Akif Nağı: "Azərbaycan ermənilərin üzdəniraq "öz müqəddəratını təyinetmə hüququnu" heç zaman tanımayıb, indən sonra da ümumiyyətlə tanımaq ehtimalı yoxdur"
Ermənistanda hələ də elə qüvvələr var ki, mövcud reallığı dəyərləndirə və "qatarın çoxdan getdiyini" dərk edə bilmirlər, boyat bayatılar çağırmaqda davam edirlər. Yenə də havadarlarının onlara yaratdığı şəraitdən istifadə edib müxtəlif platformalarda öz xülyalarını dilə gətirirlər.
Bildiyimiz kimi, AŞPA ermənilərə həmişə arxa-dayaq çıxıb və indi də ermənipərəst mövqeyini davam etdirir. Odur ki, hər zaman erməni rəsmiləri, deputatları AŞPA-nın tribunasından Azərbaycana qarşı əsassız iddialar səsləndirirlər.
Emənistan Milli Assambleyadakı "Mənim şərəfim var" fraksiyasının üzvü Hayk Mamicanyan yazıb ki, AŞPA-nın plenar iclasında danışıb. Danışıb deyəndə, yenə də cəfəng fikirlər səsləndirib.
Mamicanyan deyib ki, guya gec-tez "Qarabağ ermənilərinin" "öz müqəddəratını təyinetmə hüququ ATƏT-in Minsk Qrupunun həmsədr ölkələrinin liderləri tərəfindən 5 dəfə razılaşdırıldığı və bəyan edildiyi kimi reallaşacaq".
Doğrudan da bu boş bir xülyadır. Azərbaycan Prezidenti də dəfələrlə bəyan edib ki, ATƏT-in Minsk qrupu ölü bir qurumdur və onun heç bir hüquqi gücü, funksiyası yoxdur. Əslində, ATƏT-in Minsk qrupu faktiki olaraq fəaliyyətsiz, ölmüş bir təşkilatdır və çoxdan dəfn olunmalı olduğu halda, ermənilər hələ də onun tabutunu buraxmaq istəmirlər.
"ATƏT-in Minsk qrupu faktiki olaraq fəaliyyətsiz, ölmüş bir təşkilatdır və çoxdan dəfn olunmalı olduğu halda, ermənilər hələ də onun tabutunu buraxmaq istəmirlər"
Azad Vətən Partiyasının sədri Akif Nağı "Bakı-Xəbər"ə şərhində "Azərbaycan ermənilərin üzdəniraq "öz müqəddəratını təyinetmə hüquqnu" heç zaman tanımayıb, indən sonra da ümumiyyətlə tanımaq ehtimalı yoxdur. Azərbaycan öz gücünə bütün problemləri həll edib. Ermənilər ATƏT-in Minsk qrupunun xortlayıb diriləcəyinə və geri qayıdacaqlarına, onların istəklərinə uyğun nələrsə olacağına ümid edirlər, amma bunlar hamısı boş xülyadır. Ermənilər həmişə xülyalarla yaşamağa üstünlük veriblər. "Böyük Ermənistan", "dünyanın ən qədim erməni əhalisi" xülyası və sairlə yaşayıblar və hələ də nağıl aləmindən ayılmaq, real həyata qayıtmaq istəmirlər. Ona görə də onların bütün xülyaları iflasa məhkumdur. Paşinyan da onların nağıllar aləmindən oyanmalarına, utopiyadan uzaqlaşmalarına çalışır. Ona görə də real Ermənistan deyə bir ideya ortaya atıb. Onu Ermənistanda milli ideyaya çevirmək istəyir ki, bu gün nəyimiz varsa ona qane olub onun üzərində inkişaf etməliyik. Bu, Ermənistan cəmiyyətində böyük diskussiyalara səbəb olur, əksəriyyət on illərdi, bəlkə yüz illərdi bu erməni xəstəliyinə düçar olub və o xəstəlikdən xilas ola bilmir, utopik xəyallar qururlar. O cümlədən, Minsk qrupu ilə bağlı xəyallar yaradırlar. Başa düşmürlər ki, Azərbaycan artıq Minsk qrupunu heç nə sayır. Yəni Azərbaycan təkidlə bəyan edir ki, Minsk qrupu buraxılsın və Ermənistana da təklif edib ki, buna birgə təşəbbüs edək. Əvvəlcə, Paşinyan komandası buna razı idi və bir "şərt" qoyurdu ki, əvvəlcə sülh müqaviləsi imzalansın, sonra Minsk qrupuna ehtiyac olmayacaq. Yəni bununla da erməni hiyləgərliyini göstərməyə çalışırlar ki, guya bizi arxayın salsınlar, sülh müqaviləsini imzalayandan sonra Minsk qrupunun buraxılmasını müxtəlif bəhanələrlə uzatsınlar"-deyə bildirdi.
