Aarorat Mirzəyanın bu açıqlaması Azərbaycanla sülh müqaviləsinin imzalanması Ermənistanın pozuculuq fəaliyyətinin növbəti göstəricisidir
Ermənistan Respublikasının xarici işlər naziri Ararat Mirzoyan bir daha təsdiqləyib ki, İrəvan yaxın bir ay ərzində Bakı ilə sülh müqaviləsi layihəsinin hazırlanmasını başa çatdırmağa hazırdır.
Ararat Mirzoyan bu fikirləri Litvanın xarici işlər naziri Qabrielius Landsberqislə birgə mətbuat konfransında beynəlxalq və regional təhlükəsizlikdən danışarkən deyib.
"Mən həmkarıma qonşularımızla münasibətlərin bərpası prosesində əldə etdiklərimizi, eləcə də Cənubi Qafqazda uzunmüddətli sabitliyin yaradılması səylərini təqdim etdim 1991-ci il Alma-Ata Bəyannaməsinə əsaslanır", - deyə Ararat Mirzoyan bildirib.
Mirzoyan Azərbaycanla başlayan sərhədin demarkasiyası prosesinin davam etdirilməsini və bir-birinin ərazi bütövlüyünün tanınmasının təsdiqini vacib hesab edib:
"Ermənistan və Azərbaycan arasında sülh müqaviləsi üzərində işin başa çatdırılması da çox vacibdir. Biz Azərbaycan tərəfinə çoxlu konstruktiv təkliflər göndərmişik və artıq təklif etdiyimiz kimi, yaxın bir ay ərzində yekunlaşdırıb saziş bağlamağa hazırıq".
Ararat Mirzoyan bildirib ki, Azərbaycan bütün bunlarla yanaşı, ən azı, Cənubi Qafqazda sülhün bərqərar olması məsələsində ölkənin səmimiliyinə şübhə yaradan yeni gündəmlər irəli sürür.
Əvvəla, Mirzoyan ağ yalan danışır. Özü də utanmadan bu yalanları beynəlxalq tribunadan ifadə edir. Çünki sülh sazişinin imzalanması üçün Ermənistan öz konstitusiyasını dəyişməlidir. Bunun üçün də ölkədə referendum keçirilməlidir. Bütün bunların edilməsi qısa müddətdə baş tuta bilməz. Bundan əlavə, Mirzoyan Azərbaycanı güya yeni tələblər irəli sürməkdə günahlandırmaqla bizə şər atmış olur. Çünki sülh prosesi ilə bağlı Azərbaycanın tələbləri bəllidir və bunlar dəyişməz olaraq qalır.
Siyasi şərhçi Sahil Kərimli "Bakı-Xəbər"ə açıqlamasında bildirdi ki, Arorat Mirzəyanın bu açıqlaması Azərbaycanla sülh müqaviləsinin imzalanması Ermənistanın pozuculuq fəaliyyətinin növbəti göstəricisidir: "Çünki, Ermənistan həqiqətən də Azərbaycanla sülh müqaviləsi imzalamaq istəyirsə və bu istiqamətdə verdiyi bəyanatlarda səmimidirsə, ilk növbədə Azərbaycanın haqlı tələblərinə əməl etməlidir. Azərbaycanın da haqlı tələbləri ondan ibarətdir ki, bu gün Ermənistan konstitusiyasında Azərbaycana, hətta Türkiyəyə qarşı da konkret olaraq ərazi iddiaları var. Əgər bir ölkəyə qarşı işğalçılıq meyilləri varsa, həmin ölkə ilə sülh müqaviləsinin imzalanması da qeyri - mümkündür. Çünki, Ermənistan daim 30 il ərzində Azərbaycan ərazilərini işğalda saxladığı dövrdə də məhz dövlət siyasətini konstitusiyasına uyğun həyata keçirib. Yəni, Azərbaycana qarşı ərazi iddiaları, işğalçılıq meyilləri, separatizm mövcud olub. Bu gün Azərbaycan haqlı olaraq, beynəlxalq hüquqa əsaslanaraq belə tələblər irəli sürür. Hesab edirəm ki, Azərbaycanla sülh müqaviləsinin imzalanması istiqamətində Ermənistan belə riyakar yox, səmimi mövqe ortaya qoymalıdır. Azərbaycan sülh müqaviləsi ilə bağlı tələblərində sabitqədəm mövqe sərgiləyir. ABŞ Dövlət Katibi Antoni Blinken Prezident İlham Əliyev arasında telefon danışığı olub. Prezident qətiyyətli şəkildə mövqeyini bildirib ki, Ermənistan konstitudiyasına mütləq mənada dəyişiklik etməlidir. Yalnız bundan sonra sülh müqaviləsi imzalana bilər. Mirzoyan iftira ataraq bildirir ki, güya Azərbaycan sülhə manə olan tələblər irəli sürür. Ermənistan ləyaqətli sülh imzalamaq istəyirsə, belə iküzlülük etməməlidir".
Məhəmmədəli QƏRİBLİ
