Akif Nağı: "Əli hər şeydən üzülən Fransa indi də heç bir gücü, heç bir səlahiyyəti olmayan "Frankofoniya" deyilən qondarma bir təşkilatın adından Azərbaycana qarşı əsassız qətnamə qəbul edib"
Dildə sülhdən danışsa da, normallaşma istəyini əldə bayraq etsə də, ölkəmizin ərazi bütövlüyünü tanıdığını rəsmən bəyan etsə də, məqsədi və niyyəti ilə bunun tam əksini göstərən Ermənistan tərəfi, bir qayda olaraq, Azərbaycanın ərazi bütövlüynə qarşı təxribatını davam etdirir, qondarma "erməni irsi" və "erməni qaçqın və köçkünləri" iddiasından əl çəkmir.
Bir müddət əvvəl "Ermənistan Respublikasının ərazi bütövlüyü və Dağlıq Qarabağ erməniləri haqqında" qətnamə qəbul edib. Erməni mediasının yaydığı məlumata görə, bu barədə Ermənistan Parlamentinin deputatı Arman Eqoyan Facebook səhifəsində yazıb.
Başdan-başa böhtandan ibarət olan bu kağız parçasında Azərbaycanın "işğalçı" kimi qələmə verilməsi doğrudan da absurddur. Yazırlar ki, 2023-cü il sentyabrın 19-da Qarabağdan guya 100 mindən çox erməni "məcburi köçkünə" çevrilib, guya Azərbaycan Ermənistanın "ərazi bütövlüyünü pozmaqda davam edir".
Frankofoniya Parlament Assambleyasının çıxardığı üzdəniraq kağız parçasında əks olunan uydurma fikirlərə baxanda açıq-aşkar bu qurumun erməni mafiyasının əlində alətə, kuklaya çevrildiyini görməyə bilmirsən. Burada "Azərbaycanı
Ermənistanın öz sərhədləri daxilində suverenliyinə və ərazi bütövlüyünə hörmət etməyə" çağıranlar unudurlar ki, Azərbaycan Ermənistanın ərazi bütövlüyünü tanıyır və bu ölkəyə qarşı heç bir ərazi iddiası yoxdur, Ermənistanın Azərbaycana qarşı ərazi iddiası birbaşa konstitutsiyasında öz əksini tapır. Eyni zamanda Azərbaycan 2023-cü il sentyabrın 19-da Qarabağı işğal etməyib, öz ərazisini separatçılardan təmizləyib, torpaqlarında suverenliyini bərpa edib. Azərbaycan öz ərazisi olan Qarabağda yaşayan erməni əhalisinə qarşı heç bir etnik təmizləmə siyasəti aparmayıb, onlar özləri könüllü şəkildə bizim torpaqlardan çıxıb gediblər. Qarabağda erməni mədəni və dini irsi olmayıb ki, ona qarşı hansısa bir addım da atılsın. Birincisi, Azərbaycan heç zaman başqa xalqların dini və mədəni irsinə düşmən münasdibət bəsləmir, ikincisi, əgər bizim ərazidə həqiqətən də erməni dini və mədəni irsi olsaydı, biz, ermənilərdən fərqli olaraq, onları da qoruyardıq. Biz vandal xalq deyilik, vandalizmin ən ağrılı tərəflərini Ermənistan Azərbaycan ərazilərini işağlda saxladığı dövrdə sərgiləyib. Qarabağdan gedən ermənilərin isə "qaçqın və məcburi köçkün" kimi qələmə verilməsi başdan-başa absurddur.
"Bu qətnamə Makronun növbəti sayıqlamasıdır"
"Frankofoniya PA-nın strukturunun "Dağlıq Qarabağ erməniləri və Ermənistanın ərazi bütövlüyü ilə bağlı" qətnamə qəbul etməsinə münasibət bildirən Azad Vətən Partiyasının sədri Akif Nağı "Bakı-Xəbər"ə bildirdi ki, "Frankofoniya" fransızdilli ölkələrin birliyidir və Fransa tərəfindən müstəmləkələri əlində saxlamaq məqsədilə yaradılıb. A.Nağı qeyd etdi ki, dünyada Fransadan başqa ikinci bir fransızdilli müstəqil dövlət yoxdur, vaxtilə Fransanın müstəmləkəsi olan dövlətlər fransız dilindən istifadə edirdilər. "Bu təşkilatın yaranması Fransanın müstəmləkəçilik maraqları ilə bağlı olub, bu da hazırda iflasa uğrayır, şəbəkələri də, bütün planları da dağılır. Ermənistanı da o təşkilata üzv ediblər. Absurd bir məsələdir ki, ermənilər fransızdilli olmadıqları halda, onları "Frankofoniya"ya üzv ediblər. Belə çıxır ki, bu, Fransanın mövqeyində dayananların bir ittifaqıdır, elə bir ciddi tərkibi də, ciddi təsir imkanları da yoxdur. Fransa bununla bacarıqsızlığını göstərir.
Fransa ilə müqayisədə müasir Azərbaycan dövləti cavan olsa da, dövlətçilik tarixi baxımından Azərbaycanın dövlətçilik ənənəsi Fransadan minillərlə çoxdur. Yəni Fransa dövləti yeni eranın birinci minilliyində yaranıbsa, Azərbaycanda dövlətçilik eradan əvvəl III minillikdən formalaşıb. Amma XIX-XX əsrlər hadisələri gedişində respublika tipli dövlətlərin yaranması baxımından fransızlar bir az bizdən qabaqdadırlar. Lakin bu gün də görsənir ki, qədim dövlətçilik ənənələrinə söykənən Azərbaycan Fransadan da, digərlərindən də öndədir. Fransa indi öz ətrafında kimlərisə cəmləşdirməyə çalışır, amma on illərdir heç nəyə nail ola bilmir. Ancaq azərbaycan az vaxt ərzində Qoşulmama Hərəkatı adlı bir qurumda liderə çevrildi, öz ətrafında böyük bir qüvvəni topladı. Azərbaycan bu gün COP29-a hazırlaşır, dünyanın bütün aparıcı dövlətləri Azərbaycanın ev sahibliyinə razılıq verib, məmnuniyyətlə bu prosesə qoşulublar. Yəni istənilən baxımdan Azərbaycan Fransadan üstündür.
