Abutalıb Səmədov: "Qərb-Rusiya qarşıdurması növbəti, daha qanlı bir mərhələyə qədəm qoyur"
Abxaziya ilə Rusiya Federasiyasının sərhədində baş verən atışma nəticəsində 1 nəfər ölüb. Bu barədə Abxaziyanın "daxili işlər naziri" Robert Kiut "RİA Novosti"yə deyib:
"Saat 18.00 radələrində Psou çayı boyunca sərhəddə atışma baş verib. Bütün iştirakçılar müəyyənləşib. Həyatına sui-qəsd cəhdi edilən vətəndaş yaralanıb, yoldan keçən isə həlak olub. Hadisənin bütün iştirakçıları Abxaziya vətəndaşlarıdır". Qeyd edək ki, bundan öncə Dərbənd və Mahaçqalada kilsə və sinaqoqa hücum edilib.
Cənubi Qafqazı kim qarışdırır?
Müstəqil siyasətçi Abutalıb Səmədov "Bakı-Xəbər"ə açıqlamasında bildirdi ki,
Abxaziya-Rusiya sərhədində baş verən hadisə, təbii ki, araşdırılmalıdır: "Ola bilər ki, bu hadisədə siyasi izlər olmasın. Hətta məişət zəminində baş vermiş hadisə də ola bilər. Burada hansısa xarici qüvvənin iştirakını axtarmaq da yanlışdır. Ancaq bütövlükdə bəllidir ki, Cənubi Qafqazı qarışdırmaq istəyən güclər var. Qərbin və Rusiyanın qarşıdurması burda da özünü göstərir. Ermənistanda baş verən hadisələr, bir keşişin dəfələrlə Ermənistanda həyasızlıq etməsi və hakimiyyətin də buna səbrlə dözməsi onu göstərir ki, keşişin də arxasında kifayət qədər güclü qüvvələr dayanır. Ermənistan hökuməti artıq burda ehtiyatlı olmağın, səbrli davranmağın zəruriliyini anlayır. Eyni zamanda o da aydındır ki, Ermənistanda baş verən bu keşiş hərəkatının arxasında duranlardan biri şübhəsiz Rusiyadır. Ermənistanda baş verən dəyişiklikləri qəbul etməyən, onun Qərbə yaxınlaşmasının qarşısını almaq istəyən Rusiya bundan əvvəl də müəyyən cəhdlər göstərmişdi. Ancaq keşiş hərəkatı onun ən ciddi addımlarından biri oldu və əvvəlkilər kimi bu da uğursuz oldu. Hiss olunur ki, hərəkat sönmə dövrünü yaşayır və bu səbəbdən Ermənistan hökuməti məsələyə belə sakit yanaşır. Fransanın da Cənubi Qafqazı qarışdırmaq cəhdləri davam edir. Yenə də alət Ermənistan seçilib. Dünyanın ən böyük silah satıcılarından biri olan Fransa Ermənistana müxtəlif öldürücü silahlar verməkdə davam edir və bu istiqamətdə müxtəlif müqavilələr də imzalanır. Azərbaycan dövləti dəfələrlə Fransanın bu hərəkətinə etiraz edib. Çox təəssüf ki, Cənubi Qafqazın qarışdırılmasında Hindistan da iştirak edir. Ermənistana silah satan ölkələrdən biri də Hindistandır. Düzdür, nə Fransa, nə də Hindistan bu işi xeyriyyə məqsədi ilə görmür. Ermənistanın silahlanmaq istəyindən istifadə edib, öz silahlarını ona satırlar və bəzən də satdıqları silahlar kifayət qədər keyfiyyətsiz olur. Bütövlükdə Cənubi Qafqazda Qərb - Rusiya qarşıdurması o qədər kəskinləşməsə də, hələ ki, davam edir, gələcəkdə də daha kəskin şəkil ala bilər. Sərhəddə ermənilərin dəfələrlə atəşkəsi pozmaq, Azərbaycan ərazisini atəşə tutmaq cəhdləri olub ki, burada da xarici qüvvələrin iştirakı şübhəsizdir. Onlar bu yolla Azərbaycanla Ermənistan arasında növbəti qarşıdurma yaratmaq istəyirlər. Ukrayna müharibəsi qızışır, tamamilə yeni mərhələ başlayır. Qərb Ukraynaya daha çox silahlar vermək öhdəliyi götürüb. F-16 -ların yayın sonunda gəlməsi planlaşdırılır. Atakam silahlı raketlər də verildi və ABŞ da, Qərb də Rusiyanın müəyyən ərazilərini vurmağa öz razılıqlarını verdi. Buna cavab olaraq Rusiya da müəyyən addımlar atdı. Şimali Koreya və Vyetnam ilə imzalanan strateji əməkdaşlıq müqavilələri, Rusiyanın hərbi gəmilərinin Kubaya göndərilməsi, raketlərinin orada yerləşdirilməsi və digər addımlar onu göstərir ki, Qərb-Rusiya qarşıdurması növbəti, daha qanlı bir mərhələyə qədəm qoyur. Bundan sonra hansı addımların atılacağı, hələ ki, məlum deyil. Hər halda ümid edək ki, sülh axtarışları nəhayət real nəticələr verəcək və dünya çox böyük qarşıdurmadan, təhlükədən azad olacaq".
Məhəmmədəli QƏRİBLİ
