Məhərrəm Zülfüqarlı: "Getdikcə Rusiya-Ermənistan münasibətlərinin kəskinləşməsi davam edəcək"
"Ola bilsin ki, an gələcək və belə bir qərar veriləcək". Ermənistan parlamentinin hakim "Vətəndaş Müqaviləsi" fraksiyasının deputatı Hovik Ağazaryan "Niyə Nikol Paşinyan Belarusa getməməkdən danışır, amma Rusiya ilə bağlı belə bəyanatlar verilmir" sualına cavab verərkən belə deyib.
"Əgər Putin özünü həyasız aparsa, bu təşəbbüs bizim aramızda da yarana bilər. Sizcə, Baş nazir birdən qərar verdi? Aramızda söhbətlər olur, danışırıq, müzakirə edirik. Lukaşenko düşmən münasibətdə olduğumuz qonşu dövlətə gəldi və onunla müttəfiq münasibətlərimiz var. Buna görə də bu qiymətləndirməni aldı. Əminliklə demək olar ki, Rusiya özünü çox pis aparır, rəqibimiz olan dövlətə bu qədər silah satıb. Ancaq hər şeyi Rusiyanın və Belarusun üzərinə atmamalıyıq, çünki bizim də günah payımız var. Məhz bütün bunların kontekstində biz öz qiymətləndirməmizi verməliyik. Hazırda buna ehtiyac yoxdur, sabah Rusiyada nə baş verəcəyini bilmirik", - deyə Ağazaryan qeyd edib.
Burada diqqəti çəkən məqam odur ki, Ermənistanda hakim partiya təmsilçiləri hətta Rusiya prezidentinin ünvanına təhqiramiz fikirlər səsləndirməkdən də çəkinmirlər. Bu isə mövcud hakimiyyətin Ukrayna müharibəsi fonunda mümkün olan qədər Rusiya ilə Ermənistan arasında bağları kəsmək istəyindən xəbər verir.
"Ancaq Ukrayna məsələsi hələ başa çatmadığına görə ermənilərin müəyyən hissəsi gözləmə mövqeyindədir"
Sözügedən məsələ ilə bağlı fikirlərini "Bakı-Xəbər"lə bölüşən AVCİYA-nın vitse-prezidenti, professor Məhərrəm Zülfüqarlı hesab edir ki, Ermənistan uzun illər Rusiyanın forpostu olduğu üçün əlaqələri kəsmək elə də asan olmayacaq: "Bu onunla əlaqədardır ki, tarixən ermənilərin bura köçürülməsi, burada dövlət yaratması Rusiya hesabına olub. Buna görə onlar Rusiyaya minnətdar olmalıdılar. Ancaq müasir dövrdə erməni xislətinə xas olaraq ermənilər Rusiyanın zəifləməsindən istifadə edirlər. Çünki tarix boyu ermənilər onları bəsləyən imperiyalara xəyanət ediblər. Roma, Bizans və Osmanlı imperiyalarının tarixlərindən çıxış edərək bunu deyə bilərik. SSRİ-yə xəyanət etdilər. İndi də çökməkdə olan Rusiyaya qarşı analoji mövqedən çıxış edirlər. Baş verənlərin əsas kökü və mahiyyəti bununla bağlıdır. Bu baxımdan Ermənistan Qərbin simasında indiki dövrdə yeni ağa axtarır. Bu da indiki dövrdə Ermənistan-Rusiya münasibətlərini daha da kəskinləşdirir. Belarus prezidenti Lukaşenko hələ 44 günlük müharibə başlamazdan əvvəl erməniləri dəfələrlə kompromislərə çağırıb. O zaman ermənilərin Rusiyanı silah məsələsinə görə tənqid etməyə cəsarətləri çatmırdı. Lukaşenko açıq bəyan etdi ki, Belarusdan çox Rusiya Azərbaycana silah satıb. Bənzər vəziyyət indi də özünü göstərir. Lukaşenkonu asıb-kəsən Paşinyanın açıq şəkildə Putinin ünvanına tənqidlər səsləndirməyə cəsarəti çatmır. Düzdür, hakim "Vətəndaş Müqaviləsi" partiyasının bəzi üzvləri Putinin ünvanına tənqidi fikirlər səsləndirir, amma hansısa erməni rəsmisi bunu deməkdən çəkinir. Buna baxmayaraq, Paşinyan hakimiyyəti müxtəlif formalarda Rusiyaya qarşı düşmənçiliyi körükləyir. İctimai rəyi buna kökləyirlər. Ermənistanda çoxsaylı informasıya resursları var ki, onların fəaliyyəti Rusiya siyasətini tənqid eləmək üzərində qurulub. Qərbdən müxtəlif formada Ermənistana yönələn yardımların artması ondan xəbər verir ki, başlıca məqsəd bu ölkəni Rusiyanın təsirindən çıxarmaqdır. Ancaq Paşinyan bunu ehtiyatlı şəkildə edir. Çünki Rusiyanın Ermənistanda dayaqları güclüdür. Birincisi, orada bəlli Rusiyapərəst qüvvələr var. İkincisi, Gümrüdə Rusiyanın hərbi bazası var. Bu da öz təsirini göstərir. Üçüncüsü, Rusiya-Ukrayna müharibəsi hələ davam edir. Yəni bu müharibə Rusiyanın məğlubiyyəti ilə başa çatsaydı və dünya bu qələbəni qeyd etsəydi, o zaman ermənilər yüzdəyüz Qərbin tərəfinə keçəcəkdilər. Vəziyyətdən istifadə edib Rusiyanı kəskin tənqid edərdilər. Ancaq Ukrayna məsələsi hələ başa çatmadığına görə ermənilərin müəyyən hissəsi gözləmə mövqeyindədir. Lakin istənilən halda proses gedir. Getdikcə Rusiya-Ermənistan münasibətlərinin kəskinləşməsi davam edəcək. Böyük ehtimalla, Ermənistan yaxın perspektivdə KTMT-dən çıxacaq. Bu da yeni situasiyanın yaranmasına səbəb olacaq".
Vidadi ORDAHALLI
