Ramil Hüseynov: "Avroparlamentin bir sıra təmsilçiləri korrupsiya çətirinin içində olduğu üçün buna imkan vermir"
Avropa Komissiyasının Rusiya Federasiyasına qarşı növbəti sanksiyalar paketinin müddəalarını izah edən bəyanatında deyilir ki, Avropa İttifaqı üçüncü ölkələrdə emal olunmuş rus brilyantları ilə zərgərlik məmulatlarının idxalına qadağa tətbiqini qeyri-müəyyən müddətə təxirə salıb. Bu cür idxalı izləmək üçün sistemin işə salınması da gecikib.
14-cü sanksiya paketinin bir hissəsi olaraq, Avropa hakimiyyəti üçüncü ölkələrdə emal edilən Rusiyadan gələn brilyantlarla "zinət əşyalarına qadağa qoyulmasını təxirə salır". Tədbir Avropa Şurası "bu tədbirin həyata keçirilməsi üçün G7 çərçivəsində görülən tədbirlər fonunda" onun aktivləşdirilməsinə qərar verənə qədər qüvvəyə minməyəcək. Bundan əlavə, bəyanatda qeyd olunub ki, Avropa İttifaqı Rusiyadan icma ölkələrinə "kobud və kəsilmiş təbii almazların idxalını izləmək üçün məcburi sistem"in tətbiqini 2025-ci il martın 1-dək təxirə salıb.
Xatırladaq ki, Belçikadakı erməni əsilli iş adamı Kaspar Karapetyan öz biznesini, qanunsuz almaz qaçaqçılığı da daxil olmaqla, müxtəlif qeyri-leqal biznes fəaliyyətləri hesabına qurub. Adı mafiya əməllərində də hallanan Karapetyan Ermənistanın və özünün biznes maraqlarının müdafiəsi üçün avropalı məmur və deputatlara bu vaxtacan milyonlarla vəsait paylayır. Görünən odur ki, məhz öz mənafeləri naminə Karapetyandan gələn o qara pullar kəsilməsin deyə Avroittifaq o qərarı yenə qüvvədə saxladı. Rusiyanın almazının idxalına qadağa qoymadı. Bu, məhz Avropa Parlamenti üzərində hələ də erməni lobbisinin təsirinin qaldığını göstərən növbəti faktdır.
"Erməni lobbisi bunun müqabilində həm də qurumu Azərbaycana qarşı istifadə edir"
Sözügedən məsələ ilə bağlı fikirlərini "Bakı-Xəbər"lə bölüşən "Yeni Xətt" Müstəqil Siyasi Tədqiqatlar Mərkəzinin rəhbəri Ramil Hüseynov hesab edir ki, bütün bunlar bir sıra məsələlərdən xəbər verir: "Məlum olur ki, Avropa İttifaqı 2022-ci ilin 24 fevralından sonra Rusiyaya qarşı çoxsaylı sanksiyalar qəbul etsə də, reallıqda onların bir hissəsi işləmir. Söhbət ondan gedir ki, Avroittifaq üzvləri üçüncü ölkələr üzərindən Rusiyadan bir sıra məhsulları alırlar. Söhbət neft və mədən sənayesi məhsullarından gedir. Məhdudiyyətlər iqtisadiyyatı çox böyük olan Almaniyaya daha çox təsir etdiyi üçün bir sıra sanksiyaların önlənməsində rəsmi Berlin fəal rol oynayır. Məsələ ondadır ki, Ukrayna müharibəsi başlayana qədər Rusiya Almaniya üçün əsas ucuz xammal mənbəyi idi. Ancaq baxmayaraq ki, Rusiyaya qarşı sanksiyalar var, amma hələ də bir sıra Avropa ölkələri Ukrayna üzərindən qaz idxal edir. Baxmayaraq ki, iki ölkə arasında qanlı müharibə gedir. Almaz məsələsinə gəldikdə isə, burada bir sıra qaranlıq məqamlar var. Məsələ ondadır ki, Avropa Parlamenti almaz qadağasına mane olmaq üçün bütün imkanlardan istifadə edir. Avroparlamentin bir sıra təmsilçiləri korrupsiya çətirinin içində olduğu üçün buna imkan vermir. Çünki qara almaz biznesini həyata keçirən Kaspar Karapetyan buna görə AP təmsilçilərinə milyonlar ödəyir. Şəbəkənin içində olan bütün əsas strukturlar buna görə öz payını alır. Bu səbəbdən Rusiyaya qarşı tətbiq edilən sanksiyalar almaz ticarətinə şamil edilmir. Erməni lobbisi bunun müqabilində həm də qurumu Azərbaycana qarşı istifadə edir. Belə olmasaydı, 2024-cü ilin yanvarından Azərbaycana qarşı 3 qərəzli qərar qəbul etməzdi".
Vidadi ORDAHALLI
