Faiq Ələkbərli: "Burada əsas məsuliyyət Makronun yürütdüyü yarıtmaz, uğursuz, qərəzli siyasətin üzərinə düşür"
Bakı Fransız Liseyi Təhsil Kompleksi ləğv olunub. Liseyin fəaliyyətinin dayandırılacağı ilə bağlı bu ilin aprel ayında şagirdlərin valideynlərinə məktub göndərilib. Məlumata görə, bu tədris ilində liseydə 200 şagird təhsil alıb.
Məlum olıduğu kimi, Bakı Fransız Liseyi Təhsil Kompleksinin açılışı 2014-cü ilin sentyabrında olub. Lisey Bakının "Ağ şəhər" adlanan ərazisində yerləşib. Tədris müəssisəsində, məktəbəqədər hazırlıq kursu da daxil olmaqla, ibtidai və kollec-lisey qrupları fəaliyyət göstərib. Tədris fransız dilində aparılıb.
On il əvvəl fəaliyyətə başlamış fransız liseyinin bağlanması səbəbi birbaşa Fransa prezidenti E.Makronun yürütdüyü yarıtmaz siyasətlə bağlıdır. Makron mütəmadi olaraq antiazərbaycan mövqeyi sərgiləyib. Hər addımda Azərbaycanla əlaqələrin pozulmasına səbəb olan davranışlar sərgiləyib. Nəticədə də Fransa və Azərbaycan arasında təhsil sahəsində əlaqələrdə çatlar yarandı. Bu gün Bakı Fransız liseyinin bağlanması məsuliyyəti E.Makronun yarıtmaz və qərəzli siyasətinin üzərinə düşür.
"Bu hadisənin baş verməsi Fransanın apardığı riyakar, çoxstandartlı siyasətin nəticəsidir"
AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO sədrinin müavini, siyasi şərhçi Faiq Ələkbərli "Bakı-Xəbər"ə bildirdi ki, Azərbaycan həmişə Fransa ilə əlaqələrin yaxşı olması istiqamətində addımlar atıb, lakin Makron hökuməti bunları dəyərləndirmək əvəzinə, ölkəmizə qarşı düşmən mövqe sərgiləyib. "Azərbaycan daim Fransa hökuməti ilə yaxşı münasibətlər qurmağa çalışıb. Hətta ATƏT-in Minsk qrupunun mövcudluğu dönəmində də Azərbaycan Fransaya daha səmimi münasibət bəsləyib, əlaqələr qurub. Baxmayaraq ki, Fransa ATƏT-in Minsk qrupunun həmsədri kimi heç vaxt özünü doğrultmayıb. Yeri gəlmişkən, bizim üçün artıq ATƏT-in Minsk qrupu kimi təşisat mövcud da deyil. Sözümün canı odur ki, Azərbaycan dövlət müstəqilliyini bərpa etdikdən sonra Fransaya münasibətdə ikili və çoxtərəfli əlaqələrdə ədalətli mövqedən çıxış edib. Ancaq bilirik ki, Fransa heç zaman özünü doğrultmayıb. Biz təkcə bunu Makronun dövründə yox, ondan əvvəlki prezidentlərin zamananında da görmüşük. Hər halda, Fransanın Ermənistana bəslədiyi münasibətlə Azərbaycana bəslədiyi münasibət arasında fərq olub, o, Ermənistanı həmişə yüksəkdə tutub. Yəni həmişə Fransa-Ermənistan münasibətləri bir addım öndə olub".
F.Ələkbərli hesab edir ki, on il bundan əvvəl yaradılan bu lisey əslində Azərbaycanın humanist münasibətindən qaynaqlanıb. "Vaxtilə Bakı Fransız liseyinin yaradılması Azərbaycan tərəfindən atılan mühüm addım idi. Fransanın ermənipərəstliyinə baxmayaraq, Azərbaycan humanistlik edərək fransız dilinə, bu dildə təhsilə, fransız mədəniyyətinə müsbət münasibət bəsləyib və belə bir liseyin fəaliyyətinə şərait yaradıb.
Bakı Fransız liseyinin on illik mövcudluğu dönəmində də Azərbaycan səmimi münasibətləri davam etdirib. Azərbaycan tərəfindən atılan xoşməramlı addımları, təəssüf ki, fransızlar bunun elə belə də olmalı olduğu kimi qarşılayırdı. Azərbaycanın bu humanist davranışlarının qarşılığında Fransa azacıq da olsa obyektiv münasibət ortaya qoymayıb. Azərbaycan Fransa və Azərbaycan arasında təhsil əlaqələrinin inkişafına töhfələr verirdi, Fransa isə hər addımda Azərbaycana qarşı zidd mövqe göstərirdi. Bu baxımdan, Bakı Fransız Liseyinin bağlanmasını təbii sayıram. Bu hadisənin baş verməsi Fransanın apardığı riyakar, çoxstandartlı siyasətin nəticəsidir. Burada əsas məsuliyyət Makronun yürütdüyü yarıtmaz, uğursuz, qərəzli siyasətin üzərinə düşür. Buna başqa cür yanaşmaq da olmaz".
F.Ələkbərli bildirdi ki, Fransa Azərbaycana qarşı heç zaman səmimi münasibət bəsləməyib və xüsusən də İkinci Qarabağ müharibəsində qazandığımız şanlı zəfərdən, ərazi bütövlüyümüzün bərpasından sonra bu ölkənin əsl siması üzə çıxıb, ermənidən daha çox erməni olmaq istədiyini ortaya qoyub. O hesab edir ki, bu siyasət indi də davam edir. F.Ələkbərliyə görə, Azərbaycan nə qədər ədalətli mövqe ortaya qoymağa çalışsa da, nə qədər soyuqqanlı və təmkinli davransa da, Fransa əksinə, hər zaman qızışdırıcı addımlar atıb. Nəticədə isə özü itirməli olub.
İradə SARIYEVA
