Bazar günü bir qrup silahlı Mahaçqala və Dərbənd şəhərlərində kilsələrə, sinaqoqlara və polis nəzarət məntəqəsinə hücum edib. Hər iki şəhərdə ibadətgahlar yandırılıb, qarşıdurmada 20 nəfər həlak olub. Rus Pravoslav Kilsəsi qurbanlar arasında 66 yaşlı keşiş Nikolay Kotelnikovun da olduğunu açıqlayıb.
Polis dörd silahlı hücumçunun Mahaçqalada, ikisinin isə Dərbənddə öldürüldüyünü açıqlayıb. Hücum edənlərdən kiminsə sağ qalıb-qalmadığı məlum deyil.
Rusiya təhlükəsizlik xidmətləri hücumdan sonra terrorla bağlı araşdırmalara başlayıb. Rəhbəri Sergey Melikov deyib ki, istintaq "bütün yatmış hücrələr ifşa olunana qədər" davam edəcək.
Bu arada, hücumda iştirak edənlər arasında iki oğlu və bir qardaşı oğlunun da olduğu ortaya çıxan yerli siyasətçi Maqomed Ömərov həbs edilib. Dağıstanın Serqokalinski rayonunun başçısı Ömərov ölkənin Rusiya prezidenti Putini dəstəkləyən ən böyük partiyası olan "Vahid Rusiya"nın Dağıstan təşkilatının rəhbəri olub. Hücumda ailəsinin əli olduğu üzə çıxandan sonra Ömərovun partiyadakı vəzifəsinə tez xitam verilib.
İki gün əvvəl isə Ukrayna ordusu ABŞ-ın verdiyi raketlərlə Krımı hədəfə alıb. Rusiya rəsmiləri raketin liman şəhərinin çimərliklər və otellərin yerləşdiyi ərazisinə düşdüyünü bildirib. Hücumda ən azı iki uşaq ölüb, Rusiya isə Kiyev administrasiyasını uşaqları qəsdən hədəfə almaqda ittiham edib.
Bundan əvvəl Putin Qərbin Ukraynaya uzaqmənzilli silahlar verməsini sərt tənqid edib və deyib: "Əgər kimsə müharibə bölgəsinə bu cür silahların verilməsinin, ərazimizə hücum etməyin və bizə problem yaratmağın mümkün olduğunu düşünürsə, niyə bizim də eyni şeyi digər döyüş bölgələrində edə bilməyəcəyimizi düşünürlər? Niyə bizim buna haqqımız olmasın? Cavabımız asimmetrik olacaq".
Hücumlardan sonra Rusiyadan diqqətçəkən açıqlama gəlib. Kremlin sözçüsü Dmitri Peskov prezident Putinin əvvəlki açıqlamasını xatırladaraq, dünyanın "ən böyük nüvə dövləti" olan Rusiyanın nüvə doktrinasını yeniləməyə başladığını bildirib.
Putin keçən ay demişdi ki, Rusiya bu cür silahların hansı şərtlər altında istifadə oluna biləcəyi ilə bağlı rəsmi nüvə doktrinasını dəyişə bilər. Bu bəyanatın ən böyük səbəbi təbii ki, Ukrayna müharibəsində Qərbin müdaxiləsinin artmasıdır.
Ukraynadakı müharibə 1962-ci ildə Kuba raket böhranından sonra Rusiya ilə Qərb arasında ən böyük münaqişəyə səbəb olub.
TAHİR
