Qədim dövrlərdən bəri ordu istənilən dövlətin həyatında əsas yer tutur. O, dövlətin əsas elementlərindən biridir, ən mühüm funksiyaları yerinə yetirir. Qloballaşma prosesi dünya birliyində suveren ölkələrin inkişaf yolları ilə bağlı getdikcə daha çox yeni suallar doğurur. Müasir dünya sosial-siyasi inkişaf sahəsində qlobal transformasiyalarla yanaşı, təhlükəsizlik problemini də yeni formada qarşıya qoyur. Savaş, işğal və terror təhlükəsinin güclənməsi, onun fərdi və yerli səviyyədən milli təhlükəsizliyə və sabitliyə təhdid kateqoriyasına keçməsi müasir dünyada ordunun rolunu daha da artırır.
Hamıya məlumdur ki, istənilən dövlət ən son elmi kəşflərdən silahlı mübarizə vasitələrinin inkişafı və təkmilləşdirilməsi maraqları naminə istifadə etməyə çalışır. Azərbaycan üçün də ordu quruculuğu daim xüsusi diqqət mərkəzində yer alıb. Bunun səbəbi Azərbaycanın işğal faktı ilə üzləşməsi olub. Bu fonda ölkə rəhbərliyi ordu quruculuğuna daim xüsusi diqqət edib. Ölkə prezidenti, Müzəffər Ali Baş Komandan İlham Əliyev fəaliyyətində ordu quruculuğunun inkişafına böyük töhfə verib. Bu gün Azərbaycan ordusunun malik olduğu silah və texnikanın böyük əksəriyyəti yenilənib, ordumuz ən müasir silahlarla təchiz olunub. Hərbi şəhərciklərin çox hissəsi yenidən tikilib və ya tam təmir edilib. Ölkə prezidentinin ən böyük xidmətlərindən biri də ondan ibarətdir ki, bu gün Azərbaycan ordusunun şəxsi heyətinin mənəvi-psixoloji durumu yüksək səviyyədədir. Bunlar fonunda Azərbaycan ordusunun şəxsi heyəti torpaqlarımızı düşmən tapdağından azad etmək üçün Ali Baş Komandanın əmrini layiqincə yerinə yetirdi. Elə indi də güclü Azərbaycan ordusu istənilən döyüş tapşırığını, hücum əməliyyatını yerinə yetirməyə qadirdir, şəxsi heyətin döyüş ruhu yüksəkdir. Dünyanın ən güclü 50 ordusu sırasında qərarlaşan, 30 ilin işğalına 44 gündə son qoyaraq ədaləti bərpa edən Azərbaycan ordusu sayəsində ölkəmiz regionda özünümüdafiə qabiliyyəti ən yüksək səviyyədə olan silahlı qüvvələrə malikdir. Vətən müharibəsindən sonra ordu quruculuğu sahəsində aparılan islahatların məntiqi nəticəsi olaraq bu ilin sentyabrında heç 24 saat tamam olmadan yekunlaşan, daha sürətli və dinamik lokal antiterror tədbirləri ilə Azərbaycanın ərazi bütövlüyü tamamlandı. Bu isə Müzəffər Ali Baş Komandanın rəhbərliyi ilə Azərbaycan Ordusunun növbəti tarixi uğuru oldu. Azərbaycan ordusunda islahatlar prosesi yeni hissələrin yaradılması, xüsusi təyinatlı hissələrdə təlim keçmiş kadrların sayının artırılması kimi təcrübələrlə davam edir. Əksəriyyəti Türkiyədə təlim keçmiş və istənilən müharibə şəraitində xidmət edə biləcək standartlara uyğun hazırlanmış komandolar Azərbaycan ordusunun yeni güclərindən biri kimi göstərilir. Həmçinin Sərhəd Xidmətinin xüsusi təyinatlılarının sayı artırılıb, Daxili Qoşunların xüsusi təyinatlıları, Dövlət Təhlükəsizlik Xidmətinin, Xarici Kəşfiyyat Xidmətinin xüsusi təyinatlı dəstələri, qrupları yaradılıb. Dəniz piyadalarının, Naxçıvan Əlahiddə Ordunun xüsusi təyinatlılarının sayı artırılıb. Sözsüz ki, bu gün Silahlı Qüvvələrimizin vahid proqram əsasında inkişaf edirilməsi Ali Baş Komandan İlham Əliyevin güclü dövlət strategiyasının nəticəsidir. Bu gün Azərbaycan ordusu müharibə dövründə qəhrəmanlıq və peşəkarlıq göstərmiş Azərbaycan ordusundan daha da güclüdür. Müharibədən sonra ordu quruculuğu üçün əlavə addımlar atılır.
MDB və dünya miqyasında ən müasir və güclü ordu hesab olunan Azərbaycan Silahlı Qüvvələrinin hərbi imkanları davamlı şəkildə genişlənir. Müasir dünyada bundan sonra da məhz güc amilinin həlledici faktor kimi çıxış edəcəyi artıq heç kimdə şübhə doğurmur. Bu baxımdan hazırda ölkəmizdə ordu quruculuğu sahəsində görülən işlər daha geniş vüsət alır. Azərbaycan müharibədən sonrakı dövrdə də bu istiqamətdə işləri heç bir fasiləyə yol vermədən davam etdirib. Beləliklə, ordu quruculuğu prosesi bütövlükdə Azərbaycan dövlətinin inkişafı ilə bağlı çox vacib məqamlardan biridir. Ölkə rəhbərliyinin xüsusi diqqəti ilə aparılan islahatlar, müasir silahların alınması, ordumuzun maddi-texniki bazasının gücləndirilməsi, əsgər və zabitlərimizin sosial-məişət şəraitinin yaxşılaşdırılması ilə bağlı atılan addımlar məhz Azərbaycan ordusunun sürətlə inkişaf etməsinə gətirib çıxarıb. Ordumuzun yüksək səviyyədə inkişaf etməsinin əsas səbəblərindən biri də Prezident İlham Əliyevin rəhbərliyi dövründə yetişmiş Azərbaycan gəncliyidir. Bu gənclik vətənpərvər, dövlətini, torpağını sevən və vətənə sədaqət andı içən gənclərdir. Şübhə yoxdur ki, bundan sonrakı müddətdə də Ali Baş Komandan İlham Əliyevin rəhbərliyi ilə Azərbaycan ordusu sürətlə inkişaf edəcək və həmişə xalqımızın qarantı olacaq. Od axüsusi qeyd olunmalıdır ki, ölkəmizdə ordu quruculuğuçoxistiqamətli sistem ilə inkişaf etdirilir. Belə ki, hazırda Azərbaycan dünyanın 40-a yaxın ölkəsi ilə ikitərəfli əsasda hərbi əməkdaşlıq həyata keçirir. Çoxtərəfli əməkdaşlıq da xüsusi diqqət mərkəzindədir. Bütün bunlar Azərbaycanın təhlükəsiz inkişafında mühüm riol oynayır.
Ramil QULİYEV
