Səfirin geri çağırılması Paşinyanın Rusiya və KTMT-yə növbəti həmləsidir...
Rəşad Bayramov: "Bu gərginlikdən itirən Belarus yox, Ermənistan olacaq"
Ermənistanın Belarusdakı səfiri Razmik Xumaryan məsləhətləşmələr üçün İrəvana çağırılıb. Bu barədə Ermənistan Xarici İşlər Nazirliyindən bildirilib.
Bundan əvvəl Ermənistanın baş naziri Nikol Paşinyan bildirib ki, Lukaşenko Belarusa rəhbərlik etdiyi müddətcə nə özü, nə də başqa bir başqa dövlət rəsmisi Belarusa səfər edəcək.
Belarusun Rusiyadakı səfirliyinin müşaviri Aleksandr Şpakovski deyib ki, Ermənistan Baş naziri Nikol Paşinyanın Minsklə bağlı impulsiv bəyanatlarını sakit qiymətləndirir:
"Biz Nikol Paşinyanın impulsiv bəyanatlarını sakitliklə qiymətləndiririk. Bizi çoxəsrlik tarixi bağlarla bağlayan qardaş erməni xalqına hörmətimizi davam etdiririk".
Onun sözlərinə görə, Belarus Ermənistanda gedən daxili siyasi proseslərə, eləcə də İrəvanın xarici siyasətinə qarışmır:
"Qarşılıqlılıq prinsipinə əsaslanaraq, biz tərəfdaşlarımızdan və müttəfiqlərimizdən də oxşar yanaşmalar gözləyirik, ona görə də Ermənistan rəhbərliyinin nümayəndələrinin Belarus siyasi ekstremistlərinin liderləri ilə təmaslarını bir qədər çaşqınlıqla izlədik.
Eyni zamanda, tərəfdaşların və müttəfiqlərin seçimi rəsmi Minskin suveren məsələsidir və bu halda "mən-mən də" yanaşması bizim üçün qəbuledilməzdir. Biz qardaş Azərbaycanla bütün sahələrdə, o cümlədən hərbi-texniki sahədə qarşılıqlı əlaqədə olmuşuq və bundan sonra da əlaqə saxlayacağıq".
Ermənistanım bu addımlarını Paşinyanın KTMT və Rusiyaya yönəlik növbəti həmləsi saymaq olarmı?
Siyasi şərhçi Rəşad Bayramov "Bakı-Xəbər"ə açıqlamasında bildirdi ki, son günlər Ermənistanla Belarus arasında siyasi gərginlik müşahidə olunur. Belə ki, iyunun 13-də Ermənistanın Baş naziri Nikol Paşinyan Aleksandr Lukaşenkonun Belarusa rəhbərlik etdiyi müddətdə bu ölkəyə getməyəcəyini bəyan edib. Bu gün, həmçinin, Ermənistan Xarici İşlər Nazirliyinin mətbuat katibi Ani Badalyan bildirib ki, Ermənistanın Belarusdakı səfiri Razmik Xumaryan məsləhətləşmələr üçün İrəvana çağırılıb.
Belarus da öz növbəsində Ermənistandakı səfiri Aleksandr Konyuku məsləhətləşmələr üçün geri çağırıb.
Bu barədə Belarus Xarici İşlər Nazirliyinin mətbuat katibi Anatoli Qlaz məlumat verib. Ermənistan mətbuatı iki ölkə arasında gərginliyin artmasının ticarət əlaqələrinə mənfi təsir edə biləcəyini yazır. Qeyd edim ki, Nikol Paşinyan baş nazir olduqdan sonra Ermənistanın Belarus ilə ticarət əlaqələri dəfələrlə artıb. Bir müddət əvvəl Sankt-Peterburqda keçirilən Avrasya İqtisadi İttifaqının (Aİİ) sammitinə qatılan Belarus Prezidenti Aleksandr Lukaşenko jurnalistin "Ermənistanı itiririkmi" sualını cavablandırarkən deyib ki, o, Ermənistanın heç yerə getməyəcəyindən əmindir. Ermənistan bununla Qərbə xoş gəlmək istəyir. Rusiya ilə belə açıq konfrontasiyaya getməkdən ehtiyat edir. Düzdür, KTMT və Rusiyanın da əksinə yönəlik açıqlamalar verir. Belarusla bağlı gərginlik həm də həmin ölkənin Azərbaycanla səmimi münasibətdə olması ilə bağlıdır. Bu gərginlikdən itirən Belarus yox, Ermənistan olacaq. Çünki Belarus daha böyük və zəngiin ölkədir. Ermənistanın onun potensialına böyük ehtiyacı var. Ermənistanda kimsə diqqəti daxili problemlərdən yayındırmaq üçün xarici düşmən amilini ortaya atıbsa, bu, heç də uzaqgörən mövqe deyil".
Məhəmmədəli QƏRİBLİ
