Məhəmməd Əsədullazadə: "Paşinyan hökuməti ən azından bunu bir neçə ay yubada bilərdi"
Ermənistanın özünü müdafiə etmək, Fransadan və ya başqa ölkələrdən silah almaq hüququ var, lakin sülh müqaviləsi imzalamağa yaxın olduğumuz üçün Parisin bu addımı Ermənistanla Azərbaycan arasındakı münasibətlərdə yeni təxribatçı elementdir.
Bunu ATƏT-in Minsk Qrupunun keçmiş amerikalı həmsədri Ceyms Uorlik "news.am"a müsahibəsində deyib.
Keçmiş həmsədr hesab edir ki, Fransa Ermənistanla silah tədarükü ilə bağlı müqaviləni Azərbaycanla sülh sazişi imzalandıqdan sonra bağlamalı idi.
"Ermənistanın müdafiə olunmaq hüququ var, ordusu olacaq, onu ləğv etməyəcək, sərhədlərini istənilən xarici təhlükələrdən qoruyacaq, lakin təəssüf ki, sülh sazişinə yaxınlaşdıqca belə bir addım çaşqınlıq yaradır və danışıqları daha da çətinləşdirir", – Uorlik bildirib.
"Çünki məhz indiki həssas dönəmdə Fransadan Ermənistana uzaqvuran topların verilməsi sülh prosesinə zərbədir"
Sözügedən məsələni "Bakı-Xəbər"ə şərh edən politoloq Məhəmməd Əsədullazadə həmsədrin açıqlamalarına bir neçə prizmadan yanaşdı: "Ümumiyyətlə, Azərbaycanla Ermənistan arasında sülh istiqamətində müəyyən addımlar atıldı. Dörd kəndin ökəmizə geri qaytarılması delimitasiya və demarkasiya prosesində uğurlu bir addım idi. Ancaq biz görürük ki, konkret olaraq Fransa regionda pozucu fəaliyyət göstərir, Ermənistanın silahlandırılması ilə bağlı yeni müqavilələr imzalayır. Ermənistanın Kəlbəcər və Naxçıvan istiqamətində atəşkəsi pozması təsadüfü deyil. Fransa Ermənistanı buna sövq edir. Bütün bunlar Fransanın Cənubi Qafqazda militarist siyasətinin təzahürüdür. Fransa hesab edir ki, bununla Cənubi Qafqazda öz militarist siyasətini həyata keçirmiş olacaq. Bununla Cənubi Qafqazda öz geosiyasi mövqeyini gücləndirəcək. Ancaq Paris bu məsələdə kökündən yanılır. Çünki Türkiyə-Azərbaycan faktorunun yeni nizam yaratması Fransanın bu aqressiv siyasətinin qarşısını alıb və neytrallaşdıracaq. Xüsusilə Fransa prezidentinin həyata keçirdiyi beynəlxalq və regional siyasətin də fiaskoya uğradığını biz görürük. Məhz Cənubi Qafqazda siyasətinin fiaskoya uğraması onun sonunu gətirəcək. Paşinyan da çox gözəl bilir ki, Fransanın Ermənistana qarşı bu siyasəti sülh prosesini tormozlayır. Yəni bütün proseslər son nəticədə Ermənistanın əleyhinə işləyəcək. Çünki məhz indiki həssas dönəmdə Fransadan Ermənistana uzaqvuran topların verilməsi sülh prosesinə zərbədir. Paşinyan hökuməti ən azından bunu bir neçə ay yubada bilərdi. Onun buna getməməsi, əlbəttə ki, şübhələri artırır. Ola bilər ki, rəsmi Paris məqsədyönlü şəkildə Ermənistanı bu addımı atmağa məcbur edib".
Vidadi ORDAHALLI