A.Nağının qeyd etdiyinə görə, bu məsələdə Azərbaycanın mövqeyi aydındır, İkinci Qarabağ müharibəsindən sonra Azərbaycan mövqeyini birmənalı olaraq ifadə etdi və bəyan etdi ki, Minsk qrupuna heç bir ehtiyac yoxdur: "Minsk qrupu həmsədrləri bir neçə dəfə regiona səfər etdilər. Azərbaycan Prezidenti açıq şəkildə onların qarşısına məsələ qoydu ki, bizim artıq buna ehtiyacımız yoxdur, biz sizi dəvət etməmişik, siz niyə gəlmisiniz, izah edin görək nə fikriniz var. Faktiki olaraq da o dövrdə daha çox ABŞ çalışdı ki, Minsk qrupu həmsədrləri fəaliyyətini davam etdirsin, Rusiya da ona cəhd edirdi. Amma sonradan Azərbaycanın mövqeyi ilə Amerika da, Rusiya da, Fransa da hesablaşdı. Onlar bir müddət regiona səfər edən köhnə həmsədrləri "həmsədr" kimi qələmə verməyə çalışırdılar, sonradan regiona gələn hər bir nümayəndəni fərqli şəkildə adlandırdılar. Məsələn, Rusiya tərəf ona Rusiya Xarici İşlər Nazirliyinin Azərbaycanla Ermənistan arasında münasibətlərin normallaşdırılmasına dair xüsusi nümayəndəsi, Amerika ABŞ Dövlət Departamentinin Cənubi Qafqaz danışıqları üzrə ali müşaviri, Fransa da Fransa Xarici İşlər Nazirliyinin mümayəndəsi adını qoydu. Bu şəkildə bu davam edir. Ona görə də yenidən Minsk qrupunun bərpa olunması, orda "ermənilərin öz müqəddaratını təyin etmə hüququnun" ortaya atılması mənasız bir şeydir. Hətta rəqəm də bildirirlər ki, guya Minsk qrupu həmsədrləri 5 dəfə buna razılaşıblar. Bu rəqəmi hardan götürüblər? Saxta, uydurma bir rəqəmdir. Heç bir vaxt elə məsələ olmayıb, heç zaman Minsk qrupunun sənədlərində "öz müqəddəratını təyin etmə hüququ" ortaya ciddi şəkildə qoyulmayıb. Məsələ o şəkildə qoyulurdu ki, dövlətlərin ərazi bütövlüyü və öz müqəddəratını təyin etmə hüququ. İkisinin də adı çəkilirdi. Bir neçə dəfə də həmsədrlərin özləri tərəfindən vurğulanmışdı ki, dövlətlərin ərazi bütövlüyü daha üstün prinsipdir, o əsas götürülməlidir. Millətlərin öz müqəddəratını təyin etmə hüququ ilə bağlı o dövrdə də Minsk qrupu həmsədrləri, bir sıra beynəlxalq ekspertlər belə tövsiyyə edirdilər ki, əgər Qarabağda, Azərbaycanda yaşayan ermənilərin öz müqəddəratını təyin etmə hüququndan danışırlarsa, bu, Azərbaycanın sərhədləri daxilində olmalıdır, Azərbaycanın sərhədlərindən və qanunlarından kənar hər hansı bir öz müqəddəratını təyin etmə hüququ ola bilməz. Məsələ belə qoyulurdu. İndi də onların heç bir yanaşmasına ehtiyacımız yoxdur. Azərbaycan öz ərazisində öz qanunları çərçivəsində öz işini görür və beynəlxalq təşkilatlar da, böyük dövlətlər də birmənalı şəkildə Azərbaycanın mövqeyi ilə hesablaşırlar. Ermənilərin boş və mənasız xülyalarla yenidən özlərini aldatmasının yeri yoxdur". A.Nağı əlavə etdi ki, dəfələrlə deyildiyi kimi, onlar Azərbaycanın qanunlarına, mövqeyinə uyğun, Azərbaycana və Türkiyəyə sığınmaqla, himayəsini qəbul etməklə öz gələcəklərini qura bilərlər. "Bunun başqa bir yolu, bir perspektivi, alternativi yoxdur. Bunu ermənilər başa düşməlidir. Nə qədər tez başa düşsələr, bəlkə azdan-çoxdan xeyirlərinə olar, əks halda yenə də uduza-uduza gedəcəklər"-deyə A.Nağı vurğuladı.
İradə SARIYEVA
