azmış kimi, Azərbaycanı da Rusiya əleyhinə mövqe tutmağa çağırıblar". Ekspertin sözlərinə görə, bu bəyanatların iki mənası var: "Birincisi, Ermənistanın subyektivliyi o qədər kiçikdir ki, xarici tərəfdaşlar da buna bənzər mənfur münasibət nümayiş etdirirlər. İkincisi, Ermənistan hakimiyyətinin Qərb siyasəti sırf anti-Rusiya xətti üzərində qurulub və amerikalı konqresmenlərlə görüşdə heç bir faydalı gündəm olmayıb. Baxmayaraq ki, inkişaf baxımından tərəflərin müzakirə edəcəyi çoxlu sahə var. Ancaq bizim hakimiyyət anti-Rusiya oyunları yolu ilə Brüssel və Vaşinqtondan dividendlər almağa qərar verdi və bunun ölkəyə, vətəndaşlara heç bir faydası olmayacaq. Qərblə bizim institusional əlaqələrimiz yoxdur. Məqsəd Ermənistan üçün dağıdıcı ola biləcək anti-Rusiya kursu vasitəsilə Vaşinqtonu və Brüsseli razı salmaqdır".
Onun sözlərinə görə, hakimiyyət daim Avropaya inteqrasiyadan danışır, Aİ-yə daxil olmaq üçün referendum keçirmək istəyir. Halbuki, 2017-ci ildə imzalanmış Ermənistan-Avropa İttifaqı sazişi müddəalarının cəmi 40-45 faizi yerinə yetirilib. Elə rusiyalı ermənipərəst ekspert Stanislav Tarasov da bunlar fonunda İrəvanı hədələyir. Onun sözlərinə görə, proseslərə əsasən, Putinlə Paşinyanın münasibətlərində nəsə baş verib: "Rusiya Paşinyana etibar etməyi dayandırıb. Nə baş verdiyini deyə bilmərəm, təbii ki, səbəbin nə ola biləcəyini güman edirəm, amma açıqlaya bilmərəm, çünki sübutum yoxdur. Amma bir şey aydındır: iki ölkənin rəhbərliyi arasında yadlaşma var. Bizim bütün tənqidlərimiz ermənilərə deyil, konkret rəhbərlik və konkret baş nazirə qarşı yönəlib. Biz erməni xalqına mənfi münasibət göstərmirik: Rusiyada Ermənistandan daha çox erməni yaşayır, üstəlik Rusiya vətəndaşlığını almış ermənilər karyera qururlar, orduda xidmət edirlər, Ukraynada döyüşürlər. Şüuraltımızda belə onları ikinci dərəcəli insanlar hesab etmirik, onlar tamhüquqlu vətəndaşlardır. Bu səbəbdən Ermənistanda rusofobik bəyanatlar veriləndə biz təəccüblənirik". Tarasov iddia edib ki, Paşinyanın hakimiyyətə gəlişi Rusiyanın səhvi idi: "Moskva Paşinyanın hakimiyyətə gələcəyini bilirdi, amma prosesin qarşısını almaq üçün heç nə etmədi. Biz bundan sonra nə olacağını bilirdik. Bir sözlə faciə". Onun sözlərinə görə, Ermənistanda Ukrayna məsələsini çox şişirdirlər: "Deyirlər ki, Rusiya Ukrayna ilə məşğuldur. Bəli, məşğuldur, biz müharibədəyik və müharibədə ciddiyik, amma nə vaxt qalib gəlsək, fərqli olacağıq, onları narahat edən, qəzəbləndirən də budur. Biz artıq bir sıra postsovet dövlətlərinin məsuliyyətsiz bəyanatlarına dözməyəcəyik. Hamını narahat edən budur. Görün, Avropada nələr baş verir. Makron itirdi, Şolts uduzur, Bayden uduzur, İngiltərə böhranın astanasındadır. Bunu cəmi yarım il əvvəl təsəvvür edə bilərdinizmi? Ukraynanı bir kənara qoyun, görün nə hadisələr gedir".
Rusları narazı salan daha bir məqam odur ki, 15-24 iyul tarixlərində Ermənistanda ABŞ və erməni hərbçilərinin iştirakı ilə "Eagle Partner" hərbi təlimləri keçiriləcək. Analoji adda təlimlərin ilk hissəsi ötən ilin sentyabrında yenə Ermənistanda baş tutub. Özü də bunlar o fonda baş verir ki, İrəvan Rusiya, KTMT ilə birgə təlimlər keçirməkdən imtina edir. Amma ABŞ-la son bir il ərzində artıq ikinci təlim keçirilir. Budəfəki təlimlərdə Ermənistan silahlı qüvvələrinin sülhməramlı briqadası, ABŞ ordusunun Avropa və Afrikadakı hərbi qulluqçuları və Kanzas Milli Qvardiyası iştirak edəcək. Bildirilir ki, təlimin keçirilməsində məqsəd beynəlxalq sülhməramlı missiyalarda iştirak edən bölmələrin koordinasiya səviyyəsinin yüksəldilməsi, idarəetmə və taktiki rabitə sahəsində təcrübə mübadiləsinin aparılması, döyüş hazırlığının artırılmasıdır. Ermənistanın ABŞ-la bu kimi əməkdaşlığı onu Rusiyadan daha bir addım uzaqlaşdırır. Onu da qeyd edək ki, ABŞ ilə Ermənistan arasında keçiriləcək təlimlər əvvəlcə Gürcüstanla nəzərdə tutulmuşdu. Amma Gürcüstanda baş verən hadisələr, rəsmi Tiflisin mövqeyi ona səbəb oldu ki, ABŞ həmin təlimləri Ermənistanla keçirməyə qərar verdi. Deməli, ABŞ istənilən vaxt Ermənistana öz istəyini diqtə edə bilir. Elə Rusiyanı da narazı salan budur və Kreml hadisələrin bu səpkidə inkişafına dözmək niyyətində deyil.
Ramil QULİYEV
