Elşən Həsənov: "Azərbaycanda kriminogen və təhlükəsizliklə bağlı vəziyyət ciddi nəzarətdədir və inanmıram ki, hər hansı təhlükə mövcud olsun"
Bakıda Azərbaycan Böyük Mason Lojasının Məclisi keçirilib. Dünyanın müxtəlif ölkələrindən olan loja üzvləri Azərbaycana gəlib. Bu barədə Rusiya Böyük Mason Lojasının səhifəsində məlumat verilib. Toplantı iyunun 28-də baş tutub.
Məxfi keçirilmiş iclasda müzakirə edilmiş məsələlər barədə məlumat verilməyib.
"Azərbaycan Milli Böyük Lojası" nın rəsmi açıqlamasında vurğulanıb ki, Azərbaycanda Azad Masonluğun qurulması layihəsi Vashinqtonda qəbul olunmuş "Azerbaijan Lodge No.2001″in yaradılması ilə başlayıb:"Bir il sonra Vashinqton D.C. Böyük Lojası layihəyə qatılmaq üçün Moskva Böyük Lojasını dəvət edib. "2002-ci ildə onlar Moskvada "Drujba No.24" lojasını yaratdılar. 2003-cü ildə sıx dostluq əlaqələrinin nəticəsi olaraq, Vashington D.C. Böyük Lojası Türkiyənin "Nur Lodge 2000" Böyük Lojası ilə birlikdə Ankarada Demir Savaşçı tərəfindən icarəyə alınan "Xəzər Lojası No.1000" layihəsini yaratdılar".
Masonların Azərbaycanda keçirilmiş böyük toplantısı ilə bağlı Dini Qurumlarla İş üzrə Dövlət Komitəsinin sabiq sədri Rafiq Əliyev danışıb. O bildirib ki, Azərbaycanda masonların fəaliyyəti təxminən XX əsrin əvvəllərində başlayıb və yavaş-yavaş genişlənib: "Hazırda onların təşkilatı elə bir həddə gəlib çıxıb ki, masonlar Ədliyyə Nazirliyində təşkilatlarını qeydiyyatdan keçirmək üçün sənədlər təqdim ediblər:
"Masonların fəaliyyəti də nurçular kimidir. Onların buradakı cavanlarla bağlı olan təşkilatı açıq şəkildə fəaliyyət göstərir. Bu, idman və turizmlə bağlı təşkilatdır. Azərbaycanda masonlar öz təşkilatları vasitəsilə bizim idmançıları başqa ölkələrə göndərirlər. Bizim bir qrup idmançını İrana da göndərmişdilər. Masonlar Azərbaycanda fəaliyyət göstərirlər, sadəcə, bu fəaliyyət görünmür. Çünki gizli işləyirlər. Gizli fəaliyyət onları motivləşdirir. Masonların üzvləri bir-birini himayə edirlər. Bir-birindən ötrü nə istəsən edərlər. Bu çox vacib amildir. Masonların özlərinin də etiraf etdiyinə görə, dövlət qurumlarında, siyasət sahəsində adamlarını yerləşdirirlər. Öz saylarını artırıb, nüfuzlarını genişləndirirlər".
Hər halda, biz massonların fəaliyyəti ilə bağlı yaxşı nəsə eşitməmişik. Onların adları daha çox çevrilişlərdə və digər qaranlıq işlərdə hallanıb. Onda sual yaranır: belə pis niyyətli təşkilatın Azərbaycandakı geniş fəaliyyətilə bağlı bizim rəsmi orqanlar niyə danışmır?
Təhlükəsizlik məsələləri üzrə ekspert Elşən Həsənov "Bakı-Xəbər"ə açıqlamasında bildirdi ki, mason sözü ingilis dilində olan "freemason" sözündən yaranıb və tərcüməsi azad bənna deməkdir. Çünki təşkilatı ilk dəfə bənnalar yaradıb. Həmin bənnalar məhz Süleyman peyğəmbər üçün məbəd tikiləndə bir araya gəliblər. Hətta təşkilatın simvolunda da tikinti pərgarı və üçkünc xətkeş işarəsi var. Onların ideologoyasına görə, Allah da dünyanın memarıdır. Masonluq müxtəlif formalarda mövcud olub, üzvlərinin vahid mənəvi və metafiziki idealları bölüşməsi ilə səciyyələnir. Bunlardan ən birincisi Ali Varlığa inamdır. Masonlar həmin varlığın adlandırılmasında Kainatın ulu memarı ifadəsindən istifadə edirlər. Bilirsiniz ki, Azərbaycan hüquq-mühafizə və xüsusi xidmət orqanları çox peşəkarcasına çalışırlar. Mən əminəm ki, onların ölkədə baş verən ən xırda hadisədən belə məlumatları var. Əgər hansısa keçmiş məmur belə ciddi iddia ortaya qoyursa və bunlar barədə məlumatlıdırsa, onda niyə zamanında tədbir görməyib? Bizim rəsmi qurumların bu məsələ ilə bağlı susmasına iki aspektdən yanaşmaq olar. Ya yayılan məlumatlar həqiqəti əks etdirmir, ya da həmin dərnək ciddi problem yaratmır. Əks təqdirdə, bu istiqamətdə ciddi tədbirlər görülə bilərdi. Azərbaycanda kriminogen və təhlükəsizliklə bağlı vəziyyət ciddi nəzarətdədir və inanmıram ki, hər hansı təhlükə mövcud olsun".
Məhəmmədəli QƏRİBLİ
