“Mənim seçki platformamda Makronun fotosu olmasın” - partiyadaşlardan etiraz...
Azər Həsrət: "Hətta Makronun sevimlisi olan erməni siyasətçilər belə bu adamdan imtina edirlər"
Emanuel Makronun nüfuzdan düşməsi onun partiyasından olan deputatlar üçün mənfi təsirə çevrilib. Növbədənkənar parlament seçkilərində onun partiyasından olan namizədlərin çoxu kampaniya materiallarında E.Makronun şəklini qoymamağı üstün tutub.
Emanuel Makron fransızlar üçün ləkədirmi? Ən azından, onun düşərgəsindəki bəzi namizədlər buna əmindirlər və ondan təşviqat zamanı təmkinli olmağı xahiş edirlər. "Europe-1" radiosunun Parisin 17-ci rayonundakı Ponsele bazarında hazırladığı reportajda fransızlar dövlət başçısını sərt tənqid edirlər.
Parisin 4-cü rayonundakı Poncelet bazarında da tənqid tendensiyası öz təsdiqini tapır. Keçidlərdə, küçələrdə, meyvə-tərəvəz dükanlarında prezident tərəfdarlarını tapmaq çətindir.
Fransızlar alıcılıq qabiliyyətinin aşağı düşməsini E.Makronun əsas qara nöqtəsi hesab edir. Sadə xalqın nümayəndələri bildirirlər ki, əvvəllər E.Makrona inanırdılar, ancaq bu gün mövcud vəziyyət əsl problemin olduğunu göstərir. Onlar E.Makrona, onun partiyasına səs verməyəcəklərini qeyd edirlər. Ahıl insanlar isə onun çox danışdığını, sanki kino, teatr səhnəsində oynadığını vurğulayıblar.
E.Makronun nüfuzunun düşməsi partiya daxili narahatlıqda yaradıb. Namizədlər onun şəklini vərəqələrində qoymamağa üstünlük veriblər. 2022-ci ildən fərqli olaraq prezident partiyasından olan erməni mənşəli Astrid-Panosyan –Buvetin vərəqələrində dövlət başçısının şəkli yoxdur. Onun vərəqələrində Emmanuel Makronun şəkli Eduard Filipin şəkli ilə əvəz edilib.
"Ağlı başında olan siyasətçilər Makronun onlara vura biləcəyi zərəri düzgün hesablayıblar, bu baxımdan Makrondan..."
Öz partiyadaşlarının seçki kampaniyası zamanı Makronun şəkillərindən imtina etməsi səbəblərinə münasibət bildirən siyasi şərhçi Azər Həsrət "Bakı-Xəbər"ə bildirdi ki, bu, Makronun nüfuzunun çox aşağı olması ilə bağlıdır. "Emanuel Makronun prezident kimi nüfuzdan düşməsi sirr deyil. Ümumiyyətlə, Fransa dövləti onun başçılığı altında özünün çağdaş tarixində ən rəzil duruma düşüb. Yəni təsəvvür edin ki, Makronun yanlış siyasəti üzündən uzun illərdir Fransa dövlətinin təsiri altında olan Afrika dövlətləri belə ondan üz çevirir. Yaxud da ki, Fransanın müstəmləkəsi olan Yeni Koledoniya kimi, torpaqlarda yaşayanlar ayağa qalxıb Parisə buynuz göstərir. Bütün bunlar Emanuel Makronun yarıtmaz siyasətindən qaynaqlanır. Yəni bu adam Fransa kimi köklü tarixi olan bir dövləti rəzil duruma salıb".
A.Həsrətin sözlərinə görə, eyni zamanda Qafqazalarda da Fransa dövləti özünü çox pis vəziyyətdə nümayiş etdirib və etdirməkdədir. A.Həsrət vurğuladı ki, Azərbaycanla Ermənistan arasında sülh prosesi getdiyi, bütün maraqlı tərəflər bu prosesə bu və digər şəkildə töhfə verməyə çalışdığı halda məhz E.Makronun təşəbbüsü ilə proses süni şəkildə əngəllənir, Ermənistanın nəhayət ki, normal bir dövlətə çevrilməsinin qarşısını alınır. "Yəni bütün bunlar Fransa seçicisinin və siyasətçilərinin gözü qarşısında baş verir. Digər tərəfdən də, ölkənin içində vətəndaş narazılığı getdikcə artır. Biz Makronun dönəmində Fransanın içərisində Paris başda olmaqla bir çox şəhərlərdə, bölgələrdə xalqın ayaqlandığını, hakimiyyətə qarşı hətta radikal addımlar atdığını müşahidə etməkdəyik. Bütün bunlar nədən qaynaqlanır? Yenə də Makronun yarıtmaz siyasətindən, yarıtmaz idarəetməsindən qaynaqlanır. Ona görə də, indi siyasi yarışmaya qatılan siyasətçilər düşünürlər ki, Makronla çiyin-çiyinə bu prosesdə iştirak edəcəkləri təqdirdə uduzma risqləri çox yüksəkdir. Ona görə də Makronun şəklindən, adından, dəstəyindən imtina edilir. Yəni ağlı başında olan siyasətçilər Makronun onlara vura biləcəyi zərəri düzgün hesablayıblar, bu baxımdan Makrondan imtina edirlər. Hətta Makronun sevimlisi olan erməni siyasətçilər belə bu adamdan imtina edirlər. Mənə elə gəlir ki, belə bir vəziyyətdə Makron artıq Fransa dövlətinə nəinki başçılıq etməməli, ümumiyyətlə siyasətdən çəkilib getməlidir. Yəni dediyim kimi, Fransa dövlətini rəzil duruma gətirdiyi üçün bunun hesabını verməli, eyni zamanda bir daha siyasətlə məşğul olmamalıdır" - deyə A.Həsrət qeyd etdi.
İradə SARIYEVA