Frankofoniya Parlament Assambleyası "Qarabağın erməni əhalisi" ilə bağlı mənasız bir qurumdur və mənasız, məntiqsiz bir sənəd qəbul edib. Onlar Azərbaycanı əsassız ittiham etmək üçün bir məqam axtarırlar. 2023-cü ilin sentyabrında Azərbaycan öz qanuni haqlarını reallaşdırdı və ermənilərin də Azərbaycan vətəndaşları kimi yaşamasını tam şəkildə ortaya qoydu ki, hüquqları var yaşasınlar, amma Azərbaycan vətəndaşlığını, konstitutsiyasını, qanunlarını qəbul etsinlər. Azərbaycan öz ərazi bütövlüyünü müdafiə edib, öz süveren hüquqlarını bütün ərazilərində bərpa edib, burda heç bir qanunsuz bir hal yoxdur. Azərbaycana qanunsuz bir addım atsaydı beynəlxalq təşklilatlar, BMT Azərbaycana qarşı hansısa bir qərar qəbul edərdi. Heç bir qərar qəbul olunmadı. Fransanın təşəbbüsü ilə yüngülvari bir cəhd olundu, ancaq o da nəticə vermədi. Əli hər şeydən üzülən Fransa indi də heç bir gücü, heç bir səlahiyyəti olmayan "Frankofoniya" deyilən qondarma bir təşkilatın adından Azərbaycana qarşı əsassız qətnamə qəbul edib. Bununla onlar öz gücsüzlüklərini nümayiş etdirirlər, bu qətnamənin heç bir təsiri yoxdur, çünki reallığı əks etdirmir. Erməniləri güclə Qarabağdan heç kim çıxarmayıb, onlara qarşı heç bir deportasiya, etnik təmizləmə olmayıb. Bu gün süni şəkildə Azərbaycana qarşı bu məsələni qabartmağın heç bir mənası yoxdur və heç yerdə bu ciddi sənəd kimi qəbul olunmur. Heç bir dövlət, heç bir təşkilat onu ciddiyə alıb reaksiya vermir. Bu qətnamə Makronun növbəti sayıqlamasıdır. Dünya da ona bu cür yanaşır"-deyə A.Nağı bildirdi.
A.Nağı qeyd etdi ki, qətnamədə Azərbaycanla Ermənistanın bir-birinin ərazi bütövlüyünü qarşılıqlı tanıması, Almatı bəyannaməsinə əməl etmələri barədə çağırış absurddur, Fransanın bu məsələyə heç bir aidiyyəti yoxdur, onun fikrinə ehtiyac duyulmur.
A. Nağının sözlərinə görə, "Frankofoniya"nın adından çıxarılan bu qətnamədə əks olunanlar əslində Fransanın mövqeyidir, orda ondan başqa söz sahibi olan dövlət yoxdur. "Azərbaycanın Fransanın məsləhətinə heç bir ehtiyacı yoxdur. Ola bilsin, ermənilər yenə də ortaya bir vasitəçi atmağı planlaşdırır, amma vasitəçiyə ehtiyac yoxdur, Azərbaycan vasitəçisiz danışıqların tərəfdarıdır. İşi elə qurub ki, danışıqlar tam şəkildə vasitəçisiz davam edir, Azərbaycan Ermənistana təkliflərini verir. Ermənistan da özünü bir qədər şıltaq aparır, cavab verir, öz şərtlərini qoyur. Onsuz da müəyyən bir məqamda Azərbaycan istənilən vasitə ilə Ermənistana reallığa uyğun olan sülh sənədini qəbul etdirəcəkdi. Sadəcə, hələlik Azərbaycan Ermənistanın şıltaqlıqlarına səbrlə yanaşır. Eyni zamanda burada məqsəd odur ki, Ermənistanla birbaşa təmasları davam etdirməklə ermənilərin və Fransanın, eləcə də bəzi başqa dövlətlərin ssenarisini pozur. Çünki onlar vasitəçi donunda məsələyə müdaxilə etmək istəyirlər. Bilirsiz ki, Minsk qrupu, həmsədrlərlə bağlı Ermənistan da, Fransa da, başqaları da Azərbaycana qarşı kampaniya apardılar, nəticəyə nail ola bilmədilər. Yenə də ölmüş Minsk qrupunu diriltməyə cəhd edirlər, ancaq cəhdlərin mənası yoxdur.
Bunların qəbul etdiyi bu qətnaməni Azərbaycanın siyasətinə təsir etmək cəhdi kimi də dəyərləndirmək olar. Bu mənasız qurum Azərbaycana təsir etmək məqsədi güdür. Amma mənasızdır. Sözümüz odur ki, Fransa bu cür mənasız hərəkətləri ilə özünü daha da nüfuzdan salır və danışıqlar prosesini Azərbaycan müəyyənləşdirir, proses Azərbaycanın cızdığı yol xəritəsi ilə gedir. Bu mənasız təşəbbüslərin heç bir əhəmiyyəti və danışıqlara təsir imkanı yoxdur"-deyə A.Nağı bildirdi.
İradə SARIYEVA
