Fuad İbrahimov: "Rəqəmsal iqtisadiyyatın tətbiqi iştirakçı ölkələr arasında ticarətin həcminin artmasına səbəb olacaq"
"Regional ticarət həcminin davamlı artdığını məmnunluq hissi ilə qeyd edirlər, qarşıdan gələn illərdə ticarət həcminin həqiqi potensialına çatdırılması üçün konkret tədbirlərin görülməsi barədə razılığa gəlirlər, beynəlxalq öhdəliklərə riayət etməklə ticarətdə texniki maneələrin aradan qaldırılmasının və DEPA (Rəqəmsal İqtisadiyyat üzrə Tərəfdaşlıq Sazişi) mətni üzrə müzakirələrin tamamlanmasının sürətləndirilməsinin vacibliyini vurğulayırlar".
Bu fikirlər bir neçə gün əvvəl Türk Dövlətləri Təşkilatının (TDT) Şuşada keçirilən qeyri-rəsmi Zirvə toplantısında imzalanan "Qarabağ Bəyannanməsi"nin 8-ci bəndində qeyd edilib.
"Qarabağ Bəyannaməsinin" maddələrindən biri Rəqəmsal İqtisadiyyat üzrə Tərəfdaşlıq Sazişinin hazırlanması və imzalanması ilə bağlıdır. Bu da, əlbəttə, olduqca diqqət çəkən məsələdir.
"Rəqəmsal İqtisadiyyat üzrə Tərəfdaşlıq Sazişinin hazırlanması və imzalanması məsələsinin bəyannamədə öz ifadəsini tapması olduqca müsbət haldır"
Şuşa zirvəsində verilən bu qərara şərh verən iqtisadçı ekspert Fuad İbrahimov "Bakı-Xəbər"ə şərhində bildirdi ki, TDT-ya üzv dövlətlərin Şuşa Zirvəsində imzaladığı "Qarabağ Bəyanmanəsi"ndə Rəqəmsal İqtisadiyyat üzrə Tərəfdaşlıq Sazişinin hazırlanması və imzalanması kimi mühüm məsələnin öz əksini tapmasının böyük effekti var: "Rəqəmsal İqtisadiyyat üzrə Tərəfdaşlıq Sazişinin hazırlanması və imzalanması məsələsinin bəyannamədə öz ifadəsini tapması olduqca müsbət haldır. Bu proses həyata keçirildikdən sonra biz çox effektiv nəticələrin əldə olunduğunun şahidi olacağıq.
İqtisadiyyatda, ticarətdə və başqa sahələrdə rəqəmsal tətbiqin gerçəkləşdirilməsi çox mühüm əhəmiyyətə malikdir".
F.İbrahimov hesab edir ki, bu, türk dövlətləri arasında ticarət sahəsində əlaqələri daha da optimallaşdıracaq, əlaqələri gücləndirəcək.
O bildirdi ki, rəqəmsal varlığın tətbiqi müasir dövrün tələbidir. "Biz Azərbaycan olaraq çox böyük sürətlə dünyada gedən inkişaf prosesinə qoşulmuşuq, inteqrasiya etmişik. Bu gün də müasir dövrün tələblərinə uyğun keçidlərdə sürətlə iştirak edirik. Bunlardan da biri rəqəmsal varlığa keçiddir. Məsələn, elektron pul sistemi açılır. Yəni biz artıq vətəndaşlarımıza manatımızın elektronlaşması imkanlarını veririk. İnternet şəbəkələrində insanların hərəkətlərini sərbəstləşdirmək üçün bu addımlar atılır. Müasir dövrün tələbi rəqəmsal yanaşmadır.
Biz artıq heç yerə getmədən rəqəmsal tətbiqlər vasitəsilə ödənişlərimizi edirik. Bu, əlbəttə, rəqəmsal dünyanın göstəricilərdir.
O cümlədən də ticarətdə rəqəmsal iqtisadiyyatın tətbiq prosesi həyata keçərsə, bu müsbət haldır. Necə ki, bu məsələ "Qarabağ Bəyannaməsinin" 8-ci bəndində öz əksini tapır. Rəqəmsal tətbiq nəticəsində ticarətin stimullaşdırııması, həcminin artırılması daha çevik şəkildə baş verir. Rəqəmsal iqtisadiyyatda, birinci, insan faktorundan kənarlaşma var. İkincisi, nəzərə almaq lazımdır ki, rəqəmsal yanaşma sürət baxımından çox vacib məsələdir. Dünya iqtisadiyyatında məhz zaman və infrastruktur baxımından şərtlər Azərbaycanda qorunaraq tətbiq olunur. Bu nöqteyi-nəzərdən qiymət əmələgəlmə prosesinə təsir edən ən mühüm, vacib məqamlardan biridir. Bu da öz növbəsində rəqabəti stimullaşdırır.
Rəqəmsal iqtisadiyyatın tətbiqi iştirakçı ölkələr arasında ticarətin həcminin artmasına səbəb olacaq. Eyni zamanda regionda qonşuluq siyasətinin stimullaşdırılmasında rol oynayan vacib amildir. Bu əsas məqsədlərdən biridir. Əlbəttə, düşünürəm ki, dövrün tələblərinə uyğun addımlar atılır.
Bilirsiz, dövrün tələbinə uyğun addımlar çox ölkələrdə atıla bilər. Ancaq bunun əsas nəticə etibarı ilə gözəlliyi ondadır ki, doğrudan da bir nəticəsi, icra mexanizmi olsun".
Müsahibimz vurğuladı ki, Azərbaycan iştirakçısı olduğu bütün beynəlxalq layihələri uğurla həyata keçirib. "Azərbaycan həyata keçirdiyi layihələr nəticəsində Şərqlə Qərb arasında ən elastik bir dəhlizə çevrilib. Bu gün Şimalla Cənub arasında bu proses tamamlanma mərhələsindədir. Bu mənada, əlbəttə, idarəetmənin, baxışların, iqtisadi konfiqurasiyaların rəqəmsal olması birmənalıı şəkildə müasir dövrün tələblərinə cavab verir. Bütün bunlar bəyannamənin məlum müddəasında göstərilən məqsədlərə çatmağa şərait yaradacaq"-deyə müsahibimiz vurğuladı.
İradə SARIYEVA
