Emin Həsənli: "Yaxın zamanlarda NATO bu nöqsanları aradan qaldırmağa müvəffəq olmayacaq"
NATO Baş katibi Yens Stoltenberq Vaşinqtonda deyib ki, Ukrayna münaqişəsi alyansın tezliklə aradan qaldırmalı olduğu NATO qüvvələrinin hazırlığı və qarşılıqlı fəaliyyətində əhəmiyyətli boşluqları üzə çıxarıb:
"Ukraynadakı müharibənin reallığı təkcə ehtiyatlarımızın və istehsal imkanlarımızın çox aşağı olduğunu nümayiş etdirmədi, həm də qüvvələrimizin qarşılıqlı fəaliyyətində böyük boşluqları nümayiş etdirdi.
Ən məşhur nümunə birgə fəaliyyətə hazır olmalı Almaniya-Niderland briqadasıdır. Niderlandın malik olduğu standart 155 mm-lik sursat Almaniyanın haubitsalarında istifadə üçün uyğun olmadı. Bu, qüvvələrin uyğunlaşmasının tam əksidir".
Hərbi-siyasi şərhçi Emin Həsənli "Bakı-Xəbər"ə açıqlamasında bildirdi ki, Rusiya-Ukrayna müharibəsi NATO mövzusunu yenidən gündəmə gətirdi. SSRİ dağıldıqdan sonra fikirlər vardı ki, NATO-ya gərək yoxdur. Xüsusən də Almaniya ilə Fransa yaxın gələcəkdə Avropa ordusu yaratmağı düşünürdü. ABŞ bunu qəbul etmədi. Çünki ABŞ "Marşal" planı ilə Avropanı dirçəltmişdi. Düşünürdü ki, dünyanı nəzarətdə saxlamağın yolu Avropanı nəzarətdə saxlamaqdan keçir. Əvvəlcə, NATO-nu terrorla mübarizə adı ilə fəallaşdırdılar. Sonra Rusiya Gürcüstana hücum edəndə bir qədər fəallaşdılar. Avropa ölkələri daha çox ticarət dövriyyəsini Çin və Rusiya ilə edirdi. Almaniya kansleri Merkel 11 dəfə Çinə səfər etmişdi. Düşünürdülər ki, ABŞ-dan uzaqlaşmaq baxımından bu olduqca önəmlidir. İndi isə onlar NATO ilə birgə addımlamaq zorundadırlar. Bunun sona qədər davam edəcəyinə inanmaq sadəlövhlük olardı. Birgə müharibə aparmağa gəldikdə isə, burada ciddi problemlər yaşanır. Onlar qorxur ki, Rusiya hansısa NATO ölkəsinə hücum edər bə bununla da müharibənin miqyası genişlənə bilər. Bilirsiniz ki, Birinci Dünya müharibəsi kiçik bəhanə ilə başlayıb. Hazırda da Rusiyanın əlində belə bir bəhanə var. Elə bir vəziyyət yaranıb ki, nə Rusiya tam olaraq Ukraynanı işğal edə bilir, nə də Ukrayna onları ərazisindən çıxarmağı bacarır. NATO-nun birlikdə hərəkət etməsi: həm siyasi, həm də taktiki baxımdan problem yaradır. Bunun nəticəsində ortaya çıxan problemləri özləri də etiraf edir. İsveç bu yaxınlarda 18 yaşındakıların çağrışına başladı. Düşünürdülər ki, Azərbaycan kimi ölkələr də NATO kimi peşəkar ordu sisteminə keçsin. Görürlər ki, çağırış sistemi olmasa, peşəkar orduya yer olmayacaq. Əsgər çağırışa gəlməlidir ki, sonra qalıb müqavilə əsasında fəaliyyət göstərsin. Bu müharibə NATO-nun bir çox boşluqlarını üzə çıxardı. Həmçinin Rusiyanın böyük boşluqlarını göründü. Bunlar özünü həm səfərbərlik sistemində, həm də orduda göstərdi. Bir çox Avropa ölkəsinin ordularındakı silah və sursatdan istifadə qaydaları kəskin fərqlənir. Hesab edirəm ki, əsgərlərin hazırlığı baxımından da böyük fərq nəzərə çarpır. NATO iki ölkəyə daha çox güvənib: ABŞ və Türkiyəyə. Birinin texnologiyalarına, digərinin isə quru qoşunlarına inamı çoxdur. Yaxın zamanlarda NATO bu nöqsanları aradan qaldırmağa müvəffəq olmayacaq".
Məhəmmədəli QƏRİBLİ
