Azər Həsrət: "Ərazi bütövlüyümüzü şübhə altına alan Konstitusiya sənədləri dəyişdirilməlidir"
Prezident İlham Əliyev ABŞ Dövlət katibi Entoni Blinkenlə telefon danışığı zamanı regionda sülhün təmin edildiyini, sülh müqaviləsinin əsasını təşkil edən prinsiplərin və onun mətninin təşəbbüskarının Azərbaycan tərəfi olduğunu qeyd edərək, ikitərəfli əsasda normallaşma prosesi və sülh gündəliyinin irəli aparılması səylərinin davam etdirildiyini vurğulayıb.
ABŞ-ın sülh gündəliyinə töhfə vermək əzmini yüksək qiymətləndirən dövlət başçısı Ermənistanda konstitusiya, müvafiq qanunlar və ölkədaxili normativ-hüquqi aktlar əsasında Azərbaycana qarşı olan ərazi iddialarına son qoyulmasının sülh gündəliyinin irəli aparılması baxımdan vacibliyini qeyd edib.
Prezident artıq keçmişin qalığı olan münaqişə səhifəsinin tamamilə bağlanması üçün qeyri-funksional olan ATƏT-in Minsk Qrupu və onunla bağlı olan bütün institutların fəaliyyətinə rəsmən xitam verilməsinin vaxtının çoxdan yetişdiyini əlavə edib.
Sözügedən məsələni baki-xeber.com-a şərh edən siyasi şərhçi Azər Həsrətin fikrincə, Azərbaycan dövləti münaqişə mövcud olduğu bütün müddət ərzində daim öz konstruktiv yanaşması ilə fərqlənib: "Yəni biz Ermənistanın Azərbaycan torpaqlarını işğal etməsinə baxmayaraq, onlara sülh əlimizi hər zaman uzatmışıq. Eyni zamanda beynəlxalq vasitəçilərə də bu mövqeyimizi çatdırmışıq. Yəni bəyan etmişik ki, müharibə olub, insanlar öldürülüb, torpaqlar işğal edilib. O baxımdan əlbəttə ki, bunlara görə cavab verilməlidir. Lakin əbədi düşmənçilik edə bilmərik və etməyəcəyik. Ermənistan və ermənilərlə dinc yanaşı yaşamağa hazırıq. Bir sözlə, Azərbaycan bunu hər zaman əməldə nümayiş etdirib. Ancaq təəssüflər olsun ki, işğalçı Ermənistan və onun havadarları bu xoş məramı düzgün qiymətləndirə bilməyiblər. On illər ərzində Azərbaycanın xoş məramını dəyərləndirəcək ağılda olmayıblar. Ona görə də Azərbaycan hərb yolu ilə öz torpaqlarını işğaldan azad edib. İndi vəziyyət dəyişib və artıq Azərbaycan qalib, diqtə edən tərəfdir. Ən başlıcası bundan Azərbaycan sui-istifadə etmir. Halbuki, qalib tərəf olaraq bu imkana sahibik, amma yenə də dövlətimiz xoş məram nümayiş etdirir. Heç bir əlavə və qarşı tərəfi aşağılayacaq şərt irəli sürmür. Sadəcə olaraq onlardan tələb edir ki, Azərbaycanın və eləcə də Türkiyənin ərazi bütövlüyünü şübhə altına alan Konstitusiya sənədləri dəyişdirilməlidir. Bu da tamamilə normal tələbdir. Çünki Ermənistan bizimlə normal münasibətlər qurmaq istəyirsə, o zaman torpaqlarımıza iddia etməməlidir. Bu iddiadan imtina etdiyini Konstitusiyası daxil olmaqla bütün qanunlarında göstərməlidir. ATƏT-in Minsk Qrupuna gəlincə bu təsisat zatən ölü doğulan bir qurum idi. Öz fəaliyyəti dövründə münaqişə tərəflərini bir addım belə bir-birinə yaxınlaşdıra bilməmişdi. Həmsədrlər ara-sıra regiona səfər edib İrəvanda və Bakıda kabab yeyirdilər, konyak içib bir-birinə xoş sözlər deyirdilər. Daha sonra mətbuata açıqlama verib çıxıb gedirdilər. Nəzərə alsaq ki, münaqişə bitib, o zaman Minsk Qrupu kimə lazımdır? Tərəflər sülh sazişi imzalamağa yaxındırlar və artıq münaqişə deyilən bir şey də yoxdur. Çünki münaqişə həll edilib. Ona görə də məntiqlə Minsk Qrupu özünü buraxmalıdır. Söhbət təkcə həmsədrlərdən yox, ümumiyyətlə Minsk Qrupunun buraxılmasından gedir. Çünki burada 10-dan artıq ölkə təmsil olunur. Ona görə də Minsk Qrupu özünü buraxmalıdır. Həmçinin hesabat verməlidirlər ki, bu dövr ərzində nə işlə məşğul olublar. Həmin hesabat da Azərbaycanla razılaşdırılmalıdır".
Vidadi ORDAHALLI
